ထို့အပြင် နိုင်ငံတဝန်းလုံး၌ နိုင်ငံတော်ကာကွယ်ရေးနှင့် အုပ်ချုပ်မှုဆိုင်ရာ ကိစ္စရပ်များမှအပ စစ်ရေးဆိုင်ရာ လှုပ်ရှားမှုများ ဖေဖော်ဝါရီလကုန်အထိ ရပ်ဆိုင်းထားမည်ဟု တပ်မတော်က ထုတ်ပြန်ခဲ့ခြင်း၊ အစိုးရနှင့် မြောက်ပိုင်းလက်နက်ကိုင်လေးဖွဲ့တို့ တွေ့ဆုံမည့်နေရာ ညှိနှိုင်း၍ မရသေးခြင်း စသည့်သတင်းများလည်း ရှိနေပါသည်။

NCA လက်မှတ် မထိုးရသေးသောအဖွဲ့များ၏ ဆောင်ရွက်မှု

အစိုးရနှင့် မြောက်ပိုင်းလက်နက်ကိုင်လေးဖွဲ့ဖြစ်သော KIO/KIA ၊ PSLF/TNLA ၊ MNTJP/MNDAA၊ ULA/AA တို့၏ အပစ်ရပ်စဲရေးဆွေးနွေးပွဲ ပြုလုပ်ရန် နေရာ ညှိနှိုင်း၍ မရသေးကြောင်း သိရပါသည်။ [1] ယခုလအတွင်း တွေ့ဆုံနိုင်ရန် အစိုးရဘက်မှ  ကမ်းလှမ်းထားမှုကို မြောက်ပိုင်းလက်နက်ကိုင်လေးဖွဲ့က အကြောင်းပြန်ကြားခြင်း မရှိသေးသကဲ့သို့ မြစ်ကြီးနား သို့မဟုတ် ကျိုင်းတုံမြို့များထက် တရုတ်နိုင်ငံတွင်သာ တွေ့ဆုံလို့၍ နေရာ ညှိနှိုင်း မရသေးခြင်း ဖြစ်သည်ဟု KBC မှ ဦးလမိုင်ဂွမ်ဂျာက ပြောကြားခဲ့သည်။

အလားတူ ဦးလမိုင်ဂွမ်ဂျာ၏ ပြောကြားမှုအရ အစိုးရနှင့် တွေ့ဆုံမှုတွင် မြောက်ပိုင်းလက်နက်ကိုင် လေးဖွဲ့ စလုံး ပါဝင်မည်ဖြစ်ပြီး ယခုလအတွင်း တွေ့ဆုံရန် မဖြစ်နိုင်ဘဲ ဖေဖော်ဝါရီလဆန်းတွင် တွေ့ဆုံနိုင်မည် ဟုလည်း သိရပါသည်။ [2] မြောက်ပိုင်းလက်နက်ကိုင်အဖွဲ့များနှင့် အစိုးရ ငြိမ်းချမ်းရေးကိုယ်စားလှယ်အဖွဲ့ အကြား ၂၀၁၉ ခုနှစ်က ကျိုင်းတုံတွင် နှစ်ကြိမ်၊ ရွှေလီတွင် တကြိမ် အလွတ်သဘောတွေ့ဆုံမှုများ ရှိခဲ့ပြီး ယခုအကြိမ်တွင် ULA/AA အဖွဲ့ ပါဝင်လာမည် ဖြစ်ပါသည်။

ထို့အပြင် ရခိုင်ပြည်နယ် ငြိမ်းချမ်းရေးအတွက် ဆက်လက်ထိန်းသိမ်းဆောင်ရွက်သွားရန် တပ်မတော်နှင့် AA အဖွဲ့ နှစ်ဖက်စလုံးက ဆန္ဒရှိကြောင်း တပ်မတော်ပြောခွင့်ရပုဂ္ဂိုလ်က ပြောကြားခဲ့သည့်သတင်းလည်း ရှိပါ သည်။ [3] တပ်မတော်အနေဖြင့် ရခိုင်ပြည်နယ်တွင် ငြိမ်းချမ်းရေးနှင့် လက်ရှိ ပစ်ခတ်တိုက်ခိုက်မှုရပ်စဲရေး အနေအထားကို ဆက်လက်ထိန်းသိမ်းလျက်ရှိပြီး တဖက်အဖွဲ့အစည်းများကလည်း ဆက်လက်ထိန်းသိမ်းလျက်ရှိကြောင်း ဗိုလ်ချုပ်ဇော်မင်းထွန်းက နေပြည်တော်သတင်းစာရှင်းလင်းပွဲတွင် ပြောကြားခဲ့ခြင်း ဖြစ်ပါ သည်။

NCA လက်မှတ်ထိုးထားသည့်အဖွဲ့များ၏ ဆောင်ရွက်မှု

တပ်မတော်သတင်းစာရှင်းလင်းပွဲတွင် အာဏာမသိမ်းဟု မှတ်ယူ၍ မရကြောင်း ပြောဆိုခဲ့မှု၊ ဖွဲ့စည်းပုံအခြေခံ ဥပဒေကို လိုက်နာမှုမရှိပါက ဖျက်ပစ်ရမည်ဟု တပ်မတော်ကာကွယ်ရေးဦးစီးချုပ်က ပြောကြားခဲ့မှုတို့နှင့် ဆက်စပ်သည့်သတင်းများက ယခုရက်သတ္တပတ်အတွင်း သတိပြုစရာ ဖြစ်နေပါသည်။

ထိုကဲ့သို့ ရွေးကောက်ပွဲဆိုင်ရာ အငြင်းပွားမှုများကို အခြေခံ၍ အာဏာသိမ်းမှု ဆောင်ရွက်နိုင်သည့်အခြေအနေ ရှိကြောင်း တပ်မတော်၏ ပြောကြားခဲ့ခြင်းအတွက် ဖက်ဒရယ်ပြည်ထောင်စု တည်ဆောက်ရေး ကြိုးပမ်းနေ ချိန်တွင် ထိုအခြေအနေမျိုး မလိုလားကြောင်း တိုင်းရင်းသားလက်နက်ကိုင်အဖွဲ့တာဝန်ရှိသူအချို့က ပြော ကြားခဲ့သည်။ [4] တပ်မတော်နှင့် စစ်ရေးတင်းမာနေသည့် KNU တပ်မဟာ(၅)၏ ပြောရေးဆိုခွင့်ရှိသူ ပဒိုမန်းမန်း ကလည်း ထိုအခြေအနေကို တွန်းပို့လာပါက တိုင်းရင်းသားလက်နက်ကိုင်များ၊ ပြည်သူများ၊ အနိုင်ရပါတီနှင့် အခြားပါတီများ နိုင်ငံရေးအရ ပူးပေါင်းခုခံရမည်ဟု ပြောကြားခဲ့သည်။

ဆက်စပ်သတင်းတရပ်အနေဖြင့် အစိုးရနှင့် တပ်မတော်အကြား နိုင်ငံရေးအကျပ်အတည်းကို ကျော်လွှားရန် ဇန်နဝါရီ ၂၈ ရက်က နေပြည်တော်တွင် နှစ်ဖက်တာဝန်ရှိသူအချို့အကြား တွေ့ဆုံဆွေးနွေးခဲ့သော်လည်း တိကျသောအဖြေရလဒ် မထွက်ပေါ်ခဲ့ကြောင်း သိရပါသည်။[5] ထိုတွေ့ဆုံမှုတွင် တပ်မတော်ဘက်က ရွေးကောက်ပွဲ ကော်မရှင်အပေါ် အယုံအကြည် မရှိခြင်း၊ မဲကွာဟမှုများ ဖြေရှင်းရန်နှင့် တတိယအကြိမ် လွှတ်တော်အစည်းအဝေး ကျင်းပခြင်းကို ယာယီရွှေ့ဆိုင်းရန် ဆွေးနွေးခဲ့ရာ ရှင်းလင်းသော အဖြေ မထွက်ခဲ့ ခြင်း ဖြစ်ပါသည်။

ထို့အပြင် တပ်မတော်က နိုင်ငံတဝန်းလုံး၌ နိုင်ငံတော်ကာကွယ်ရေးနှင့် အုပ်ချုပ်မှုဆိုင်ရာ ကိစ္စရပ်များမှအပ တပ်မတော်၏ စစ်ရေးဆိုင်ရာလှုပ်ရှားမှုများကို ဖေဖော်ဝါရီလကုန်ထိ ရပ်ဆိုင်းပေးမည် ဖြစ်ကြောင်း ဇန်နဝါရီ ၂၈ ရက်တွင် ထုတ်ပြန်ခဲ့သည်။[6] ယခင်ထုတ်ပြန်မှုများတွင် အပစ်ရပ်နယ်မြေသတ်မှတ်ရာ၌ “နိုင်ငံတော်မှ အကြမ်းဖက်အုပ်စုအဖြစ် သတ်မှတ်ကြေညာထားသော အကြမ်းဖက်အဖွဲ့ အစည်းများ ရှိသည့် နေရာများမှ အပ ကျန်နယ်မြေများတွင်”ဟု ဖော်ပြခဲ့သော်လည်း ယခုတကြိမ်တွင်မူ “မြန်မာနိုင်ငံတဝန်းလုံး ၌ နိုင်ငံတော်ကာကွယ်ရေးနှင့် အုပ်ချုပ်မှုဆိုင်ရာ ကိစ္စရပ်များမှ အပ”ဟု ပြောင်းလဲဖော်ပြခဲ့ပါသည်။

၂၀၂၁ ခုနှစ်  ဇန်နဝါရီ နောက်ဆုံးပတ်ကာလအတွင်း သက်ဆိုင်ရာ အင်အားစုအသီးသီးက ဆောင်ရွက်ခဲ့ကြသည့် ငြိမ်းချမ်းရေးကြိုးပမ်းမှုဖြစ်စဉ်များ၏ အပြည့်အစုံကို ယခု link တွင် ကြည့်နိုင်ပါသည်။

[1] ဧရာ၀တီ (ဇန်နဝါရီ ၂၈ ၊ ၂၀၂၁) “အစိုးရနှင့် မြောက်ပိုင်း ၄ဖွဲ့ တွေ့ဆုံရေး၊ နေရာညှိမရသေး”

https://burma.irrawaddy.com/news/2021/01/28/237255.html

[2] BBC Burmese ( ဇန်နဝါရီ ၂၇ ၊ ၂၀၂၁)  “အစိုးရ ငြိမ်းချမ်းရေးအဖွဲ့နဲ့ မြောက်ပိုင်းလက်နက်ကိုင် ၄ ဖွဲ့စလုံး တွေ့ဖို့ သဘောတူ”

https://bbc.in/2Ym3b9Y

[3] 7 Day Daily ( ဇန်နဝါရီ ၂၇၊ ၂၀၂၁)  “ရခိုင်ပြည်နယ်ငြိမ်းချမ်းရေးအတွက် ဆက်လက်ထိန်းသိမ်းဆောင်ရွက်ရန် နှစ်ဖက်စလုံးတွင် ဆန္ဒရှိဟု ဆို”

[4] 7 Day Daily ( ဇန်နဝါရီ ၂၉၊ ၂၀၂၁)  “အာဏာသိမ်းသည့် အခြေအနေမျိုး မလိုလားကြောင်း တိုင်းရင်းသား လက်နက်ကိုင်အဖွဲ့ တာဝန်ရှိသူအချို့ ပြော”

[5] ဧရာ၀တီ (ဇန်နဝါရီ ၂၈ ၊ ၂၀၂၁) “နိုင်ငံရေး အကျပ်အတည်း ကျော်ဖို့ အစိုးရနှင့် တပ်မတော် ဆွေးနွေးပေမယ့် အဖြေမထွက်”

https://burma.irrawaddy.com/news/2021/01/28/237261.html

[6] 7 Day Daily ( ဇန်နဝါရီ ၂၉၊ ၂၀၂၁)  “နိုင်ငံတော်ကာကွယ်ရေးနှင့် အုပ်ချုပ်မှုဆိုင်ရာ ကိစ္စရပ်များမှအပ စစ်ရေးဆိုင်ရာ လှုပ်ရှားမှုများ ဖေဖော်ဝါရီလကုန်အထိ ရပ်ဆိုင်း ထားမည်ဟု တပ်မတော်ထုတ်ပြန်”

The post ငြိမ်းချမ်းရေးကြိုးပမ်းမှုဖြစ်စဉ်များ (ဇန်နဝါရီ နောက်ဆုံးပတ်) appeared first on ISP Myanmar Peace Desk.

ရှမ်းပြည်နယ်တွင် တိုက်ပွဲဖြစ်ပွားမှု နည်းပါးခဲ့သော်လည်း ကျောက်မဲ၊ မူဆယ်မြို့နယ်များတွင် လက်နက်ကိုင်များ၏ ပစ်ခတ်မှုကြောင့် အရပ်သား ထိခိုက်မှုများ ရှိခဲ့ပါသည်။ ထို့အပြင် တပ်မတော်နှင့် KNU အကြား စစ်ရေးတင်းမာနေသည့် ကရင်ပြည်နယ်၊ ဖာပွန်မြို့နယ်တွင် နေအိမ်အချို့ မီးလောင်ပျက်စီးမှု ဖြစ်ပေါ်ခဲ့ပါသည်။

ရှမ်းပြည်နယ်အတွင်း တိုက်ပွဲဖြစ်ပွားမှု

ယခုရက်သတ္တပတ်အတွင်း ရှမ်းပြည်နယ်(တောင်ပိုင်း)တွင် တပ်မတော်နှင့် RCSS/SSA အဖွဲ့အကြား တိုက်ပွဲ တကြိမ်သာ ဖြစ်ပွားခဲ့သော်လည်း ရှမ်းပြည်နယ် (မြောက်ပိုင်း)တွင်မူ လက်နက်ကိုင်များ၏ ပစ်ခတ်မှုကြောင့် အရပ်သား ထိခိုက်မှုများ ရှိခဲ့ပါသည်။

ဇန်နဝါရီ ၂၅ ရက်တွင် ရှမ်းပြည်နယ်(တောင်ပိုင်း) မိုင်းပန်မြို့နယ်အတွင်းရှိ ရှမ်းပြည် ပြန်လည်ထူထောင်ရေးကောင်စီ (RCSS/SSA) တပ်စခန်းကို တပ်မတော်က ဝင်ရောက်တိုက်ခိုက်၍ တိုက်ပွဲဖြစ်ပွားခဲ့ပါသည်။ [1] တပ်မ တော်နှင့် RCSS အကြား ၂၀၂၀ နှစ်ကုန်ပိုင်းက ကျောက်မဲမြို့နယ်အတွင်း တိုက်ပွဲဖြစ်ပွားပြီးနောက် ယခုပြန် လည်ဖြစ်ပွားခဲ့ခြင်း ဖြစ်ကြောင်း RCSS ပြောရေးဆိုခွင့်ရှိသူဒုဗိုလ်မှူးကြီးအုမ်ခေး၏ ပြောကြားမှုအရ သိရပါ သည်။

ရှမ်းပြည်နယ်(မြောက်ပိုင်း) ကျောက်မဲမြို့ပေါ်တွင်လည်း ဇန်နဝါရီ ၂၅ ရက် ညပိုင်းက လက်နက်ကိုင်အချို့၏ ပစ်ခတ်မှုကြောင့် အရပ်သား နှစ်ဦး ထိခိုက်ဒဏ်ရာရခဲ့ပါသည်။ [2] ကျောက်မဲမြို့နယ်၊ ရပ်ကွက် (၈) ရှိ စားသောက်ဆိုင်တွင် လက်နက်ကိုင်လူနှစ်ဦးက သေနတ်ဖြင့် လာရောက်ပစ်ခတ်ခဲ့၍ ဆိုင်တွင် စကားပြောနေသည့် အမျိုးသားနှစ်ဦး ဒဏ်ရာရရှိခဲ့ခြင်း ဖြစ်ပါသည်။

အလားတူ မူဆယ်မြို့နယ် (၁၀၅) မိုင် အုပ်စု အောက်နမ့်ဟွမ်ကျေးရွာ ဘောလုံးကွင်းအနီးတွင်လည်း ဇန်နဝါရီ ၂၁ ရက် နံနက်ပိုင်းက မီးသွေးတင်ဆောင်လာသည့် ကားမှ ယာဉ်မောင်းတဦး သေနတ်ဖြင့် ပစ်ခတ်ခံခဲ့ရပါသည်။ [3] ထိုယာဉ်မောင်းကို အမည်မသိလက်နက်ကိုင်များက ဆိုင်ကယ်ဖြင့်လာပြီး ကားကို ရပ်ခိုင်းကာ ပေါင်ကို သေနတ်ဖြင့် ပစ်ခဲ့ခြင်း ဖြစ်ပါသည်။ ရှမ်းပြည်နယ်(မြောက်ပိုင်း)တွင် လက်နက်ကိုင်အဖွဲ့များက အရပ်သားများကို ဆက်ကြေး ကောက်ခံခြင်း၊ ကားသမားများ သေနတ်ဖြင့် ပစ်ခတ်ခံရခြင်းများ မကြာခဏ ဖြစ်ပွားလေ့ ရှိကြောင်း သိရပါသည်။

ထို့အပြင် သီပေါမြို့နယ် ကုန်းဆာကျေးရွာအုပ်ချုပ်ရေးမှူးမှာလည်း ရှမ်ပြည်တိုးတက်ရေးပါတီ (SSPP/SSA) က ဖမ်းဆီးခေါ်ဆောင်သွားခဲ့ပြီးနောက် သေဆုံးမှု ဖြစ်ပွားခဲ့ပါသည်။ [4] ထိုကျေးရွာအုပ်ချုပ်ရေးမှူးကို စစ်ဆေ ရန်ဟု ဆိုကာ SSPP/SSA အဖွဲ့က ဇန်နဝါရီ ၇ ရက်ကတည်းက ခေါ်ဆောင်ခဲ့ပြီးနောက် ပြန်မလာသဖြင့် ဒေသခံလူထုက လိုက်ရှာခဲ့ရာ ဇန်နဝါရီလ ၂၃ ရက်တွင်  သီပေါမြို့နယ် နားခေးရွာအနီး တောထဲတွင် အလောင်းကို တွေ့ရခြင်း ဖြစ်ပါသည်။

ရခိုင်ပြည်နယ်အတွင်း တိုက်ပွဲဖြစ်ပွားမှု

၂၀၂၀ ရွေးကောက်ပွဲကာလမှစ၍ တပ်မတော်နှင့် AA အဖွဲ့အကြား တိုက်ပွဲများ ရပ်တန့်နေခဲ့သည့် ရခိုင် ပြည်နယ်တွင် ဇန်နဝါရီ ၂၁ ရက်က မောင်တောမြို့နယ် အောင်သုခကျေးရွာမှ ရွာသားနှစ်ဦးကို လက်နက် ကိုင်အချို့က ဖမ်းဆီးရိုက်နှက်မှု ဖြစ်ပေါ်ခဲ့ပါသည်။

ထိုကျေးရွာသားနှစ်ဦးမှာ နေအိမ် ခြံစည်းရိုးကာရန် မေယုတောင်ကြောတွင် ဝါးသွားခုတ်ကြစဉ် လက်နက်ကိုင် အဖွဲ့နှင့် တွေ့ပြီး ဖမ်းဆီးရိုက်နှက်ခြင်း ခံခဲ့ရခြင်းဖြစ်ပါသည်။ [5] ထိုသို့ ရိုက်နှက်ခံရမှုကြောင့် ကျေးရွာသား နှစ်ဦးမှာ နံရိုးကျိုးခြင်း၊ လက်ကျိုးခြင်း စသည့် ပြင်းထန်ဒဏ်ရာများ ရရှိခဲ့ပြီး ဆေးရုံတက် ကုသမှု ခံယူနေရပါသည်။ ယခုဖြစ်စဉ်နှင့် ပတ်သက်၍ ARSA အဖွဲ့၏ လုပ်ရပ် ဖြစ်နိုင်ကြောင်း မောင်တောခရိုင် အုပ်ချုပ်ရေးမှူး ဦးစိုးအောင်က ထင်မြင်ချက်ပေးခဲ့ပါသည်။

တပ်မတော်နှင့် KNU တို့ တိုက်ပွဲဖြစ်ပွားမှု

ယခုရက်သတ္တပတ်တွင်လည်း တပ်မတော်နှင့် ကရင်အမျိုးသားအစည်းအရုံး (KNU)တို့အကြား စစ်ရေးတင်းမာနေသည့် ကရင်ပြည်နယ် ဖာပွန်မြို့နယ် မဲဝိုင်ကျေးရွာမှ နေအိမ်အချို့ မီးရှို့ဖျက်ဆီးခံခဲ့ရပါသည်။ [6] မဲဝိုင် ကျေးရွာမှ နေအိမ်အချို့ကို တပ်မတော်က ဇန်နဝါရီ ၂၄ ရက်ညပိုင်းတွင် မီးရှို့ဖျက်ဆီးခဲ့ကြောင်း KNU ဘက်မှ စွပ်စွဲပြောကြားခဲ့ပြီး တပ်မတော်ကမူ ငြင်းဆန်ခဲ့ပါသည်။

ကရင်ပြည်နယ်ဖာပွန်မြို့နယ်နှင့် ပဲခူးတိုင်း ကျောက်ကြီးမြို့နယ်တို့တွင် တပ်မတော်နှင့် KNU တို့၏ လက်နက်ကိုင်ပဋိပက္ခကြောင့် ဒေသခံအချို့ ထိခိုက်သေဆုံးမှုများ ရှိနေသကဲ့သို့ ထောင်နှင့်ချီ၍ နေရပ်စွန့်ခွာတိမ်းရှောင်နေရပါသည်။

၂၀၂၀ ပြည့်နှစ် ဇန်နဝါရီ စတုတ္ထပတ်အတွင်း ဖြစ်ပွားခဲ့သည့် တိုက်ပွဲသတင်းများ၏ အပြည့်အစုံကို ယခု link တွင် ကြည့်နိုင်ပါသည်။

[1] 7 Day Daily (ဇန်နဝါရီ ၂၆ ၊ ၂၀၂၁)  “မိုင်းပန်မြို့နယ်ရှိ တပ်စခန်းကို တပ်မတော်က ဝင်တိုက်၍ တိုက်ပွဲဖြစ်ဟု RCSS ပြော”

[2] မဇ္ဈိမ (ဇန်နဝါရီ ၂၆ ၊ ၂၀၂၁)  “ကျောက်မဲမြို့ရှိ စားသောက်ဆိုင်တွင် သေနတ်ပစ်ခတ်မှု ၂ ဦး ဒဏ်ရာရ”

http://www.mizzimaburmese.com/article/77781

[3] သျှမ်းသံတော်ဆင့် (ဇန်နဝါရီ ၂၂ ၊ ၂၀၂၁)  “မူဆယ်မြို့ မီးသွေးတင် ယာဉ်မောင်းတဦး သေနတ်ပစ်ခံရ”

https://bit.ly/2LZwBbu

[4] သျှမ်းသံတော်ဆင့် (ဇန်နဝါရီ ၂၅ ၊ ၂၀၂၁)  “သီပေါမြို့ကျေးရွာအုပ်ချုပ်ရေးမှူး သေဆုံးမှု ဆွေမျိုးများထံ တောင်းပန်ပြီးကြောင်း SSPP ပြော”

https://bit.ly/39lt287

[5] ဧရာ၀တီ (ဇန်နဝါရီ ၂၂ ၊ ၂၀၂၁)  “မောင်တောဒေသခံ ၂ ဦးကို ဖမ်းဆီးရိုက်နှက်သည့် အဖွဲ့မှာ ARSA ဖြစ်နိုင်ဟုဆို”

https://burma.irrawaddy.com/news/2021/01/22/236916.html

[6] VOA  (ဇန်နဝါရီ ၂၆ ၊ ၂၀၂၁)  “ကရင်ပြည်နယ်ဖာပွန်နယ် နေအိမ်တချို့ မီးလောင်မှု အပြန်အလှန်စွပ်စွဲ”

https://burmese.voanews.com/a/karen-conflict/5752061.html

The post တိုက်ပွဲဖြစ်ပွားမှုများ (ဇန်နဝါရီ စတုတ္ထပတ်) appeared first on ISP Myanmar Peace Desk.

အဆိုပါထုတ်ပြန်ချက်များတွင် တပ်မတော်မှ “၂၀၂၀ရွေးကောက်ပွဲ မဲစာရင်းများ စိစစ်တွေ့ရှိချက်နှင့် ပတ်သက်၍ သတင်းထုတ်ပြန်ချက် ခုနစ်ခု” အပါအဝင် ထုတ်ပြန်ချက် ၁၅ ခုအထိ ထုတ်ပြန်ခဲ့ပါသည်။ ထို့အပြင် ပါတီများမှ ခုနစ်ခု၊ တိုင်းရင်းသားလက်နက်ကိုင်အဖွဲ့ များနှင့် အရပ်ဘက် အဖွဲ့အစည်းများမှ နှစ်ခုစီ အသီးသီး ထုတ်ပြန်ခဲ့ကြရာ သတိပြု အာရုံစိုက်ရမည့် ထုတ်ပြန်ချက်အချို့ကို ISP-Myanmar Peace Desk က အနှစ်ချုပ် ဖော်ပြထားပါသည်။

တပ်မတော်၏ ထုတ်ပြန်ချက်များ

၂၀၂၀ ရွေးကောက်ပွဲ မဲစာရင်းများ စိစစ်တွေ့ရှိချက်နှင့် ပတ်သက်၍ တပ်မတော် သတင်းမှန်ပြန်ကြားရေးအဖွဲ့က ၂၀၂၁ ခုနှစ် ဇန်နဝါရီ ၁၉ ရက်မှ ၂၅ ရက်အထိ ကာလအတွင်း သတင်းထုတ်ပြန်ချက် ခုနစ်ခုအထိ ထွက်ရှိခဲ့ပါသည်။

ထို့အပြင် တပ်မတော်မှ “၂၀၂၀ အထွေထွေရွေးကောက်ပွဲမဲရလဒ်နှင့် ပတ်သက်၍ သတင်းထုတ်ပြန်ချက်” ကို ဇန်နဝါရီ ၂၀ ရက်စွဲဖြင့် ထုတ်ပြန်ခဲ့ ပါသည်။

အဆိုပါထုတ်ပြန်ချက်တွင် “ တပ်မတော်အပါအဝင် အခြားသော နိုင်ငံရေး ပါတီများအနေဖြင့် လွတ်လပ်၍ တရားမျှတပြီး ပွင့်လင်းမြင်သာသည့် ရွေးကောက်ပွဲရလဒ်ဖြစ်ကြောင်း ထုတ်ဖော်ပြသနိုင်မည်ဆိုလျှင် ပြည်သူ့ဆန္ဒ အစစ်အမှန်ကို ထင်ဟပ်မည်ဖြစ်၍ ပြည်သူ့ဆန္ဒနှင့်အညီ လက်ခံသွားမည်သာ ဖြစ်ကြောင်းနှင့် နိုင်ငံတော်နှင့်နိုင်ငံသားများ၏ အကျိုးစီးပွားကိုရှေးရှု၍ နိုင်ငံရေးအကျပ်အတည်းကို ကျော်လွှားနိုင်စေရန် ပြည်ထောင်စုလွှတ်တော်၊ နိုင်ငံတော်အစိုးရနှင့် ပြည်ထောင်စုရွေးကောက်ပွဲကော်မရှင်တို့က နည်းလမ်းရှာ ဖြေရှင်းပေးပါရန် သဘောထားထုတ်ပြန်ကြောင်း” ဖော်ပြခဲ့ပါသည်။

ယင်းနောက် တပ်မတော်မှ “ ကျောက်ကြီးမြို့နယ်အတွင်း KNU တပ်မဟာ(၅)အဖွဲ့၏ ပစ်ခတ်မှုကြောင့် အပြစ်မဲ့ပြည်သူ နှစ်ဦး သေဆုံးခဲ့ကြောင်း” ဇန်နဝါရီ ၁၉ ရက်စွဲဖြင့် သတင်းထုတ်ပြန်ခဲ့ပါသည်။

အဆိုပါထုတ်ပြန်ချက်အရ “ KNU တပ်မဟာ(၅)အနေဖြင့် ယခုကဲ့သို့ အပြစ်မဲ့ ပြည်သူများအား ပစ်ခတ်သတ်ဖြတ်မှုသည် NCA စာချုပ်ပါ ပစ်ခတ်တိုက်ခိုက်မှု ရပ်စဲရေးဆိုင်ရာ စည်းမျဉ်းစည်းကမ်းများနှင့် စစ်ဘက်ဆိုင်ရာ ကျင့်ဝတ်များ၊ Code of Conduct အခန်း(၃)ပါ ပြဌာန်းချက်များကို ချိုးဖောက်ခဲ့ကြောင်း တွေ့ရှိရသဖြင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ(ပြည်နယ်အဆင့်)နှင့် အမျိုးသား ပြန်လည်သင့်မြတ်ရေးနှင့် ငြိမ်းချမ်းရေး ဗဟိုဌာန (NRPC) သို့ ကန့်ကွက်အကြောင်းကြားသွားမည် ဖြစ်ကြောင်း”သိရပါသည်။

တိုင်းရင်းသားလက်နက်ကိုင်အဖွဲ့များ၏ ထုတ်ပြန်ချက်များ

ဇန်နဝါရီ ပထမပတ်အတွင်း ရှမ်းပြည်ပြန်လည်ထူထောင်ရေးကောင်စီ (RCSS/ SSA)နှင့် မိုင်းလားအဖွဲ့ (NDAA)တို့မှ ထုတ်ပြန်ကြေညာချက် တခုစီ ထွက်ရှိခဲ့ပါ သည်။

ရှမ်းပြည်ပြန်လည်ထူထောင်ရေးကောင်စီ (RCSS/ SSA)မှ “သျှမ်းပြည်မြောက်ပိုင်း သီပေါမြို့နယ်၊ ကုန်းသာကျေးရွာ အုပ်ချုပ်ရေးမှူးသတ်ဖြတ်ခံရခြင်းနှင့် ပတ်သက်၍ ဝမ်းနည်းကြောင်း” ကို ဇန်နဝါရီ ၂၅ ရက်စွဲဖြင့် ထုတ်ပြန်ကြေညာခဲ့ပါသည်။

အဆိုပါထုတ်ပြန်ချက်တွင် “သီပေါမြို့နယ်၊ ကုန်းသာကျေးရွာ အုပ်ချုပ်ရေးမှူးကို ရှမ်းပြည်တိုးတက်ရေးပါတီ (SSPP/SSA) တပ်ဖွဲ့ဝင်များက ဖမ်းဆီးခေါ်ဆောင် သွားပြီးသည့်နောက် သတ်ဖြတ်ခံရကြောင်း ကြားသိရ၍ မိသားစုများနှင့်ထပ်တူ လွန်စွာဝမ်းနည်းမိကြောင်း” ဖော်ပြခဲ့ပါသည်။

ယင်းနောက် “ တော်လှန်ရေးလုပ်ခြင်းသည် တနည်းအားဖြင့် ပြည်သူလူထု၏ ကောင်းကျိုးကို ဆောင်ရွက်ခြင်း ဖြစ်သောကြောင့် အပြစ်မဲ့ပြည်သူလူထုကို သတ်ဖြတ်ခြင်းသည် တော်လှန်ရေးရည်မှန်းချက်နှင့် ဆန့်ကျင်ခြင်း” ဖြစ်ကြောင်း” RCSS/ SSA၏ ထုတ်ပြန်မှုတွင် ပါရှိပါသည်။

မိုင်းလားအဖွဲ့ (NDAA)မှ ဇန်နဝါရီ ၂၀ ရက်စွဲဖြင့် “မိုင်းလားဒေသတွင်း အသွားအလာကန့်သတ်မှုအား စနစ်တကျ ဖြေလျော့ရေးဆိုင်ရာ အသိပေးအကြောင်းကြားခြင်းနှင့် ပတ်သက်၍ ထုတ်ပြန်ချက်” ထွက်ရှိခဲ့ပါသည်။

ပါတီများ၏ထုတ်ပြန်ချက်များ

၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုများနှင့် ပတ်သက်၍ ချင်းအမျိုးသားဒီမိုကရေစီအဖွဲ့ချုပ်ပါတီ (CNLD)၊ ကရင်ပြည်သူ့ပါတီ (KPP)၊ ရှမ်းတိုင်းရင်းသားများ ဒီမိုကရက်တစ်ပါတီ(SNDP)နှင့် ကရင်အမျိုးသား ဒီမိုကရက်တစ်ပါတီ(KNDP)တို့မှ ထုတ်ပြန်ချက်များ အသီးသီး ထုတ်ပြန်ခဲ့ကြပါသည်။

ချင်းအမျိုးသားဒီမိုကရေစီအဖွဲ့ချုပ်(CNLD)ပါတီမှ “နောင်အနာဂတ်တွင် တာ၀န်ယူ၊ တာ၀န်ခံမူရှိသော ရွေးကောက်ပွဲဖော်ဆောင်နိုင်ရန်နှင့် ပတ်သက်၍ သဘောထားထုတ်ပြန်ချက်” ကို ဇန်နဝါရီ ၂၅ ရက်စွဲဖြင့် ထုတ်ပြန်ခဲ့ပါသည်။

ထိုထုတ်ပြန်ချက်တွင် “ ၂၀၂၀ ရွေးကောက်ပွဲရလဒ်နှင့် စပ်လျဉ်း၍ ပါတီများမှ အငြင်းပွားစရာ၊ မဲမသမာမှုများရှိကြောင်း ထောက်ပြဝေဖန်မှုများ ရှိခဲ့ပြီး ပြည်သူများအကြား သဘောထားကွဲလွဲမှု ရှိနေသည်ကို ကြားရကြောင်း၊ မဲရလဒ်များကြောင့် ပြည်သူများ ဒွိဟဖြစ်နေသည့်အပေါ် မလိုလားအပ်သောနိုင်ငံရေး ပြဿနာများ ပေါ်ပေါက်လာနိုင်မှုအပေါ် စိုးရိမ်မကင်းဖြစ်ကြောင်းနှင့် နောင်အနာဂတ်တွင် တာ၀န်ယူ၊ တာ၀န်ခံမူရှိသော ရွေးကောက်ပွဲဖော်ဆောင်နိုင်ရန် သဘောထားထုတ်ပြန်ကြောင်း” ဖော်ပြထားပါသည်။

ကရင်ပြည်သူ့ပါတီ (KPP)ကလည်း ဇန်နဝါရီ ၂၄ ရက်စွဲဖြင့် “ ၂၀၂၀ အထွေထွေ ရွေးကောက်ပွဲအလွန်တွင် ဖြစ်ပေါ်လာသော အငြင်းပွားမှုများနှင့် ပတ်သက်၍ ထုတ်ပြန်ချက်” တခု ထွက်ရှိခဲ့ပါသည်။

အဆိုပါထုတ်ပြန်ချက်တွင် “ ကရင်ပြည်နယ်တွင် မဲမသမာမှုဟု တွေ့ရှိရသော မဲရာခိုင်နှုန်း ၃၂ ရာခိုင်နှုန်းကျော်ရှိသည်ဟုလည်း ကြားသိရပြီး ဤသတင်းအချက်အလက်များသည် တရားဥပဒေအရ ပြန်လည်စစ်ဆေးထုတ်ပြန်နိုင်မှု မရှိသေးသ၍ အတည်ပြုနိုင်သောသတင်းဟု မယူဆနိုင်သကဲ့သို့ မဟုတ်မမှန်သော သတင်းဟူ၍လည်း သတ်မှတ်လက်ခံကြရန် ခက်ခဲနေကြောင်း” ဖော်ပြခဲ့ပါသည်။

ယင်းနောက်” မိမိတို့ပါတီသည် တိုင်းပြည်၏ စည်းလုံးညွတ်မှုနှင့် တည်ငြိမ်သောအနာဂတ်၊ တည်ဆောက်ဆဲဖြစ်သော ငြိမ်းချမ်းရေးအတွက်အ ထောက်အကူဖြစ်စေရန် ရှေးရှုလျက် နိုင်ငံတော်အစိုးရအနေဖြင့် မဲစာရင်းနှင့် ပတ်သက်သော အငြင်းပွားမှုများကို ဦးစားပေးအရေးယူဆောင်ရွက်ပေးသင့်ပါကြောင်း” ကရင်ပြည်သူ့ပါတီ (KPP)၏ ထုတ်ပြန်မှုတွင်ပါရှိပါသည်။

ထို့အပြင် ရှမ်းတိုင်းရင်းသားများ ဒီမိုကရက်တစ်ပါတီ(SNDP)ကလည်း ဇန်နဝါရီ ၂၄ ရက်စွဲဖြင့် “ရွေးကောက်ပွဲတွင် မဲမသမာမှုများ ရှိ​သော​ကြောင့် အဆိုပါကိစ္စရပ် တွေကို ဖြေရှင်းပြီးမှ လွှတ်တော်ခေါ်ယူရန် သဘောထားထုတ်ပြန်ချက်” တခုထွက်ရှိခဲ့ပါသည်။

အဆိုပါထုတ်ပြန်ချက်တွင် “၂၀၂၀အထွေထွေရွေးကောက်ပွဲနှင့်ပတ်သက်ပြီး လွတ်လပ်၍ တရားမျှတသော အထွေထွေရွေးကောက်ပွဲကို ဖော်ဆောင်နိုင်ခဲ့ခြင်း မရှိဟု စိတ်မကောင်းဖွယ်ရာအခင်းအကျင်းကို မြင်တွေ့ရကြောင်း၊ ရွေးကောက်ပွဲ ပြီးမြောက်၍ မဲရလဒ်ကြေညာရာတွင် မဲပေးနိုင်သော ဦးရေထက် မဲအရေအတွက် သန်းချီပို၍ပေးထားသည့် မဲမသမာမှုများရှိသည်ဟုဆိုကာ အမှုပေါင်းများစွာ တင်ပြတိုင်ကြားမှုများလည်း ရှိနေသည်ဟု သိရှိရကြောင်းနှင့် အဆိုပါကိစ္စရပ်များကို ဖြေရှင်းပြီးမှသာလျှင် လွှတ်တော်ခေါ်ယူရေးလုပ်ငန်းစဉ်အား ဆက်လက်ဆောင်ရွက်သင့်ကြောင်း” ဖော်ပြထားပါသည်။

ကရင်အမျိုးသားဒီမိုကရက်တစ်ပါတီ(KNDP)ကလည်း ဇန်နဝါရီ ၂၁ ရက်စွဲဖြင့် သဘောထားထုတ်ပြန်ချက် ထွက်ရှိခဲ့ရာ “၂၀၂၀ ရွေးကောက်ပွဲနှင့်ပတ်သက်၍ တပ်မတော်၏ စိစစ်တွေ့ရှိချက်တွင် ကရင်ပြည်နယ်မှာ ပြည်နယ်နှင့် တိုင်းအားလုံးတွင် မဲမသမာမှုအများဆုံး ဖြစ်ကြောင်း တွေ့ရှိရပြီး ပြည်နယ်အတွင်း မဲဆန္ဒရှင်ပြည်သူ များက ဖြစ်စဉ်အမှန်ကို ခိုင်လုံသော အထောက်အထားများဖြင့် သိရှိခွင့်ရရှိ နိုင်ရေးအတွက် တာဝန်ရှိအဖွဲ့အစည်းများမှ ပွင့်လင်းမြင်သာစွာ ရှင်းလင်းပေးပါရန် တင်ပြတောင်းဆိုကြောင်း” ဖော်ပြခဲ့ပါသည်။

တပ်မတော်နှင့် KNU အကြား စစ်ရေးတင်းမာမှုများနှင့် ပတ်သက်၍ ကရင်ပါတီများက ထုတ်ပြန်ချက်များ ထုတ်ပြန်ခဲ့ကြပါသည်။

“ကရင်ပြည်နယ်၊ ဖာပွန်ဒေသနှင့် ပဲခူးတိုင်းဒေသကြီး၊ ကျောက်ကြီးဒေသများတွင် ဖြစ်ပွားခဲ့သော ပစ်ခတ်တိုက်ခိုက်မှုများနှင့် ပတ်သက်၍ သဘောထား ထုတ်ပြန်ချက်” ကို ကရင်ပြည်သူ့ပါတီ (KPP)မှ ဇန်နဝါရီ ၂၁ ရက်စွဲဖြင့် ထွက်ရှိခဲ့ပါသည်။

အဆိုပါထုတ်ပြန်ချက်တွင် “ ထိုဒေသများတွင် ဖြစ်ပွားခဲ့သော ပစ်ခတ်တိုက်ခိုက် ခြင်းများကြောင့် ဒေသခံပြည်သူလူထုများ ထွက်ပြေးတိမ်းရှောင်နေရကြောင်းနှင့် နိုင်ငံဖွံ့ဖြိုးတိုးတက်ရေးအတွက် အဓိကလိုအပ်သော ငြိမ်းချမ်းရေးကို ရရှိရန် ရည်စူးလျက် အစိုးရ၊ တပ်နှင့် KNU အဖွဲ့တို့မှ ဆုံးဖြတ်ပိုင်ခွင့်ရှိသော အဆင့်မြင့် ခေါင်းဆောင်များအနေဖြင့် အမြန်ဆုံးတွေ့ဆုံညှိနှိုင်း အဖြေရှာပေးပါရန် အကြံပြုကြောင်း” ဖော်ပြထားပါသည်။

ထို့အပြင် ကရင်အမျိုးသားပါတီမှ “ကရင်ပြည်နယ်နှင့် ပဲခူးတိုင်းဒေသကြီး အတွင်း ဖြစ်ပေါ်နေသည့် စစ်ရေးတင်းမာမှုအပေါ် သဘောထားထုတ်ပြန် ကြေညာချက်”ကို ဇန်နဝါရီ ၂၃ ရက်စွဲဖြင့် ထုတ်ပြန်ခဲ့ပါသည်။

အဆိုပါထုတ်ပြန်ချက်တွင် “ စစ်ရေးတင်းမာမှုများကြောင့် ဒေသခံများ အသက်၊ စည်းစိမ်၊ အိုးအိမ်များ ထိခိုက်ပျက်စီးပြီး ရာသီဥတုဆိုးရွားမှုနှင့် ကိုဗစ်- ၁၉ ကပ်ရောဂါကျရောက်မှုကာလတွင် အကာအကွယ်မဲ့စွာ အိုးအိမ်စွန့်ခွာထွက်ပြေးတိမ်းရှောင်ကြရခြင်းများကို တွေ့ရှိနေရကြောင်း” ဖော်ပြခဲ့ပါသည်။

ဆက်လက်ပြီး “ အစိုးရ၊ တပ်မတော်၊ နိုင်ငံရေးပါတီများနှင့် တိုင်းရင်းသားလက်နက်ကိုင်အဖွဲ့များ လက်မှတ်ရေးထိုးခဲ့ကြသည့် NCA ပါ ပြဌာန်းချက်များ တွင် ကိုယ်တိုင် လိုက်နာမှုရှိခြင်း၊ မရှိခြင်းနှင့် NCA အချက်များတွင် မည်သည့် အားနည်းချက်များရှိသည်ကို သုံးသပ်ပြီး ခိုင်မာသည့် စာချုပ်တရပ်ဖြစ်ရေးကို ပြန်လည်ညှိနှိုင်းကြရန် တိုက်တွန်းတောင်းဆိုကြောင်း” ကရင်အမျိုးသားပါတီ၏ ထုတ်ပြန်မှုတွင် ဖော်ပြထားပါသည်။

အရပ်ဘက်အဖွဲ့အစည်းများ၏ ထုတ်ပြန်ချက်များ

“ကျောက်မဲမြို့နယ်၊ တောင်ပလို့ကျေးရွာနေ အမျိုးသားတဦးကို ရှမ်းပြည် ပြန်လည်ထူထောင်ရေးကောင်စီ (RCSS/ SSA) အဖွဲ့မှ ဖမ်းဆီးသွားခြင်းနှင့် ပတ်သက်၍ အမြန်ဆုံး ပြန်လည်လွှတ်ပေးပါရန် တောင်းဆိုကြောင်း” ပလောင်လက်ဖက် စိုက်ပျိုးထုတ်လုပ်ရောင်းချသူများအသင်းမှ ဇန်နဝါရီ ၂၅ ရက်စွဲဖြင့် သဘောထားထုတ်ပြန်ချက် တခု ထုတ်ပြန်ခဲ့ပါသည်။

ထို့အပြင် အရပ်ဘက်အဖွဲ့အစည်းများမှ ဇန်နဝါရီ ၂၀ ရက်စွဲဖြင့် “ ကရင်ပြည်နယ်၊ အပစ်ရပ်နယ်မြေအတွင်း လတ်တလောဖြစ်ပွားနေသော တင်းမာမှုနှင့် ပဋိပက္ခစစ်ပွဲများ၊ စစ်ဘေးဒဏ် ခံနေရသော ဒေသခံပြည်သူလူထုများနှင့် ပတ်သက်၍ နိုင်ငံတော်သမ္မတ ဦးဝင်းမြင့်နှင့် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ထံသို့ အိတ်ဖွင့်ပေးစာ” တစောင် ပေးပို့ခဲ့ပါသည်။

အဆိုပါအိတ်ဖွင့်ပေးစာတွင် “မြန်မာနိုင်ငံအတွင်း ဖြစ်ပွားနေသော လက်နက်ကိုင်ပဋိပက္ခများနှင့် ၎င်း၏အကြောင်းရင်းခံများသည် နိုင်ငံရေးပြဿနာများဖြစ်သောကြောင့် နိုင်ငံရေးနည်းလမ်းဖြင့်သာ အဖြေရှာသင့်သည်ဟု ယုံကြည်ကြောင်း၊ နိုင်ငံရေးနည်းလမ်းဖြင့် အဖြေရှာနိုင်ရန်အတွက် နိုင်ငံရေးအရ ဖြေရှင်းနိုင်မည့် အခွင့်အလမ်းများနှင့် နည်းလမ်းများ ဖော်ဆောင်ပေးရန်နှင့် တိုင်းရင်းသားဒေသများအား စစ်ဆင်ရေးများပြုလုပ်ခြင်း၊ အင်အားတိုးချဲ့နေရာယူခြင်းများအားလုံး ရုပ်သိမ်းရပ်တန့်စေရေးတို့အား အမြန်ဆုံး အကောင်အထည်ဖော်ဆောင်ရွက်ပေးပါရန် တိုက်တွန်းတောင်းဆိုကြောင်း” ဖော်ပြထားပါသည်။

၂၀၂၁ ခုနှစ် ဇန်နဝါရီစတုတ္ထပတ်အတွင်း ထွက်ရှိခဲ့သော ထုတ်ပြန်ချက်များ၏ အပြည့်အစုံကို ယခု link တွင် ကြည့်နိုင်ပါသည်။

The post ထုတ်ပြန်ကြေညာချက်များ (ဇန်နဝါရီ စတုတ္ထပတ်) appeared first on ISP Myanmar Peace Desk.

ထို့အပြင် တပ်မတော်နှင့် KNU တို့အကြား တိုက်ပွဲများအတွင်း အရပ်သားထိခိုက်သေဆုံးမှုများနှင့် ပတ်သက်၍ နှစ်ဖက် စွပ်စွဲနေကြခြင်း၊ စစ်ရေးတင်းမာနေသည့် RCSS နှင့် TNLA တို့ တွေ့ဆုံရန် အပြန်အလှန် ကမ်းလှမ်းမှု မရှိ‌သေးခြင်းစသည့်သတင်းများလည်း ရှိနေပါသည်။

NCA လက်မှတ် မထိုးရသေးသောအဖွဲ့များ၏ ဆောင်ရွက်မှု

အစိုးရနှင့် မြောက်ပိုင်းလက်နက်ကိုင်လေးဖွဲ့ဖြစ်သော KIO/KIA ၊ PSLF/TNLA ၊ MNTJP/MNDAA၊ ULA/AA တို့၏ အပစ်အခတ်ရပ်စဲရေးဆွေးနွေးပွဲကို ယခုလအတွင်း ပြုလုပ်မည်ဖြစ်ကြောင်း သိရပါသည်။ [1] ထိုဆွေးနွေးပွဲကို ယခုလအတွင်း ပြုလုပ်ရန် သေချာပြီး တွေ့ဆုံမည့်နေရာနှင့် အချိန်ကို ညှိနှိုင်းနေဆဲဖြစ်သည်ဟု ဆွေးနွေး ပွဲ ဖြစ်မြောက်ရေး ကူညီပေးနေသော ကချင်ငြိမ်းချမ်းရေးအကျိုးဆောင်အဖွဲ့(PCG)မှ ဦးလမိုင်ဂွန်ဂျာက ပြောကြားခဲ့သည်။

အစိုးရက အပစ်အခတ်ရပ်စဲရေး ဆွေးနွေးပွဲကို ကျိုင်းတုံ (သို့မဟုတ်) မြစ်ကြီးနား၌ ကျင်းပရန် အဆိုပြုထားသော်လည်း မြောက်ပိုင်းလက်နက်ကိုင်လေးဖွဲ့က တရုတ်နိုင်ငံတွင် ကျင်းပလိုကြောင်း သဘောထားပေးလာ၍ ညှိနှိုင်းနေရခြင်း ဖြစ်ပါသည်။ [2] မြောက်ပိုင်းလေးဖွဲ့နှင့် ဆွေးနွေးညှိနှိုင်းရာတွင် ပဏာမ အပစ်ရပ်စဲရေး ဆောင်ရွက်ရန်၊ တဖွဲ့ချင်းစီနှင့် Bilateral အပစ်ရပ်စဲရေးစာချုပ် ချုပ်ဆိုရန်၊ NCA လက်မှတ်ထိုးနိုင်ရေး ဆောင်ရွက်ရန် အဆင့်သုံးဆင့်ကို အဆင့်လိုက်လုပ်ဆောင်သွားမည်ဟု အစိုးရဘက်က ပြောကြားထားသည်။

နောက်ထပ်သတင်းတပုဒ်မှာ စစ်ရေးတင်းမာနေသည့် ရှမ်းပြည်ပြန်လည်ထူထောင်ရေးကောင်စီ (RCSS/SSA) နှင့် တအာင်းလက်နက်ကိုင်အဖွဲ့ (PSLF/TNLA) တို့ တွေ့ဆုံရန် အဆင်သင့်ဖြစ်နေသော်လည်း အပြန်အလှန် ကမ်းလှမ်းမှု မရှိ‌ကြသေးခြင်း ဖြစ်ပါသည်။ [3] RCSS နှင့်  TNLA တို့သည် ဒီဇင်ဘာလမှစ၍ ရှမ်းပြည်နယ် (မြောက်ပိုင်း) နမ္မတူနှင့် ကျောက်မဲမြို့နယ်တို့အတွင်း တိုက်ပွဲများ ပြင်းထန်ခဲ့ခြင်းကြောင့် အရပ်သားအချို့ ထိခိုက်သေဆုံးခဲ့ပြီး စစ်ရှောင် ၄၀၀၀ ခန့် ရှိနေပါသည်။ ထို့အတွက် နှစ်ဖက်တွေ့ဆုံဆွေးနွေးရန် ရှမ်းလူထုက တောင်းဆိုနေကြသော်လည်း ယခုအချိန်အထိ တဖက်နှင့် တဖက် ကမ်းလှမ်းမှု မရှိကြသေးကြောင်း သိရပါသည်။

NCA လက်မှတ်ထိုးထားသည့်အဖွဲ့များ၏ ဆောင်ရွက်မှု

တပ်မတော်နှင့် ကရင်အမျိုးသားအစည်းအရုံး (KNU)တို့အကြား တိုက်ပွဲများအတွင်း အရပ်သား ထိခိုက်သေဆုံးမှုများနှင့် ပတ်သက်၍ နှစ်ဖက်အပြန်အလှန်စွပ်စွဲနေကြပါသည်။

ဇန်နဝါရီ ၁၅ ရက်က ကရင်ပြည်နယ် မဲဝိုင်ဒေသ၌ ကလေးငယ်တဦး ကျည်ထိမှန် ဒဏ်ရာရရှိခဲ့ခြင်းနှင့် ပတ်သက်၍ တပ်မတော်နှင့် KNU တပ်မဟာ (၅) တို့က ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC) သို့ အပြန်အလှန် ကန့်ကွက်အကြောင်းကြားခဲ့ကြသည်။ [4]

ထို့အပြင် ဇန်နဝါရီ ၁၉ ရက်က ပဲခူးတိုင်းဒေသကြီး ကျောက်ကြီးမြို့နယ်တွင်  KNU တပ်မဟာ(၅) တပ်ဖွဲ့ဝင်များက ပစ်ခတ်၍ အရပ်သားနှစ်ဦး သေဆုံးခဲ့ကြောင်း တပ်မတော်က သတင်းထုတ်ပြန်ခဲ့သည်။ ထိုဖြစ်ရပ်မှာ NCA စာချုပ်ပါ ပြဋ္ဌာန်းချက်များကို ချိုးဖောက်ခြင်း ဖြစ်၍ JMC-S နှင့်  NRPC သို့ ကန့်ကွက်အကြောင်းကြားမည်ဟု တပ်မတော်၏ ထုတ်ပြန်မှုတွင် ဖော်ပြထားသည်။ [5]

ထိုကဲ့သို့ တပ်မတော်နှင့် KNU တပ်မဟာအချို့အကြား လမ်းဖောက်လုပ်မှုကတဆင့် တိုက်ပွဲများ ဆက်တိုက် ဖြစ်ပွားနေသည့်အတွက် နှစ်ဖက်တွေ့ဆုံဆွေးနွေးရန် လိုအပ်နေပြီဖြစ်ကြောင်း KNU ဘက်က မှတ်ချက်ပြုခဲ့သည်။ KNU တပ်မဟာ (၅) ပြောရေးဆိုခွင့်ရှိသူ ပဒိုမန်းမန်းက NCA စာချုပ်ကို  ပြန်လည်သုံးသပ်ပြီး ခိုင်မာသည့် အပစ်အခတ်ရပ်စဲရေးကို သွားရန် လိုအပ်နေပြီဟု ပြောကြားခဲ့သည်။ [6]

ထို့အပြင် NCA လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့အစည်းများ၏  (၃၆) ကြိမ်မြောက် ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC) အစည်းအဝေးကို ဇန်နဝါရီလ ၁၈ ရက်က အွန်လိုင်းမှ ပြုလုပ်ခဲ့ပါသည်။ [7]

ထိုအစည်းအဝေးတွင် ငြိမ်းချမ်းရေးလုပ်ငန်းစဉ်များ ဆက်လက်ဆောင်ရွက်ရန် အစိုးရနှင့် ဆွေးနွေးပွဲ ကျင်းပနိုင်ရေး ညှိနှိုင်းခဲ့ပြီး ငြိမ်းချမ်းရေး ရှေ့လုပ်ငန်းစဉ်နှင့် ပတ်သက်သည့် တဖွဲ့ချင်းစီ သဘောထားများကို ဘုံသဘောထားရရှိအောင် ညှိနှိုင်းခဲ့ကြောင်း ရခိုင်ပြည်လွတ်မြောက်ရေးပါတီ (ALP/ALA) ဗဟိုအလုပ်အမှုဆောင် ဒေါ်စောမြရာဇာလင်း၏ ပြောကြားမှုအရ သိရပါသည်။ [8]

၂၀၂၁ ခုနှစ်  ဇန်နဝါရီ တတိယပတ်ကာလအတွင်း သက်ဆိုင်ရာ အင်အားစုအသီးသီးက ဆောင်ရွက်ခဲ့ကြသည့် ငြိမ်းချမ်းရေးကြိုးပမ်းမှုဖြစ်စဉ်များ၏ အပြည့်အစုံကို ယခု link တွင် ကြည့်နိုင်ပါသည်။

[1] မြန်မာတိုင်းမ် (ဇန်နဝါရီ ၂၀ ၊ ၂၀၂၁) “အစိုးရနှင့် မြောက်ပိုင်းမဟာမိတ်လေးဖွဲ့တို့ ယခုလအတွင်း တွေ့ဆုံဆွေးနွေးမည်”

https://myanmar.mmtimes.com/news/150124.html

[2] 7 Day Daily ( ဇန်နဝါရီ ၂၁ ၊ ၂၀၂၁)  “အစိုးရနှင့် အပစ်ရပ်စဲရေးဆွေးနွေးပွဲကို  တရုတ်နိုင်ငံတွင် ကျင်းပရန် မြောက်ပိုင်းလေးဖွဲ့ လိုလား”

[3] သျှမ်းသံတော်ဆင့် ( ဇန်နဝါရီ ၂၁ ၊ ၂၀၂၁)  “တိုင်းရင်းသား လက်နက်ကိုင် ၂ ဖွဲ့ တွေ့ဆုံရန် ကမ်းလှမ်းမှု မရှိသေး”

https://bit.ly/3ob2vi2

[4] 7 Day Daily ( ဇန်နဝါရီ ၁၈ ၊ ၂၀၂၁)  “ကလေးငယ်တစ်ဦး ကျည်ထိမှန်ဒဏ်ရာရသည့်ကိစ္စ တပ်မတော်နှင့် KNU အပစ်ရပ် ပူးတွဲစောင့်ကြည့် ကော်မတီသို့ အပြန်အလှန် ကန့်ကွက်”

[5] 7 Day Daily ( ဇန်နဝါရီ ၂၀ ၊ ၂၀၂၁)  “KNU တပ်မဟာ(၅)အဖွဲ့ပစ်ခတ်၍ အရပ်သား နှစ်ဦးသေဆုံးဟု တပ်မတော်ထုတ်ပြန်၊ အရပ်သားကို ပစ်ခတ်ခြင်းကြောင့် JMC နှင့် NRPC သို့ အကြောင်းကြားမည်ဟု ဆို”

[6] BBC Burmese ( ဇန်နဝါရီ ၁၉ ၊ ၂၀၂၁)  “တိုက်ပွဲတွေ မရပ်လို့ ကေအန်ယူနဲ့ တပ်မတော် တွေ့ဆုံ ဆွေးနွေးဖို့ လိုနေပြီလို့ ကေအန်ယူ ပြော”

https://www.bbc.com/burmese/burma-55723916

[7] DVB ( ဇန်နဝါရီ ၁၈ ၊ ၂၀၂၁)  “၃၆ ကြိမ်မြောက် UPDJC အစည်းအဝေး ကျင်းပ”

http://burmese.dvb.no/archives/435085

[8] 7 Day Daily ( ဇန်နဝါရီ ၁၉ ၊ ၂၀၂၁)  “အစိုးရနှင့် ဆွေးနွေးပွဲကျင်းပရေး NCA လက်မှတ်ထိုး တိုင်းရင်းသားလက်နက်ကိုင်အဖွဲ့များ ညှိနှိုင်း”

The post ငြိမ်းချမ်းရေးကြိုးပမ်းမှုဖြစ်စဉ်များ (ဇန်နဝါရီ တတိယပတ်) appeared first on ISP Myanmar Peace Desk.

ပဲခူးတိုင်း ကျောက်ကြီးမြို့နယ်နှင့် ကရင်ပြည်နယ် ဖာပွန်မြို့နယ်တို့တွင် တပ်မတော်နှင့် KNU တပ်မဟာများအကြား စစ်ရေးတင်းမာနေပြီး နှစ်ဖက်ပစ်ခတ်မှုများအတွင်း အရပ်သားထိခိုက်သေဆုံးမှု မြင့်တက်လာပါသည်။ ထို့အပြင် ရခိုင်ပြည်နယ်တွင် တပ်မတော်နှင့် AA အဖွဲ့တို့ တိုက်ပွဲဖြစ်ပွားမှု မရှိသော်လည်း မြေမြှုပ်မိုင်းကြောင့် အရပ်သားသေဆုံးမှု ရှိနေပါသည်။

ရခိုင်ပြည်နယ်အတွင်း တိုက်ပွဲဖြစ်ပွားမှု

၂၀၂၀ ရွေးကောက်ပွဲကာလမှစ၍ တပ်မတော်နှင့် AA အဖွဲ့အကြား တိုက်ပွဲများ ရပ်တန့်နေခဲ့သော်လည်း မြေမြှုပ်မိုင်းနှင့် စစ်ကျန်လက်နက်များ ပေါက်ကွဲမှုကြောင့် အရပ်သားများ ထိခိုက်သေဆုံးနေဆဲဖြစ်ပါသည်။

မြေမြှုပ်မိုင်းနင်းမိ၍ ပြင်းပြင်းထန်ထန်ဒဏ်ရာရခဲ့သည့် ကျောက်တော်မြို့နယ် ခဘော်ကျေးရွာမှ အမျိုးသမီး မှာ စစ်တွေဆေးရုံကြီးတွင် ဆေးကုသမှုခံယူနေစဉ် ဇန်နဝါရီ ၁၈ ရက် နံနက်ပိုင်းက သေဆုံးသွားခဲ့ပါသည်။ [1] ထိုအမျိုးသမီးမှာ ဇန်နဝါရီ ၄ ရက်က ရွာအနီး ထင်းခုတ်သွားစဉ် မိုင်းနင်းမိခြင်းဖြစ်ပြီး ဒဏ်ရာပြင်းထန်သည့်အတွက် ကျောက်တော်ဆေးရုံမှ စစ်တွေဆေးရုံသို့ လွှဲပြောင်းကုသခဲ့ခြင်း ဖြစ်သည်။

ထို့အပြင် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေး၏ ပြောကြားမှုအရ ရခိုင်ပြည်နယ်တွင် ပြီးခဲ့သည့် နှစ်နှစ်တာကာလအတွင်း မိုင်းနှင့် စစ်လက်ကျန်ပစ္စည်းများ ပေါက်ကွဲမှု ၁၁၀ ကျော် ဖြစ်ပွားခဲ့ပြီး လူ ၆၀ ကျော် သေဆုံးကာ ၁၃၀ ခန့် ထိခိုက် ဒဏ်ရာရှိခဲ့ကြောင်း သိရပါသည်။ [2]

တပ်မတော်နှင့် KNU တို့ တိုက်ပွဲဖြစ်ပွားမှု

ယခုရက်သတ္တပတ်တွင်လည်း တပ်မတော်နှင့် ကရင်အမျိုးသားအစည်းအရုံး(KNU)တို့အကြား ကရင်ပြည်နယ် ဖာပွန်မြို့နယ်နှင့် ပဲခူးတိုင်း ကျောက်ကြီးမြို့နယ်တို့တွင် တိုက်ပွဲများ ဆက်လက်ဖြစ်ပွားနေပါသည်။

ပဲခူးတိုင်း၊ ညောင်လေးပင်ခရိုင် ကျောက်ကြီးမြို့နယ်တွင် တပ်မတော်နှင့်  KNU တပ်မဟာ(၃) တို့ တိုက်ပွဲများ ရက်ဆက် ဖြစ်ပွားနေခြင်းကြောင့် အရပ်သား ရာနှင့်ချီ တိမ်းရှောင်နေရပါသည်။ [3] တိုက်ပွဲများအတွင်း တပ်မတော်၏ ပစ်ခတ်မှုကြောင့် အရပ်သားထိခိုက်ဒဏ်ရာရမှုများ ရှိခဲ့ကြောင်း KNU က စွပ်စွဲသကဲ့သို့ တပ်မတော်ကလည်း KNU ဘက်မှ ပစ်ခတ်နှောင့်ယှက်၍ ပြန်လည်ပစ်ခတ်ရသည်ဟု ပြောကြားခဲ့ပါသည်။

ကျောက်ကြီးမြို့နယ်တွင် KNU တပ်မဟာ-၅ တပ်ဖွဲ့ဝင်များက ပစ်ခတ်ခြင်းကြောင့် အရပ်သားနှစ်ဦး သေဆုံးခဲ့ကြောင်း တပ်မတော်က ဇန်နဝါရီ ၁၉ ရက် ညပိုင်းတွင် သတင်းထုတ်ပြန်ခဲ့သည်။[4] တပ်မတော်၏ ထုတ်ပြန်မှုတွင် ဇန်နဝါရီ ၁၉ ရက်မွန်းလွဲပိုင်းက ကျောက်ကြီးမြို့နယ် မူသဲကျေးရွာအနီးတွင် အရပ်သား နှစ်ဦးကို KNU တပ်မဟာ (၅)၊ ပြည်သူ့စစ်တပ်ရင်း (၁)အဖွဲ့က အကြောင်းမဲ့ပစ်ခတ်၍ သေဆုံးခဲ့ကြောင်း ဖော်ပြခဲ့ပါသည်။ ထိုဖြစ်စဉ်ကို KNU ဘက်က ငြင်းဆန်ခဲ့ပြီး တပ်မတော်၏လက်နက်ကြီးပစ်ခတ်မှုကြောင့်သာ ဇန်နဝါရီ ၁၉ ရက်က ကျောက်ကြီးမြို့နယ်တွင် စစ်ဘေးတိမ်းရှောင်နေသူတဦး ထိခိုက်ဒဏ်ရာရရှိခဲ့သည်ဟု ပြန်လည် စွပ်စွဲခဲ့ပါသည်။

ထိုဖြစ်စဉ်မတိုင်ခင်ကလည်း တပ်မတော်နှင့်  KNU တပ်မဟာ (၅)တို့၏ ကရင်ပြည်နယ် မဲဝိုင်ဒေသ စစ်ရေးပဋိပက္ခနှင့် ဆက်စပ်ပြီး အမျိုးသားတဦး သေဆုံး၊ ကလေးငယ်တဦး ထိခိုက်ဒဏ်ရာရရှိခဲ့ရာ ပစ်ခတ်မှုအပေါ် နှစ်ဖက် အပြန်အလှန် စွပ်စွဲခဲ့ကြပါသည်။ [5]

ဇန်နဝါရီ ၁၅ ရက်က KNU တပ်မဟာ (၅) မှ တပ်ဖွဲ့ဝင်များ၏ ပစ်ခတ်မှုကြောင့် မဲဝိုင်ဘုန်းတော်ကြီးကျောင်းတွင် နေထိုင်နေသည့် ကလေးငယ်တဦး ဦးခေါင်း၌ ကျည်ရှပ်ထိ ဒဏ်ရာရရှိခဲ့ကြောင်း တပ်မတော်က သတင်းထုတ်ပြန်ခဲ့ရာ တပ်မတော်က ပစ်ခတ်သည့် လက်နက်ကြီး ထိမှန်၍ ရသည့်ဒဏ်ရာ ဖြစ်သည်ဟု KNU တပ်မဟာ (၅) ပြောရေးဆိုခွင့်ရှိသူ ပဒိုမန်းမန်းက ပြောကြားခဲ့သည်။ ထို့အပြင် တပ်မတော်၏ လက်နက်ကြီး ပစ်ခတ်မှုကြောင့် တောင်ယာထဲတွင် ရှိနေသည့် ဒေသခံရွာသားတဦး ဇန်နဝါရီ ၁၂ ရက် ညပိုင်းက သေဆုံးခဲ့ကြောင်း KNU ဘက်က စွပ်စွဲခဲ့ပါသည်။

၂၀၂၀ ပြည့်နှစ် ဇန်နဝါရီ တတိယပတ်အတွင်း ဖြစ်ပွားခဲ့သည့် တိုက်ပွဲသတင်းများ၏ အပြည့်အစုံကို ယခု link တွင် ကြည့်နိုင်ပါသည်။

[1] BBC Burmese (ဇန်နဝါရီ ၁၉ ၊ ၂၀၂၁)  “ရခိုင် မြေမြှုပ်မိုင်း- ကျောက်တော်က မိုင်းထိလူနာတစ်ဦး သေဆုံး”

https://www.bbc.com/burmese/burma-55719248

[2] 7 Day Daily (ဇန်နဝါရီ ၂၀ ၊ ၂၀၂၁)  “ရခိုင်ပြည်နယ်တွင် ပြီးခဲ့သည့် ၂ နှစ်အတွင်း မိုင်းနှင့်စစ်လက်ကျန်ပေါက်ကွဲမှု အကြိမ်ရေ ၁၀၀ ကျော်အထိ ရှိ”

[3] VOA (ဇန်နဝါရီ ၁၉ ၊ ၂၀၂၁)  “ပဲခူးတိုင်းအတွင်း KNU နဲ့ မြန်မာစစ်တပ် တိုက်ပွဲဖြစ်ပွား”

https://burmese.voanews.com/a/bago-knu-karen-myanmar-peace-process/5743107.html?fbclid=IwAR0e0E1Kb8zimgGcOb4eA0t3vdy0pV5DDHxu6pk_cSwfuHJArvnjczA8eSI

[4] 7 Day Daily (ဇန်နဝါရီ ၂၀ ၊ ၂၀၂၁)  “KNU တပ်မဟာ(၅)အဖွဲ့ပစ်ခတ်၍ အရပ်သား နှစ်ဦးသေဆုံးဟု တပ်မတော် ထုတ်ပြန်”

[5] 7 Day Daily (ဇန်နဝါရီ ၁၇ ၊ ၂၀၂၁)  “တပ်မတော်နှင့် KNU တို့၏ စစ်ရေးပဋိပက္ခကြောင့် အမျိုးသားတစ်ဦးသေဆုံးပြီး ကလေးငယ်တစ်ဦး ဒဏ်ရာရ”

The post တိုက်ပွဲဖြစ်ပွားမှုများ (ဇန်နဝါရီ တတိယပတ်) appeared first on ISP Myanmar Peace Desk.

အဆိုပါထုတ်ပြန်ချက်များတွင် တပ်မတော်မှ “မဲဝိုင်ကျေးရွာ ဘုန်းတော်ကြီး ကျောင်းတွင်‌ နေထိုင်လျက်ရှိသည့် အပြစ်မဲ့ကလေးငယ်တဦးအား KNLA တပ်မဟာ (၅)အဖွဲ့က လက်ဖြောင့်သေနတ်ဖြင့် ပစ်ခတ်ခဲ့ကြောင်း” ထုတ်ပြန်ချက် အပါအဝင် ထုတ်ပြန်ချက် ၁၀ ခုအထိ ထုတ်ပြန်ခဲ့ပါသည်။ ထို့အပြင် တိုင်းရင်းသားလက်နက်ကိုင်အဖွဲ့များမှ ငါးခု၊ ပါတီများမှ နှစ်ခုနှင့် ပြည်ထောင်စု လွှတ်တော်ရုံး၊ ယူနီဆက်မြန်မာနှင့် ကရင်ငြိမ်းချမ်းရေး အထောက်အကူပြု ကွန်ယက် (KPSN)တို့မှ တခုစီ အသီးသီး ထုတ်ပြန်ခဲ့ကြရာ သတိပြုအာရုံစိုက်ရမည့် ထုတ်ပြန်ချက်အချို့ကို ISP-Myanmar Peace Desk က အနှစ်ချုပ် ဖော်ပြထားပါသည်။

ပြည်ထောင်စုအစိုးရ၏ ထုတ်ပြန်ချက်  

ယခုရက်သတ္တပတ်အတွင်း ပြည်ထောင်စုလွှတ်တော်ရုံးမှ “ဒုတိယအကြိမ် ပြည်ထောင်စုလွှတ်တော် အထူးအစည်းအဝေး ခေါ်ယူကျင်းပပေးရန် တင်ပြ တောင်းဆိုလွှာ တင်သွင်းထားခြင်းနှင့် စပ်လျဉ်း၍ သတင်းထုတ်ပြန်ချက်”ကို ဇန်နဝါရီ ၁၂ ရက်စွဲဖြင့်  ထွက်ရှိခဲ့ပါသည်။

အဆိုပါသတင်းထုတ်ပြန်ချက်တွင် “ ပြည်ခိုင်ဖြိုးပါတီနှင့် တပ်မတော်တို့ ဦးဆောင်၍ ပြည်ထောင်စုလွှတ်တော် အထူးအစည်းအဝေး ခေါ်ယူကျင်းပပေးရန် တောင်းဆိုချက်မှာ မလိုအပ်သည့်ကိစ္စ ဖြစ်၍ ခေါ်ယူကျင်းပရန် မရှိကြောင်း”  ဖော်ပြခဲ့ပါသည်။

ယင်းနောက် “တောင်းဆိုသည့်ကိစ္စရပ်များမှာ ပါတီစုံအထွေထွေရွေးကောက်ပွဲဆိုင်ရာ တိုင်ကြား၊ ကန့်ကွက်မှုများအတွက် ပြည်သူ့ကိုယ်စားလှယ်များနှင့် စုပေါင်းတိုင်ပင်အဖြေရှာဆုံးဖြတ်နိုင်ရန် ဖြစ်ကြောင်း တွေ့ရှိရပြီး ယင်းအချက်များသည် ပြည်ထောင်စုလွှတ်တော်၏ ဆုံးဖြတ်၊ သဘောတူညီချက်၊ အတည်ပြုချက်ရယူရမည့်ကိစ္စ မဟုတ်ဘဲ ပြည်ထောင်စုရွေးကောက်ပွဲကော်မရှင်က သက်ဆိုင်ရာဥပဒေ၊ နည်းပဒေများအရ ဆက်လက်ဆောင်ရွက် ရမည့် ကိစ္စရပ်များသာ ဖြစ်ကြောင်း” ပြည်ထောင်စုလွှတ်တော်ရုံး၏ ထုတ်ပြန်မှုတွင် ပါရှိပါသည်။

တပ်မတော်၏ ထုတ်ပြန်ချက်များ  

ဇန်နဝါရီ တတိယပတ်ကာလအတွင်း တပ်မတော်မှ “မဲဝိုင်ကျေးရွာ ဘုန်းတော်ကြီးကျောင်းတွင်‌ နေထိုင်လျက်ရှိသည့် အပြစ်မဲ့ကလေးငယ်တဦးအား KNLA တပ်မဟာ (၅)အဖွဲ့က လက်ဖြောင့်သေနတ်ဖြင့် ပစ်ခတ်ခဲ့ကြောင်း” ထုတ်ပြန်ချက် အပါအဝင် ထုတ်ပြန်ချက် ၁၀ ခုအထိ ထုတ်ပြန်ခဲ့ပါသည်။

“မဲဝိုင်ကျေးရွာ ဘုန်းတော်ကြီးကျောင်းတွင်‌ နေထိုင်လျက်ရှိသည့် အပြစ်မဲ့ကလေးငယ်တဦးအား KNLA တပ်မဟာ (၅)အဖွဲ့က လက်ဖြောင့်သေနတ်ဖြင့် ပစ်ခတ်ခဲ့ကြောင်း” သတင်းထုတ်ပြန်ချက်ကို တပ်မတော်က ဇန်နဝါရီ ၁၆ ရက်စွဲ ဖြင့် ထုတ်ပြန်ခဲ့ခြင်း ဖြစ်ပါသည်။

အဆိုပါထုတ်ပြန်ချက်တွင် “ ကရင်ပြည်နယ်၊ မဲဝိုင်အနီးရှိ တပ်မတော်စခန်း၏ တောင်ဘက် မဲဝိုင်ဘုန်းတော်ကြီးကျောင်းအနီးတွင် ဇန်နဝါရီ ၁၅ ရက်က KNLA တပ်မဟာ(၅)မှ သုံးဦးခန့်က လက်ဖြောင့်သေနတ်ဖြင့် ပစ်ခတ်ခဲ့ရာ ၁၂ နှစ်အရွယ် ကလေးငယ်တဦး၏ ဦးခေါင်းတွင် ကျည်ရှပ်ထိဒဏ်ရာ (စိုးရိမ်ရ) ရရှိခဲ့ကြောင်း”  ဖော်ပြခဲ့ပါသည်။

ယင်းနောက် “KNLA အဖွဲ့အနေဖြင့် ယခုကဲ့သို့ အပြစ်မဲ့ပြည်သူများအား လက်နက်ဖြင့် ပစ်ခတ်မှုသည် NCA စာချုပ်ပါ ပစ်ခတ်တိုက်ခိုက်မှုရပ်စဲရေးဆိုင်ရာ စည်းမျဉ်း၊ စည်းကမ်းများနှင့် စစ်ဘက်ဆိုင်ရာကျင့်ဝတ်များ၊ Code of Conduct အခန်း(၃)ပါ ပြဌာန်းချက်များကို ချိုးဖောက်ခဲ့ကြောင်း တွေ့ရှိရသဖြင့် ပစ်ခတ် တိုက်ခိုက်မှုရပ်စဲရေးဆိုင်ရာပူးတွဲစောင့်ကြည့်ရေးကော်မတီ (ပြည်နယ်အဆင့်) သို့ ကန့်ကွက်အကြောင်းကြားသွားမည် ဖြစ်ကြောင်း” တပ်မတော်၏ ထုတ်ပြန်မှုတွင် ပါရှိပါသည်။

ဆက်လက်ပြီး “ ပြည်ထောင်စုလွှတ်တော်ရုံး၏ သတင်းထုတ်ပြန်ချက်နှင့် စပ်လျဉ်း၍ သဘောထားထုတ်ပြန်ချက်”ကို ဇန်နဝါရီ ၁၄ ရက်စွဲဖြင့် ထုတ်ပြန် ခဲ့ပါသည်။

အဆိုပါထုတ်ပြန်ချက်တွင် “  ပုဒ်မ ၈၄ ပါ ပြဌာန်းချက်အတိုင်းဆိုလျှင် အထူးအစည်းအဝေး ခေါ်ယူကျင်းပပေးရေးတောင်းဆိုရာတွင် အကြောင်းပြချက် ပေးရမည်ဟု မဖော်ပြထားသည့်အပြင် အကြောင်းပြချက်ပေး၍ ငြင်းဆိုနိုင်သည့် ခြွင်းချက်ပေးထားခြင်း မရှိကြောင်း၊ ပြည်ထောင်စုလွှတ်တော်နာယက,က ခေါ်ယူကျင်းပပေးရန် မလိုအပ်ကြောင်း အကြောင်းပြချက်ပေး၍ ငြင်းဆိုခြင်းသည် ဖွဲ့စည်းပုံအခြေခံဥပဒေနှင့် ဆန့်ကျင်ခြင်း ရှိမရှိ ပြန်လည် ဆန်းစစ်ရန် လိုအပ်မည်ဖြစ်ကြောင်း” ဖော်ပြထားပါသည်။

ထို့အပြင် တပ်မတော်သတင်းမှန်ပြန်ကြားရေးအဖွဲ့က ၂၀၂၀ ရွေးကောက်ပွဲ မဲစာရင်းများ စိစစ်တွေ့ရှိချက်နှင့် ပတ်သက်၍ ၂၀၂၁ ခုနှစ် ဇန်နဝါရီ ၁၂ ရက်မှ ၁၈ ရက်အထိကာလအတွင်း သတင်းထုတ်ပြန်ချက် ခုနစ်ခုအထိ ထွက်ရှိခဲ့ပါသည်။

တိုင်းရင်းသားလက်နက်ကိုင်အဖွဲ့များ၏ ထုတ်ပြန်ချက်        

ယခုရက်သတ္တပတ်အတွင်း တိုင်းရင်းသားလက်နက်ကိုင်အဖွဲ့များမှ ထုတ်ပြန် ကြေညာချက် ငါးခုအထိ ထွက်ရှိခဲ့ပါသည်။

“ပလောင်ပြည် လွတ်မြောက်ရေးတပ်ဦး၏ ဗဟိုကော်မတီ နှစ်ပတ်လည်အစည်းအဝေး သဘောထားထုတ်ပြန်ကြေညာချက်” ကို PSLF/ TNLA အဖွဲ့မှ ဇန်နဝါရီ ၁၈ ရက်စွဲဖြင့် ထွက်ရှိခဲ့ပါသည်။

အဆိုပါထုတ်ပြန်ချက်အရ “ ULA/ AA အဖွဲ့ နှင့် တပ်မတော်တို့ အပြန်အလှန် ဆွေးနွေးမှုများ စတင်နိုင်ခဲ့ပြီး ရခိုင်ပြည်တွင် တိုက်ပွဲများ လတ်တလော ရပ်တန့်နိုင်ခြင်းသည် အပစ်အခတ်ရပ်စဲရေးဆွေးနွေးမှု၏ အရေးကြီးသည့်လုပ်ငန်းအစ ဖြစ်ကြောင်းနှင့် “၂၀၂၀ အလွန် ငြိမ်းချမ်းရေးဖွဲ့စည်း တည်ဆောက်မှု အသစ်” ဖော်ဆောင်မည်ဟု ဒေါ်အောင်ဆန်းစုကြည်၏  နှစ်သစ်နှုတ်ခွန်းဆက်စကားသည် ရှေ့ဆက်ရန် ခက်ခဲနေသည့် ငြိမ်းချမ်းရေး လုပ်ငန်းစဉ်များ ပြန်လည်အစပြုရန် အခြေအနေကောင်းများ ဖြစ်သည်ဟု ရှုမြင်ကြောင်း”  သိရပါသည်။

ထို့အပြင် PSLF/ TNLA အဖွဲ့မှ “(၅၈) နှစ်ပြည့် တအာင်းအမျိုးသားတော်လှန်ရေးနေ့ သဘောထားထုတ်ပြန်ချက်” ကို ဇန်နဝါရီ ၁၂ ရက်စွဲဖြင့် ထုတ်ပြန်ခဲ့ရာ “ဒေသခံပြည်သူများနှင့် တအာင်းလူထုအား  နှိပ်စက်ညှင်းပမ်းခြင်းများ ဆက်တိုက်ကျုးလွန်နေသည့် RCSS ၏ လုပ်ရပ်သည် ရှမ်းပြည်သူလူထုများ လိုလားသည့် ရှမ်းပြည်ညီညွတ်ရေးလုပ်ငန်းများနှင့် ဆန့်ကျင်နေကြောင်း၊ RCSS ၏ ခွဲခြားဖိနှိပ်မှုကို ဆက်တိုက်ခံနေကြရသော ဒေသခံမိဘပြည်သူများအား မိမိတို့မှ အကာအကွယ်ပေးသွားရမည်ကြောင်း”  ဖော်ပြခဲ့ပါသည်။

ယင်းနောက် ကရင်အမျိုးသားအစည်းအရုံး (KNU)မှ ဇန်နဝါရီ ၁၃ ရက်စွဲဖြင့် “ကရင်အမျိုးသား မိဘပြည်သူများနှင့် ကရင်လူငယ် မောင်မယ်အားလုံးထံသို့ အိတ်ဖွင့်ပေးစာ” ကို ထုတ်ပြန်ခဲ့ပါသည်။ အဆိုပါအိတ်ဖွင့်ပေးစာတွင်  “ မိမိတို့အနေဖြင့် သဘောတူညီချက်များ ထိန်းသိမ်းရေး၊ စစ်ပွဲများ မဖြစ်ရေးတို့ကို ထောက်ရှု၍ နယ်မြေအသီးသီးတွင် အလျှော့ပေးခဲ့ရာ NCA လက်မှတ်ထိုးပြီး နောက် ဖာပွန်ခရိုင်၌ တပ်မတော်စခန်း ၈၀ ကျော်အထိ ရှိလာခဲ့ပြီး နည်းမျိုးစုံဖြင့် တပ်အင်အားကို တိုးချဲ့ခဲ့ကြောင်း”  ဖော်ပြခဲ့ပါသည်။

ထို့ပြင် ကရင်အမျိုးသားအစည်းအရုံး (KNU) ညောင်လေးပင်ခရိုင်မှ “(၂၃)ကြိမ်မြောက် KNU ညောင်လေးပင်ခရိုင် ထုတ်ပြန်ကြေညာချက် ” ကို ဇန်နဝါရီ ၁၆ ရက်စွဲဖြင့် ထွက်ရှိခဲ့ပါသည်။

အဆိုပါထုတ်ပြန်ချက်တွင် “ပြည်သူလူထု၏ နေ့စဉ်လူမှုဘဝလုံခြုံရေးနှင့် စပ်လျဉ်း၍ စိုးရိမ်ကြောက်ရွံ့ခြင်းကင်းသည့် ပြည်သူ ပြည်သားများ၏ ဘဝ ရပ်တည်ရေး အာမခံရန်၊ ပစ်ခတ်တိုက်ခိုက်မှုရပ်စဲရေးဆိုင်ရာ ကိစ္စရပ်နှင့် ပစ်ခတ်တိုက်ခိုက်မှု ရပ်စဲရေးခိုင်မာအောင် လုပ်ဆောင်ခြင်းကိစ္စရပ်များကို အကောင်အထည်ဖော်ဆောင်နိုင်ရေးအတွက် စာချုပ်ပါ သဘောတူညီချက်များအတိုင်း မည်ကဲ့သို့ အကောင်အထည်ဖော်လုပ်ဆောင်နိုင်မည်ကို  တိုင်ပင်ဆွေးနွေး၍ ဆုံးဖြတ်ချက်များ ချမှတ်ခဲ့ကြကြောင်း” ဖော်ပြခဲ့ပါသည်။

ရှမ်းပြည်အရှေ့ပိုင်း၊ အထူးဒေသ(၄)၊ မိုင်းလားအဖွဲ့(NDAA)ကလည်း ဇန်နဝါရီ ၁၄ ရက်စွဲဖြင့် “ကိုဗစ်-၁၉ ရောဂါ ကာကွယ်၊ ထိန်းချုပ်၊ ကုသရေးနှင့် ပတ်သက်၍ မိုင်းလားမြို့အတွင်းရှိ ပြည်သူများထံသို့ အသိပေးအကြောင်းကြားစာ” တခု ထွက်ရှိခဲ့ပါသည်။

ပါတီများ၏ ထုတ်ပြန်ချက်    

ယခုရက်သတ္တပတ်အတွင်း ပြည်သူ့ရှေ့ဆောင်ပါတီ(PPP)နှင့် အမျိုးသားဒီမိုကရေစီအင်အားစုပါတီ (NDF)တို့မှ ကြေညာချက် နှစ်ခုထုတ်ပြန်ခဲ့ပါသည်။

ဇန်နဝါရီ ၁၄ရက်စွဲဖြင့် ထုတ်ပြန်ခဲ့သည့် ပြည်သူ့ရှေ့ဆောင်ပါတီ (PPP)၏ ထုတ်ပြန်ချက်တွင် “ လက်ရှိဖြစ်ပေါ်နေသော ရွေးကောက်ပွဲဆိုင်ရာ အငြင်းပွားမှုများနှင့် အခြေအနေအရပ်ရပ်များအတွက် တာဝန်ရှိကြသော နိုင်ငံတော်အစိုးရနှင့် ရွေးကောက်ပွဲကော်မရှင်၊ ပြည်ထောင်စုလွှတ်တော်နာယက၊ ပြည်ထောင်စု လွှတ်တော်တရားချုပ်တို့က ဒီမိုကရေစီရေးနှင့် တရားဥပဒေစိုးမိုးရေးတို့အတွက် ဥပဒေနှင့်အညီ ဖြေရှင်းဆောင်ရွက်ပေးနိုင်ပါရန် အလေးအနက်ထား တိုက်တွန်း တောင်းဆိုကြောင်း” ဖော်ပြထားပါသည်။

အမျိုးသားဒီမိုကရေစီအင်အားစုပါတီ(NDF)ကလည်း ဇန်နဝါရီ ၁၇ ရက်စွဲဖြင့်  “ဒုတိယအကြိမ်လွှတ်တော် အပြီးသတ် ခေါ်ယူပေးရေး ကိစ္စနှင့်ပတ်သက်၍ သဘောထားထုတ်ပြန်ချက်”တွင် “လွှတ်တော်ကိုယ်စားလှယ်များ၏  နိုင်ငံနှင့် နိုင်ငံသားများ အကျိုးအတွက် ဆောင်ရွက်ချက်များကို  ဆွေးနွေးဆုံးဖြတ် အတည်ပြုပြီးမှသာ  ဒုတိယအကြိမ်လွှတ်တော်ကို ဂုဏ်သိက္ခာရှိစွာဖြင့် အပြီးသတ်ရမည် ဖြစ်၍ ကျန်ရှိနေသည့်သက်တမ်းအတွက် အရေးတကြီး လုပ်ဆောင်နိုင်ရန် အမြန်ဆုံးခေါ်ယူသင့်ကြောင်း” ဖော်ပြခဲ့ပါသည်။

နိုင်ငံတကာအဖွဲ့အစည်းများ၏ ထုတ်ပြန်ချက် 

ယူနီဆက်မြန်မာက ဇန်နဝါရီ ၁၂ ရက်စွဲဖြင့် “ မင်းပြားမြို့တွင် ဖြစ်ပွားခဲ့သော စစ်လက်နက်ပစ္စည်းပေါက်ကွဲမှုနှင့် စပ်လျဉ်း၍ ထုတ်ပြန်ကြေညာချက်” တခု ထွက်ရှိခဲ့ပါသည်။

အဆိုပါထုတ်ပြန်ချက်တွင် “  ရခိုင်ပြည်နယ်၊ မင်းပြားမြို့ စပါးထားကျေးရွာတွင်  မိုင်းသီးတလုံး ပြင်းထန်စွာ ပေါက်ကွဲခဲ့မှုကြောင့် အမျိုးသမီးတဦးသေဆုံးပြီး ကလေးငယ်ငါးဦး ထိခိုက်ခဲ့ခြင်းအတွက်  လွန်စွာ စိတ်ထိခိုက်ဝမ်းနည်းကြောင်း၊ မြန်မာအစိုးရအ‌နေဖြင့် ကျောင်းများနှင့် ရပ်ရွာအသိုက်အဝန်းများတွင် မိုင်းအန္တရာယ်နှင့် ပတ်သက်သော အသိပညာများ ပေးနိုင်ရန်နှင့် အရေးပေါ်  မိုင်းအန္တရာယ်ပညာပေးလှုပ်ရှားမှုများ ဆောင်ရွက်နိုင်ရေး ပံ့ပိုးပေးပါရန် တိုက်တွန်းကြောင်း” ပါရှိပါသည်။

အရပ်ဘက်အဖွဲ့အစည်းများ၏ ထုတ်ပြန်ချက်    

ကရင်ငြိမ်းချမ်းရေးအထောက်အကူပြုကွန်ယက် (KPSN)မှ ဇန်နဝါရီ ၁၈ ရက်စွဲဖြင့် ထုတ်ပြန်ကြေညာချက် တခု ထွက်ရှိခဲ့ပါသည်။

အဆိုပါထုတ်ပြန်ချက်တွင် “ကရင်ပြည်နယ် ခလယ်လွီထူ (ညောင်လေးပင်) ခရိုင်နှင့် မူတြော်(ဖာပွန်)ခရိုင်တို့တွင် တပ်မတော်၏ လက်နက်ကြီးများဖြင့် ပစ်ခတ်နေမှုများကြောင့် ရွာသူကြီးတဦး သေဆုံးမှုနှင့် ဒေသခံ ပေါင်း ၃၇၀၀ ကျော် နေရပ်စွန့်ခွာ ထွက်ပြေးတိမ်းရှောင်နေရမှုအပေါ်  ရှုတ်ချကြောင်း” ဦးစွာဖော်ပြခဲ့ပါသည်။

ယင်းနောက် “တပ်မတော်၏ ထိုးစစ်ဆင်နေမှုများအား ချက်ချင်းရပ်တန့်ရန်နှင့် ကရင်နယ်နမိတ်များမှ ၎င်းတို့ တပ်များအား ရုတ်သိမ်းရန် တောင်းဆိုကြောင်း၊ တပ်မတော်မှ နိုင်ငံအဝှမ်းတွင် ထိုးစစ်ဆင်နေမှုများ ရပ်တန့် သည့်အချိန်နှင့် ၎င်းတို့ အခြေစိုက်နေသော တိုင်းရင်သားနယ်မြေများရှိ တပ်စခန်းများ စတင် ဆုတ်ခွာသည့် အချိန်အထိ နိုင်ငံတကာအလှူရှင်များမှ ငြိမ်းချမ်းရေး ဖြစ်စဉ်အား ပံ့ပိုးပေးနေမှုများအပေါ် ဆိုင်ငံ့ထားရန် တိုက်တွန်းကြောင်း” KPSN ၏ ထုတ်ပြန်မှုတွင် ပါရှိပါသည်။

၂၀၂၁ ခုနှစ် ဇန်နဝါရီတတိယပတ်အတွင်း ထွက်ရှိခဲ့သော ထုတ်ပြန်ချက်များ၏ အပြည့်အစုံကို ယခု link တွင် ကြည့်နိုင်ပါသည်။

The post ထုတ်ပြန်ကြေညာချက်များ (ဇန်နဝါရီ တတိယပတ်) appeared first on ISP Myanmar Peace Desk.

ထို့အပြင် ULA/AA အဖွဲ့ကို အကြမ်းဖက်အဖွဲ့အဖြစ်မှ ပယ်ဖျက်ရေးအဆိုကို ရခိုင်ပြည်နယ်လွှတ်တော်တွင် အတည်ပြုခဲ့ခြင်း၊  NLD ပါတီအစိုးရ၏ လာမည့်သက်တမ်းတွင် ငြိမ်းချမ်းရေး ပိုမိုအောင်မြင်နိုင်ဟု KNU/KNLA-PC ဥက္ကဋ္ဌက မှတ်ချက်ပြုခဲ့ခြင်းစသည့်သတင်းများလည်း ရှိနေပါသည်။

NCA လက်မှတ် မထိုးရသေးသောအဖွဲ့များ၏ ဆောင်ရွက်မှု

ULA/AA အဖွဲ့ကို အကြမ်းဖက်အဖွဲ့အဖြစ်မှ ပယ်ဖျက်ပေးရန် ပြည်နယ်အစိုးရကတဆင့် ပြည်ထောင်စုအစိုးရထံ တိုက်တွန်းသည့်အဆိုကို ဇန်နဝါရီ ၁၄ ရက်က ကျင်းပခဲ့သော ရခိုင်ပြည်နယ်လွှတ်တော်အစည်းအဝေးတွင် အတည်ပြုခဲ့ပါသည်။ [1]

ထိုအဆိုကို  မြောက်ဦးမြို့နယ်ပြည်နယ်လွှတ်တော်ကိုယ်စားလှယ်ဦးထွန်းသာစိန်က ဇန်နဝါရီ ၁၁ ရက်တွင် တင်သွင်းခဲ့ရာ လွှတ်တော်ကိုယ်စားလှယ် ခုနစ်ဦးက ထောက်ခံဆွေးနွေးခဲ့ပြီး ကန့်ကွက်သူမရှိသဖြင့် ပြည်နယ်လွှတ်တော်က အတည်ပြုခဲ့ခြင်း ဖြစ်သည်။  ULA/AA အဖွဲ့ကို မတရားအသင်းနှင့် အကြမ်းဖက်အဖွဲ့အဖြစ် သတ်မှတ်ကြောင်း ၂၀၂၀ ပြည့်နှစ် မတ် ၂၃ ရက်တွင် အစိုးရက ကြေညာခဲ့သည်။

နောက်ထပ်သတင်းတပုဒ်မှာ အစိုးရနှင့် မြောက်ပိုင်းလက်နက်ကိုင်လေးဖွဲ့ဖြစ်သော KIO/KIA ၊ PSLF/TNLA ၊ MNTJP/MNDAA၊ ULA/AA တို့၏ အပစ်ရပ်စဲရေးဆွေးနွေးမည့် ရက်နှင့် နေရာကို အတည်မပြုနိုင်သေးကြောင်း KIA သတင်းနှင့် ပြန်ကြားရေးတာဝန်ခံ ဗိုလ်မှူးကြီးနော်ဘူက ပြောကြားခဲ့ခြင်း ဖြစ်သည်။ [2]

ဇန်နဝါရီ ၁၁ ရက်က အွန်လိုင်းမှ နှစ်ဖက်ဆွေးနွေးခဲ့ကြသော်လည်း အင်တာနက်အခြေအနေကြောင့် အသေးစိတ် မဆွေးနွေးနိုင်ခဲ့၍ ဆွေးနွေးမည့်ရက်နှင့် နေရာကို သတ်မှတ်နိုင်ရန် တိတိကျကျ မဆုံးဖြတ်နိုင်ခဲ့ကြောင်း ဗိုလ်မှူးကြီးနော်ဘူ၏ ပြောကြားမှုအရ သိရပါသည်။ အစိုးရဘက်က ဇန်နဝါရီ  ၁၆ ရက်တွင် မြစ်ကြီးနား သို့မဟုတ် ကျိုင်းတုံမြို့တွင် တွေ့ဆုံဆွေးနွေးရန် မြောက်ပိုင်းအဖွဲ့များကို ကမ်းလှမ်းထားခြင်းဖြစ်သည်။

NCA လက်မှတ်ထိုးထားသည့်အဖွဲ့များ၏ ဆောင်ရွက်မှု

စစ်ရေးတင်းမာနေသည့် တပ်မတော်နှင့် ကရင်အမျိုးသားအစည်းအရုံး (KNU)တို့၏ သတင်းများက ယခုရက်သတ္တပတ်အတွင်း ငြိမ်းချမ်းရေးဖြစ်စဉ်အပေါ် လွှမ်းမိုးနေပါသည်။

ထိုကဲ့သို့ နှစ်ဖက်တိုက်ပွဲများ ဖြစ်ပွားနေခြင်း‌ကြောင့် အပစ်အခတ်ရပ်စဲရေးလုပ်ငန်းစဉ်အပေါ် ယုံကြည်မှုကျဆင်းလာခြင်းနှင့် လက်နက်ကိုင်ပဋိပက္ခများ ပြန်လည်မတိုးပွားရေးအတွက် နှစ်ဖက်တပ်များအကြား တွေ့ဆုံညှိနှိုင်းအဖြေရှာခြင်းကသာ ပြေလည်မည့်နည်းလမ်းဖြစ်သည်ဟု ယုံကြည်ကြောင်း ကရင်အမျိုးသားအစည်းအရုံး (KNU) က ဇန်နဝါရီ ၈ ရက်တွင် ထုတ်ပြန်ခဲ့သည်။ [3]

တပ်မတော်နှင့် KNU တပ်မဟာ(၅)တို့သည် ကရင်ပြည်နယ် ဖာပွန်ခရိုင် မဲဝိုင်ဒေသ၌ ၂၀၂၀ ပြည့်နှစ် ဒီဇင်ဘာ မှစ၍ ယခုနှစ်ဇန်နဝါရီအထိ တိုက်ပွဲ ၂၀ ထက်မနည်း ဖြစ်ပွားခဲ့သည်။ ထို့အပြင် မွန်ပြည်နယ်နှင့် ပဲခူးတိုင်း တို့တွင်လည်း တပ်မတော်နှင့် KNU တပ်မဟာအချို့အကြား တိုက်ပွဲများ ဆက်လက်ဖြစ်ပွားနေသည်။

တပ်မတော်ဘက်ကလည်း မဲဝိုင်ဒေသ၌ KNU နှင့် ပဋိပက္ခဖြစ်ပွားမှုနှင့် ပတ်သက်၍ နှစ်ဖက်ထိပ်ပိုင်းအဆင့်တာဝန်ရှိသူများ ဆွေးနွေးညှိနှိုင်းရန် လိုအပ်ကြောင်း တပ်မတော်သတင်းမှန်ပြန်ကြားရေးအဖွဲ့ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ရှင်းလင်းထားပါသည်။ [4]

သို့ရာတွင် KNU အထွေထွေအတွင်းရေးမှူးချုပ် ပဒိုစောတာဒိုမူး၏ ပြောကြားမှုအရ ယခုဖြစ်ပွားနေသည့် လက်နက်ကိုင်ပဋိပက္ခများကို ဖြေရှင်းရန်အပါအဝင် တပ်ပိုင်းဆိုင်ရာ ဆွေးနွေးပွဲပြုလုပ်ရန် တပ်မတော်ထံ စာနှစ်ကြိမ်ပို့ထားသော်လည်း အကြောင်းပြန်ကြားချက် မရသေးကြောင်း သိရပါသည်။  [5]

ထို့အပြင် KNU က ကရင်အမျိုးသားပြည်သူများနှင့် လူငယ်များထံသို့ ကရင်နှစ်သစ်နေ့က အိတ်ဖွင့်ပေးစာ ပေးပို့ခဲ့ရာ မိမိတို့အနေဖြင့် သဘောတူညီချက်များ ထိန်းသိမ်းရေး၊ စစ်ပွဲများ မဖြစ်ရေးတို့ကို ထောက်ရှု၍ နယ်မြေအသီးသီးတွင် အလျှော့ပေးခဲ့ရာ  NCA လက်မှတ်ထိုးပြီးနောက် ဖာပွန်ခရိုင်၌ တပ်မတော်စခန်း ၈၀ ကျော်အထိ ရှိလာခဲ့ပြီး နည်းမျိုးစုံဖြင့် တပ်အင်အားကို တိုးချဲ့ခဲ့ခြင်းဖြစ်ကြောင်း ဖော်ပြခဲ့ပါသည်။ [6]

ဆက်စပ်သတင်းတပုဒ်မှာ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ကရင်ပြည်နယ်အတွင်း ထာ၀ရငြိမ်းချမ်းရေး ရရှိရန် ဆောင်ရွက်သွားမည်ဖြစ်ကြောင်း ကရင်နှစ်သစ်ကူးနေ့သို့ ပေးပို့သည့်သဝဏ်လွှာတွင် ပြောကြားခဲ့ခြင်း ဖြစ်ပါသည်။ [7]

အခြားသတင်းတရပ်မှာ အမျိုးသားဒီမိုကရေစီအဖွဲ့ချုပ်(NLD)ပါတီ အစိုးရသည် ငါးနှစ်အတွေ့အကြုံ ရှိထားပြီးဖြစ်၍ လာမည့်သက်တမ်း၌ ငြိမ်းချမ်းရေး ပိုမိုအောင်မြင်နိုင်ကြောင်း KNU/KNLA-PC ငြိမ်းချမ်းရေးကောင်စီ ဥက္ကဋ္ဌ ဗိုလ်ချုပ်ကြီးစောထော့လေးက ပြောကြားခဲ့ခြင်း ဖြစ်သည်။ [8]

ဇန်နဝါရီ ၁၃ ရက် ကရင်အမျိုးသားနှစ်သစ်ကူးနေ့အခမ်းအနားတွင် ပြောကြားခဲ့သောမိန့်ခွန်းတွင် ဗိုလ်ချုပ်ကြီး စောထော့လေးက ထည့်သွင်းပြောကြားခဲ့ခြင်းဖြစ်ပါသည်။

၂၀၂၁ ခုနှစ်  ဇန်နဝါရီ ဒုတိယပတ်ကာလအတွင်း သက်ဆိုင်ရာ အင်အားစုအသီးသီးက ဆောင်ရွက်ခဲ့ကြသည့် ငြိမ်းချမ်းရေးကြိုးပမ်းမှုဖြစ်စဉ်များ၏ အပြည့်အစုံကို ယခု link တွင် ကြည့်နိုင်ပါသည်။

[1] RFA (ဇန်နဝါရီ ၁၄ ၊ ၂၀၂၁) “AA ကို အကြမ်းဖက်အဖွဲ့အဖြစ်က ပယ်ဖျက်ရေးအဆို ရခိုင်လွှတ်တော် အတည်ပြု”

https://www.rfa.org/burmese/news/rakhine-parliament-and-aa-01142021081349.html

[2] DVB (ဇန်နဝါရီ ၁၂ ၊ ၂၀၂၁) “အစိုးရနှင့် မြောက်ပိုင်းအဖွဲ့များဆွေးနွေးမည့် အချိန်နှင့် နေရာ အတည်မပြုနိုင်သေး”

http://burmese.dvb.no/archives/433868?fbclid=IwAR2rTD7pCYzuG7cRlV32Zr6M1RuaacmtfJgsf5MDsQ-GwKzEY57z8Ql0oHE

[3] 7 Day Daily ( ဇန်နဝါရီ ၉ ၊ ၂၀၂၁)  “စစ်ရေးပဋိပက္ခများထပ်မဖြစ်ရေး နှစ်ဖက်တပ်များ တွေ့ဆုံညှိနှိုင်းမှ ပြေလည်မည်ဟု KNU ထုတ်ပြန်”

[4] 7 Day Daily ( ဇန်နဝါရီ ၁၀ ၊ ၂၀၂၁)  “KNU နှင့် ပဋိပက္ခဖြစ်ပွားမှု ထိပ်ပိုင်းခေါင်းဆောင်များ ဆွေးနွေးညှိနှိုင်းရန် လိုအပ်ကြောင်း တပ်မတော်ပြော”

[5] 7 Day Daily ( ဇန်နဝါရီ ၁၄ ၊ ၂၀၂၁)  “ပဋိပက္ခများဖြေရှင်းနိုင်ရေးဆွေးနွေးရန် တပ်မတော်ထံ စာနှစ်ကြိမ် ပို့ထားသော်လည်း မတုံ့ပြန်သေးဟု KNU ပြော”

[6] The Voice Myanmar ( ဇန်နဝါရီ ၁၄ ၊ ၂၀၂၁)  “NCA လက်မှတ်ထိုးပြီး ခြောက်နှစ်အတွင်း တပ်မတော်တပ်စခန်းများ ကရင်ပြည်နယ်တွင် တိုးချဲ့လာဟု KNU ထုတ်ပြန်”

http://thevoicemyanmar.com/news/45494-nca?fbclid=IwAR2sZHlVop84fKybH0g3tZZTzMknFwR4Sic4ic-lvdAwOM-rCZmK9CMkGSI

[7] မြန်မာတိုင်းမ် ( ဇန်နဝါရီ ၁၃ ၊ ၂၀၂၁)  “ကရင်ပြည်နယ်၌ ထာ၀ရငြိမ်းချမ်းရေး ရရှိအောင် လုပ်မည်ဟု ဗိုလ်ချုပ်မှူးကြီး မင်းအောင်လှိုင် ကတိပြု”

https://myanmar.mmtimes.com/news/149804.html?fbclid=IwAR34SBZGD8x9y3m1voouGuDQySXzIzJ4ayWlPd-80OHIBfaETmYS6k8N-SA

[8] 7 Day Daily ( ဇန်နဝါရီ ၁၄ ၊ ၂၀၂၁)  “ဒီချုပ်အစိုးရ လာမည့်သက်တမ်းတွင် ငြိမ်းချမ်းရေး ပိုမိုအောင်မြင်နိုင်ဟု KNU/KNLA-PC ဥက္ကဋ္ဌ ပြော”

The post ငြိမ်းချမ်းရေးကြိုးပမ်းမှုဖြစ်စဉ်များ (ဇန်နဝါရီ ဒုတိယပတ်) appeared first on ISP Myanmar Peace Desk.

ရခိုင်ပြည်နယ်တွင် တပ်မတော်နှင့် AA အဖွဲ့တို့ တိုက်ပွဲမဖြစ်ပွားသည်မှာ နှစ်လကျော်လာခဲ့ပြီ ဖြစ်သော်လည်း စစ်ကျန်လက်နက်များ ပေါက်ကွဲ၍ အရပ်သားထိခိုက်သေဆုံးမှုများ ရှိနေပါသည်။ ပဲခူးတိုင်း ကျောက်ကြီးမြို့နယ်တွင် တပ်မတော်နှင့် KNU တပ်မဟာ(၃)တို့ တိုက်ပွဲ ဖြစ်ပွားခဲ့ပြီး ရှမ်းပြည်နယ် (မြောက်ပိုင်း) မူဆယ်၊ နမ္မတူ၊ ကျောက်မဲမြို့နယ်များတွင်လည်း တိုက်ပွဲများ ဖြစ်ပွားခဲ့သည်။ ထို့အပြင် ကျောက်မဲနှင့် နမ့်လန်မြို့တို့တွင် လက်နက်ကိုင်များ၏ ပစ်ခတ်မှုကြောင့် အရပ်သားများ ထိခိုက်သေဆုံးခဲ့ပါသည်။

ရှမ်းပြည်နယ်အတွင်း တိုက်ပွဲဖြစ်ပွားမှု

ရှမ်းပြည်နယ်(မြောက်ပိုင်း) ကျောက်မဲ၊ နမ္မတူမြို့နယ်များတွင် ရှမ်းပြည်ပြန်လည်ထူထောင်ရေးကောင်စီ (RCSS/SSA)နှင့် တအာင်းအဖွဲ့ (PSLF/TNLA) တို့ တိုက်ပွဲများ ဆက်လက်ဖြစ်ပွားခဲ့ရာ အရပ်သားနေအိမ်များ ထိမှန်ပျက်စီးသကဲ့သို့ စစ်ရှောင်ဦးရေ လေးထောင်ခန့်အထိ ရှိလာပြီဖြစ်ပါသည်။

ကျောက်မဲမြို့နယ် တော့ဆန်ကျေးရွာအနီး တိုက်ပွဲကြောင့် အရပ်သားနေအိမ် အလုံး(၆၀)ခန့် ထိမှန်ပျက်စီးခဲ့သည်။ RCSS နှင့်  TNLA တို့ တိုက်ပွဲဖြစ်ပွားခဲ့ရာ တော့ဆန်ကျေးရွာရှိ ဒေသခံနေအိမ်များ ကျည်ထိမှန်ခဲ့ကြောင်း တော့ဆန်ဒေသခံအမျိုးသားတဦးက ပြောကြားခဲ့သည်။ [1]

ထို့အပြင် RCSS နှင့် TNLA တို့သည် ဇန်နဝါရီ ၆ ရက်ကလည်း နမ္မတူမြို့နယ် နမ့်မတ်ရွာအနီးတွင် တိုက်ပွဲဖြစ်ပွားခဲ့၍ ဒေသခံ ၉၀၀ ကျော် ထွက်ပြေးတိမ်းရှောင်နေရပါသည်။ ထိုနှစ်ဖွဲ့ကြား ဒီဇင်ဘာ ၂၄ ရက်က စတင်ဖြစ်ပွားခဲ့သည့် တိုက်ပွဲများမှာ ဇန်နဝါရီ ၆ ရက်အထိ ဆက်ရှိနေပြီး ကျောက်မဲ၊ သီပေါ၊ နမ္မတူမြို့နယ်များ အတွင်း ဖြစ်ပွားနေပါသည်။ [2]

ထိုကဲ့သို့ တိုက်ပွဲကျယ်ပြန့်နေခြင်းကြောင့် စစ်ရှောင်ဦးရေမှာလည်း လေးထောင်ခန့်အထိ ရှိလာပြီ ဖြစ်ပါသည်။ ကျောက်မဲမြို့နယ်ရှိ တော့ဆန်ကျေးရွာအုပ်စုမှာ စစ်ဘေးရှောင် (၁၈၄၆) ဦး ရှိပြီး၊ ကျောက်မဲမြို့ပေါ် တွင် စစ်ဘေးရှောင် တထောင်ကျော်နှင့် နမ္မတူမြို့နယ်တွင် စစ်ရှောင် (၈၆၉) ဦး ရှိနေပါသည်။ [3]

ထို့အပြင် ရှမ်း(မြောက်)ဒေသအတွင်း အရပ်သားများကို သေနတ်ဖြင့် ပစ်ခတ်လုပ်ကြံမှုများလည်း ရှိနေပါသည်။ ဇန်နဝါရီ ၇ ရက် နံနက်ပိုင်းက ကျောက်မဲမြို့နယ် မိုင်းငေါ့မြို့နယ်ခွဲမှ အမျိုးသမီးတဦးမှာ နေအိမ်ခြံဝင်းအတွင်း ရှိနေစဉ် သေနတ်ဖြင့် ပစ်ခတ်ခံခဲ့ရပါသည်။ ထိုအမျိုးသမီးကို ဒေသတွင်းရှိ လူမှုရေးအဖွဲ့တခုက ဆေးရုံသို့ အချိန်မီ ပို့ဆောင်ပေးနိုင်ခဲ့ပြီး အကြောင်းရင်းကို စုံစမ်းဆဲဟု ရဲတပ်ဖွဲ့က ပြောကြားခဲ့သည်။[4]

ထိုကဲ့သို့ ဖြစ်ရပ်မှာ နမ့်လန်မြို့ ကောင်းလန်ရပ်ကွက်တွင်လည်း ဇန်နဝါရီ ၁၁ ရက် ညနေပိုင်းက ဖြစ်ပွားခဲ့ပြီး လင်မယားနှစ်ဦးကို အမည်မသိ လက်နက်ကိုင်အဖွဲ့က ၎င်းတို့အိမ်တွင် သေနတ်ဖြင့် လာရောက်ပစ်ခဲ့၍ အမျိုးသမီး သေဆုံး၊ အမျိုးသား ထိခိုက်ဒဏ်ရာရခဲ့ပါသည်။ [5]

ထို့အပြင် မူဆယ်မြို့တွင် ဇန်နဝါရီ ၆ ရက် နံနက်ပိုင်းက ပြည်သူ့စစ်တပ်ဖွဲ့ဝင်များ နေထိုင်သောနေရာနှစ်ခုကို ပြောက်ကျားဝတ်လက်နက်ကိုင်အဖွဲ့က ပစ်ခတ်မှုကြောင့် နှစ်ဖက်အပြန်အလှန်ပစ်ခတ်မှု ဖြစ်ပွားခဲ့ပါသည်။ မူဆယ်မြို့ ကောင်းမှုတုံနှင့် စွမ်ဆော်ရပ်ကွက်ရှိ ဒေသတွင်းအခြေစိုက်ပြည်သူ့စစ်တပ်ဖွဲ့ဝင်များ နေထိုင်သည့် နေအိမ်နှင့် ခြံဝင်းကို ဗုံးသီး၊ သေနတ်များဖြင့် ပစ်ခတ်ခံရ၍ အပြန်အလှန်ပစ်ခတ်ခဲ့ကြပြီး အရပ်သားထိခိုက်မှု မရှိကြောင်း သိရပါသည်။ [6]

ရခိုင်ပြည်နယ်အတွင်း တိုက်ပွဲဖြစ်ပွားမှု

၂၀၂၀ ရွေးကောက်ပွဲကာလမှစ၍ တပ်မတော်နှင့် AA အဖွဲ့အကြား တိုက်ပွဲများ ရပ်တန့်သွားခဲ့သော်လည်း စစ်ကျန်လက်နက်များ ပေါက်ကွဲမှုကြောင့် အရပ်သားထိခိုက်သေဆုံးမှုများ ရှိနေဆဲဖြစ်သည်။

ဇန်နဝါရီ ၁၀ ရက်က ရခိုင်ပြည်နယ်(မြောက်ပိုင်း) မင်းပြားမြို့နယ် စပါးထားကျေးရွာတွင် လက်နက်ကြီးကျည် ပေါက်ကွဲမှု ဖြစ်ပွားခဲ့၍ ဒေသခံအမျိုးသမီးတဦး သေဆုံး၊ ရှစ်ဦး ထိခိုက်ဒဏ်ရာရရှိခဲ့ပါသည်။ ရွာအပြင်မှ ကောက်ရသည့် လက်နက်ကြီးကျည်ကို ထုကြည့်ရာမှ ပေါက်ကွဲမှု ဖြစ်ခဲ့ခြင်းဖြစ်ပြီး ဒဏ်ရာရသူများထဲတွင် ကလေးငယ်များ ပါဝင်ခဲ့ပါသည်။ [7]

ပြီးခဲ့သည့် နှစ်လကျော်အတွင်း ရခိုင်ပြည်နယ်နှင့် ချင်းတောင်ပိုင်းဒေသများတွင် အနည်းဆုံး မိုင်းပေါက်ကွဲမှု နှစ်ကြိမ်နှင့် စစ်ကျန်လက်နက်ကြီးကျည် ပေါက်ကွဲမှု တကြိမ် ဖြစ်ပွားခဲ့၍ အရပ်သား တဦး သေဆုံး၊ ၁၀ ဦး ထိခိုက်ဒဏ်ရာရရှိခဲ့ကြောင်း ဒေသတွင်း လေ့လာစောင့်ကြည့်နေသည့်အရပ်ဘက်အဖွဲ့များက ပြောကြားခဲ့သည်။

ကချင်ပြည်နယ်အတွင်း တိုက်ပွဲဖြစ်ပွားမှု

ကချင်ပြည်နယ်အတွင်း တပ်မတော်နှင့် KIO/KIA အဖွဲ့အကြား တိုက်ပွဲဖြစ်ပွားမှု မရှိခဲ့သော်လည်း ဇန်နဝါရီ ၇ ရက်က ဝိုင်းမော်မြို့နယ်ရှိ KIA စခန်းကို တပ်မတော်က လက်နက်ကြီးဖြင့် ဆယ်ကြိမ်ထက်မနည်း ပစ်ခတ်ခဲ့ကြောင်း KIA သတင်းနှင့် ပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြောကြားခဲ့သည်။

ဝိုင်းမော်မြို့အရှေ့ဘက်ရှိ KIA တပ်ရင်း(၃) နယ်မြေအတွင်းရှိ စခန်းကို ပစ်ခတ်ခဲ့ခြင်းဖြစ်သော်လည်း တပ်မတော်နှင့် KIA တို့ နောက်ဆက်တွဲ တိုက်ပွဲမဖြစ်ပွားခဲ့ကြောင်း သိရပါသည်။ [8]

တပ်မတော်နှင့် KNU တို့ တိုက်ပွဲဖြစ်ပွားမှု

စစ်ရေးတင်းမာနေသည့် တပ်မတော်နှင့် ကရင်အမျိုးသားအစည်းအရုံး(KNU) တို့သည် ပဲခူးတိုင်း ကျောက်ကြီးမြို့နယ်တွင် ယခုတပတ်တွင်လည်း တိုက်ပွဲများ ဆက်လက်ဖြစ်ပွားခဲ့ပါသည်။

တပ်မတော်နှင့် KNU တပ်မဟာ (၃)တို့အကြား တိုက်ပွဲကြောင့် ကျောက်ကြီးမြို့နယ်အတွင်းရှိ ကျေးရွာအချို့မှ ဒေသခံ ရာနှင့် ချီ၍ တောထဲသို့ ထွက်ပြေးတိမ်းရှောင်နေရကြောင်း KNU အထွေထွေအတွင်းရေးမှူးချုပ် ပဒိုစောတာဒိုမူးက အတည်ပြုခဲ့ပါသည်။ ဇန်နဝါရီ ၁၁ ရက်က ဖြစ်ပွားသော တိုက်ပွဲကြောင့် ကျောက်ကြီးမြို့နယ် ခဲဒဲကျေးရွာအုပ်စုမှ ဒေသခံများ တောထဲသို့ ထွက်ပြေးတိမ်းရှောင်ခဲ့ရခြင်း ဖြစ်ပါသည်။ [9]

ထိုကဲ့သို့ တပ်မတော်နှင့် KNU တပ်မဟာများ အကြား စစ်ရေးတင်းမာမှုကြောင့် ယခုနှစ်ပတ်အတွင်း ဒေသခံ ကရင်တိုင်းရင်းသား ထောင်နှင့် ချီ၍ ထွက်ပြေးတိမ်းရှောင်နေရပါသည်။ [10] KNU တပ်မဟာ(၅) ထိန်းချုပ်ရာ ကရင် ပြည်နယ် ဖာပွန်ခရိုင်၊ တပ်မဟာ(၁)၏ မွန်ပြည်နယ် သထုံခရိုင်တို့တွင် ၂၀၂၀ ပြည့်နှစ် ဒီဇင်ဘာ လဆန်းပိုင်းကတည်းက စစ်ရေးတင်းမာနေပြီး ယခုအခါ တပ်မဟာ(၃) နယ်မြေ ပဲခူးတိုင်း ညောင်လေးပင်ခရိုင်တွင်ပါ ပစ်ခတ်မှုများ ဖြစ်ပေါ်လာခြင်း ဖြစ်သည်။

၂၀၂၀ ပြည့်နှစ် ဇန်နဝါရီ ဒုတိယပတ်အတွင်း ဖြစ်ပွားခဲ့သည့် တိုက်ပွဲသတင်းများ၏ အပြည့်အစုံကို ယခု link တွင် ကြည့်နိုင်ပါသည်။

[1] သျှမ်းသံတော်ဆင့် (ဇန်နဝါရီ ၇ ၊ ၂၀၂၁)  “RCSS/SSA နှင့် TNLAတိုက်ပွဲကြောင့် အရပ်သား နေအိမ် (၆၀) ကျည်ထိမှန်”

[2] RFA (ဇန်နဝါရီ ၇ ၊ ၂၀၂၁)  “နမ္မတူမှာ ရှမ်းနဲ့ တအာင်းတပ်ဖွဲ့တွေ တိုက်ပွဲဆက်ဖြစ်နေ”

[3] သျှမ်းသံတော်ဆင့် (ဇန်နဝါရီ ၇ ၊ ၂၀၂၁)  “RCSS/SSA နှင့် TNLA တိုက်ပွဲကြောင့် အရပ်သား (၃၇၀၀)ကျော် ထွက်ပြေးနေရ”

[4] 7 Day Daily (ဇန်နဝါရီ ၉ ၊ ၂၀၂၁)  “ကျောက်မဲတွင် အမျိုးသမီးတစ်ဦး သေနတ်ဖြင့် ပစ်ခတ်ခံရ”

[5] သျှမ်းသံတော်ဆင့် (ဇန်နဝါရီ ၁၂ ၊ ၂၀၂၁)  “နမ့်လန်မြို့ လင်မယား ၂ဦးသေနတ်ပစ်ခံရ၊ အမျိုးသမီးသေဆုံး”

[6] 7 Day Daily (ဇန်နဝါရီ ၇ ၊ ၂၀၂၁)  “မူဆယ်မြို့ပေါ်တွင် ပစ်ခတ်မှုဖြစ်”

[7] BBC Burmese (ဇန်နဝါရီ ၁၃ ၊ ၂၀၂၁)  “ရခိုင်မှာ စစ်ကျန် လက်နက်ခဲယမ်း ပေါက်ကွဲမှုတွေကြောင့် အရပ်သား ထိခိုက်သေဆုံးမှုတွေ ရှိနေဆဲ”

[8] 7 Day Daily (ဇန်နဝါရီ ၈ ၊ ၂၀၂၁)  “ဝိုင်းမော်မြို့နယ်ရှိ KIA တပ်စခန်းအား တပ်မတော်က လက်နက်ကြီးဖြင့် ဆယ်ကြိမ်ထက်မနည်းပစ်ခတ်ဟု အဖွဲ့တာဝန်ရှိသူ ပြော”

[9] 7 Day Daily (ဇန်နဝါရီ ၁၂ ၊ ၂၀၂၁)  “တပ်မတော်နှင့် KNU တိုက်ပွဲဖြစ်ပွား၍ ကျောက်ကြီးဒေသခံ ၅၀၀ ကျော် တောထဲသို့ ထွက်ပြေးတိမ်းရှောင်”

[10] RFA (ဇန်နဝါရီ ၁၃ ၊ ၂၀၂၁)  တပ်နဲ့ KNU တိုက်ပွဲကြောင့် ကရင်ဒေသခံ လေးထောင်ကျော် ထွက်ပြေးနေရ”

The post တိုက်ပွဲဖြစ်ပွားမှုများ (ဇန်နဝါရီ ဒုတိယပတ်) appeared first on ISP Myanmar Peace Desk.

အဆိုပါထုတ်ပြန်ချက်များတွင် တပ်မတော်မှ “ဒုတိယအကြိမ် ပြည်ထောင်စုလွှတ်တော်အထူးအစည်းအဝေး ခေါ်ယူကျင်းပပေးရန် လွှတ်တော်ကိုယ်စားလှယ် လေးပုံတပုံက တောင်းဆိုကြောင်း” ထုတ်ပြန်ချက်အပါအဝင် ထုတ်ပြန်ချက် ခုနစ်ခုအထိ ထုတ်ပြန်ခဲ့ပါသည်။ ထို့အပြင် ပါတီများမှ လေးခု၊ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာနမှ တခုနှင့် ကရင်အမျိုးသားအစည်းအရုံး (KNU)နှင့် အရပ်ဘက်အဖွဲ့အစည်းများမှ နှစ်ခုစီ အသီးသီး ထုတ်ပြန်ခဲ့ကြရာ သတိပြု အာရုံစိုက်ရမည့် ထုတ်ပြန်ချက် အချို့ကို ISP-Myanmar Peace Desk က အနှစ်ချုပ် ဖော်ပြထားပါသည်။

ပြည်ထောင်စုအစိုးရ၏ ထုတ်ပြန်ချက်

စီမံကိန်း၊ ဘဏ္ဍာရေးနှင့် စက်မှုဝန်ကြီးဌာနမှ “ကိုဗစ်-၁၉ ကာကွယ်ဆေး ဝယ်ယူရရှိရေး ရန်ပုံငွေ ထူထောင်ထားရှိမှုနှင့် ပတ်သက်၍ အသိပေးကြေညာချက်” ကို ဇန်နဝါရီ ၅ ရက်စွဲဖြင့် ထုတ်ပြန်ခဲ့ပါသည်။

အဆိုပါအသိပေးကြေညာချက်အရ “ကာကွယ်ဆေးဝယ်ယူရေးအတွက် ပြည်တွင်း/ပြည်ပမှ ပါဝင်လှူဒါန်းလိုကြသော ပြည်သူများ၊ အဖွဲ့အစည်းများ အနေဖြင့် မြန်မာ့စီးပွားရေးဘဏ် (နေပြည်တော်)ရှိ ကိုဗစ်-၁၉ ကာကွယ်ဆေး ဝယ်ယူရရှိရေးရန်ပုံငွေသို့ မည်သည့် နိုင်ငံခြားငွေ အမျိုးအစားကိုမဆို ထည့်ဝင်လှူဒါန်းနိုင်ကြောင်းနှင့် ကိုဗစ်-၁၉ ကာကွယ်ဆေး ဝယ်ယူရရှိရေးရန်ပုံငွေသို့လည်း မြန်မာကျပ်ငွေဖြင့် ထည့်ဝင်လှူဒါန်းနိုင်ပါကြောင်း” သိရပါသည်။

တပ်မတော်၏ ထုတ်ပြန်ချက်များ

ဇန်နဝါရီ ဒုတိယပတ်ကာလအတွင်း တပ်မတော်မှ “ဒုတိယအကြိမ် ပြည်ထောင်စုလွှတ်တော်အထူးအစည်းအဝေး ခေါ်ယူကျင်းပပေးရန် လွှတ်တော်ကိုယ်စားလှယ် လေးပုံတစ်ပုံက တောင်းဆိုကြောင်း” ထုတ်ပြန်ချက် အပါအဝင် ထုတ်ပြန်ချက် ခုနစ်ခုအထိ ထုတ်ပြန်ခဲ့ပါသည်။

“ဒုတိယအကြိမ် ပြည်ထောင်စုလွှတ်တော် အထူးအစည်းအဝေး ခေါ်ယူ ကျင်းပပေးရန် လွှတ်တော်ကိုယ်စားလှယ် လေးပုံတပုံကတောင်းဆိုကြောင်း” သတင်းထုတ်ပြန်ချက်ကို တပ်မတော်က ဇန်နဝါရီ ၁၁ ရက်စွဲဖြင့် ထုတ်ပြန်ခဲ့ခြင်း ဖြစ်သည်။

အဆိုပါထုတ်ပြန်ချက်တွင် “ကျန်ရှိနေသည့် ဒုတိယအကြိမ် လွှတ်တော် သက်တမ်း၌ လွှတ်တော်ကိုယ်စားလှယ်များ၏ အခွင့်အရေး မဆုံးရှုံးစေရန်၊ ကျင်းပပြီးစီးခဲ့သည့် ရွေးကောက်ပွဲဆိုင်ရာ ပြဿနာများကို လွှတ်တော်တွင် တင်ပြဆွေးနွေးနိုင်ရန်၊ ရွေးကောက်ပွဲဆိုင်ရာ ကိစ္စရပ်များနှင့် စပ်လျဉ်း၍ နိုင်ငံတော်အခြေခံမူများ မပျက်ယွင်းအောင် ပြည်ထောင်စု လွှတ်တော်က ထိန်းကျောင်းဆောင်ရွက်နိုင်ရန် ရည်ရွယ်ချက်ဖြင့် ဖွဲ့စည်းပုံအခြေခံဥပဒေ ပုဒ်မ ၈၄၊ ပြည်ထောင်စုလွှတ်တော်ဆိုင်ရာဥပဒေ ပုဒ်မ ၁၇တို့နှင့်အညီ ပြည်ထောင်စု လွှတ်တော်ကိုယ်စားလှယ် စုစုပေါင်း၏ လေးပုံတပုံကျော်ဖြစ်သော လွှတ်တော် ကိုယ်စားလှယ် ပေါင်း ၂၀၃ ဦးတို့က ၂၀၂၁ ခုနှစ်၊ ဇန်နဝါရီ ၁၁ရက်တွင် ပြည်ထောင်စုလွှတ်တော်နာယကထံ စုစည်းတောင်းဆို တင်ပြခဲ့ကြောင်း” ဖော်ပြထားပါသည်။

ထို့အပြင် တပ်မတော်မှ ဇန်နဝါရီ ၇ရက်စွဲဖြင့် “ရွေးကောက်ပွဲပြုလုပ်ရန် ကျန်ရှိသည့် မြို့နယ်များ၌ ရွေးကောက်ပွဲများ ကျင်းပနိုင်ရေးနှင့် ပတ်သက်သည့် ထုတ်ပြန်ချက်”တခု ထွက်ရှိခဲ့ပါသည်။

အဆိုပါထုတ်ပြန်ချက်တွင် “နိုင်ငံသူ၊ နိုင်ငံသားများ၏ ဒီမိုကရေစီအခွင့်အရေးများ မဆုံးရှုံးစေရေးနှင့် ဒေသကို ကိုယ်စားပြုမည့် လွှတ်တော်ကိုယ်စားလှယ်များမှ တဆင့် မိမိတို့၏ ဒီမိုကရေစီအခွင့်အရေးများကို ဖော်ဆောင် နိုင်ရေးတို့အတွက် ရွေးကောက်ပွဲကျင်းပရန် ကျန်ရှိခဲ့သည့် ရခိုင်ပြည်နယ်မှ ကိုးမြို့နယ်နှင့် ရှမ်းပြည်နယ်မှ မိုင်းကိုင်မြို့နယ်တို့တွင် ရွေးကောက်ပွဲများ ဆောလျင်စွာ အမြန်ဆုံးကျင်းပပေးနိုင်ရေး သက်ဆိုင်ရာ အဖွဲ့အစည်များသို့ အလေးထား တိုက်တွန်းကြောင်း” ဖော်ပြထားပါသည်။

ဆက်လက်ပြီး တပ်မတော်သတင်းမှန်ပြန်ကြားရေးအဖွဲ့က ၂၀၂၀ရွေးကောက်ပွဲ မဲစာရင်းများ စိစစ်တွေ့ရှိချက်နှင့် ပတ်သက်၍ ၂၀၂၁ ခုနှစ် ဇန်နဝါရီ ၅ ရက်မှ ၉ ရက်အထိ သတင်းထုတ်ပြန်ချက် ငါးခုအထိ ထွက်ရှိခဲ့ပါသည်။

တိုင်းရင်းသားလက်နက်ကိုင်အဖွဲ့များ၏ ထုတ်ပြန်ချက် 

ကရင်အမျိုးသားအစည်းအရုံး(KNU)မှ ဇန်နဝါရီ ၈ ရက်စွဲဖြင့် “ အပစ်အခတ်ရပ်စဲရေးခိုင်မာမှုဆိုင်ရာ လုပ်ငန်းစဉ်များနှင့် ပတ်သက်၍ သတင်းထုတ်ပြန် ကြေညာချက်” တခုထွက်ရှိခဲ့ပါသည်။

အချက်ငါးချက်ပါ ထိုထုတ်ပြန်ချက်တွင် “ ပြည်သူများက အပစ်အခတ်ရပ်စဲရေးလုပ်ငန်းစဉ်အပေါ် ယုံကြည်မှု ကျဆင်းလာခြင်းနှင့် လက်နက်ကိုင်ပဋိပက္ခများ ပြန်လည် တိုးပွားမသွားရေးအတွက် ပြေလည်နိုင်ရေးနည်းလမ်းသည် NCA ပါ ပြဌာန်းချက်များကို အခြေခံသည့် နှစ်ဖက်တပ်များအကြား တွေ့ဆုံ ညှိနှိုင်းအဖြေရှာခြင်းသာဖြစ်သည်ဟု KNU က ယုံကြည်ကြောင်း” ဖော်ပြထားပါသည်။

ယင်းနောက် “KNU သည် NCA အကောင်အထည်ဖော်ဆောင်ရွက်ခြင်းလုပ်ငန်းစဉ်များအား အောင်မြင်စွာ လုပ်ကိုင်ဆောက်ရွက်ခြင်းဖြင့် အပစ်အခတ် ရပ်စဲရေးခိုင်မာခြင်း၊ မှန်ကန်ပြီးတရားမျှတသည့် နိုင်ငံရေးဆွေးနွေးညှိနှိုင်းမှုများဖြင့် ရေရှည်တည်တံ့ခိုင်မြဲသည့် နိုင်ငံရေးသဘောတူညီမှုရလဒ်များရရှိရေးကို တစိုက်မတ်မတ် ကြိုးစားနေကြောင်း” KNU ၏ ထုတ်ပြန်မှုတွင် ပါရှိပါသည်။

ထို့ပြင် KNU မူတြော်၊ (ဖာပွန်)ခရိုင် အမြဲတမ်းကော်မတီမှ ဇန်နဝါရီ ၇ ရက်စွဲဖြင့် “ မူတြော် (ဖာပွန်)ခရိုင်၊ ဒွဲလိုမြို့နယ်ရှိ ပြည်သူလူထုများမှ ဆန္ဒပြတောင်းဆိုမှုနှင့် ပတ်သက်၍ ထုတ်ပြန်ချက်” တခု ထွက်ရှိခဲ့ပါသည်။

အဆိုပါထုတ်ပြန်ချက်တွင် “ ဒွဲလိုနှင့် လူသောမြို့နယ်များမှ ပြည်သူလူထုများက တပ်မတော်မှ တပ်စခန်းများရုပ်သိမ်းပေးရန်၊ စစ်ဆင်ရေး လမ်းဖောက်လုပ်ခြင်းအား ရပ်တန့်ပေးရန်၊ ဒရုန်းဖြင့် စုံစမ်းထောက်လှမ်းမှုများနှင့် ပြည်သူလူထု လယ်ယာလုပ်ငန်းများနှင့် ကျေးရွာများအတွင်း လက်နက်ကြီး၊ လက်နက်ငယ်များဖြင့် ပစ်ခတ်ခြင်းစသည့် လုပ်ဆောင်မှုတို့ကို ရပ်တန့်ပေးရန် နှစ်ကြိမ်တိုင်တိုင် တောင်းဆိုဆန္ဒပြခဲ့ကြကြောင်း” ဖော်ပြခဲ့ပါသည်။

ယင်းနောက် “ တပ်မတော်မှ အမှန်တကယ်ငြိမ်းချမ်းရေးကို လိုလားသည်ဆိုပါက ပြည်သူလူထုတောင်းဆိုချက်များကို လေးစားလိုက်နာရမည် ဖြစ်ပြီး လိုက်နာ ဆောင်ရွက်မှုမရှိပါက ပြည်သူလူထု၏ အကျိုးစီးပွားနှင့် ဘ၀လုံခြုံရေးအား အကာအကွယ်ပေးရန် မိမိတို့ကော်မတီမှ လုပ်ဆောင်သွားမည် ဖြစ်ကြောင်း” ထုတ်ပြန်မှုတွင် ပါရှိပါသည်။

ပါတီများ၏ ထုတ်ပြန်ချက်

ယခုရက်သတ္တပတ်အတွင်း ပါတီများမှ ကြေညာချက် လေးခုအထိ ထုတ်ပြန်ခဲ့ပါသည်။

ကချင်ပြည်သူ့ပါတီ(KSPP)မှ “(၇၃)ကြိမ်မြောက် ကချင်ပြည်နယ်နေ့ အထိမ်းအမှတ် ထုတ်ပြန်ချက်” ကို ဇန်နဝါရီ ၁၀ ရက်စွဲဖြင့် ထုတ်ပြန်ခဲ့ပါသည်။

အဆိုပါထုတ်ပြန်ချက်တွင် “ကိုယ်ပိုင်ပြဌာန်းခွင့်၊ ကိုယ်ပိုင်စီမံအုပ်ချုပ်ခွင့်နှင့် အမျိုးသားတန်းတူအခွင့်အရေး ဆုံးရှုံးရခြင်းကြောင့် ပေါ်ပေါက်လာသော လက်နက်ကိုင်ပဋိပက္ခများကို နိုင်ငံရေးတွေ့ဆုံဆွေးနွေးခြင်းဖြင့် အဖြေရှာရန် လိုအပ်ကြောင်းနှင့် ကချင်ပြည်သူ့ပါတီ(KSPP) သည် ၁၉၄၇ ပင်လုံစာချုပ်ပါ ကတိကဝတ်နှင့်အညီ တည်ဆောက်သော ဖက်ဒရယ်ပြည်ထောင်စု ဖြစ်တည်လာရေးအတွက် တိုင်းရင်းသားပါတီများ၊ ပြည်တွင်း အဖွဲ့အစည်းများ၊ ပြည်နယ် အတွင်းရှိ တိုင်းရင်းသားအားလုံးနှင့် လက်တွဲ၍ ကြိုးပမ်းသွားမည်ဖြစ်ကြောင်း” ဖော်ပြထားပါသည်။

ထို့အပြင် အမျိုးသားဒီမိုကရေစီအင်အားစု(NDF)ပါတီက တတိယအကြိမ် လွှတ်တော်များ ခေါ်ယူခြင်းနှင့် ပတ်သက်၍ သဘောထားထုတ်ပြန်ချက်ကို ဇန်နဝါရီ ၇ ရက်စွဲဖြင့် ထုတ်ပြန်သကဲ့သို့ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီကလည်း ၂၀၁၅ ရွေးကောက်ပွဲတွင် အသုံးပြုခဲ့သော မဲလက်မှတ်များ အပါအဝင် စာရွက်စာတမ်းများကို ဖျက်ဆီးခြင်းအား ဆိုင်းငံ့ထားရန် ဇန်နဝါရီ ၆ ရက်စွဲဖြင့် သဘောထား ထုတ်ပြန်ခဲ့ပါသည်။

အရပ်ဘက်အဖွဲ့အစည်းများ၏ ထုတ်ပြန်ချက်

ဇန်နဝါရီ ပထမပတ်ကာလအတွင်း ကရင်လူ့အခွင့်အရေးအဖွဲ့(KHRG)မှ ဇန်နဝါရီ ၅ရက်စွဲဖြင့် “ဧရာဝတီတိုင်းအတွင်းရှိ စောဘဦးကြီး၏ ရုပ်တုအား ဖိအားပေးဖြုတ်ချစေခြင်း အပေါ် ထုတ်ပြန်ချက်” တခုထွက်ရှိခဲ့ ပါသည်။

အဆိုပါထုတ်ပြန်ချက်တွင် “ကရင်တိုင်းရင်းသားအမျိုးသားခေါင်းဆောင်၏ ရုပ်တုကို အတင်းအဓ္ဓမ ဖိအားပေး ဖယ်ရှားစေမှုနှင့်ပတ်သက်၍ ကရင် လူ့အခွင့်အရေးအဖွဲ့မှ ပြင်းပြင်းထန်ထန် ရှုတ်ချကြောင်းနှင့် အာဏာပိုင်များမှ ၂၀၁၅ ခုနှစ် တိုင်းရင်းသားလူမျိုးများ၏ အခွင့်အရေး ကာကွယ်စောင့်ရှောက် သည့် ဥပဒေတွင် ဖော်ပြထားသည် နှင့်အညီ တိုင်းရင်းသားလူမျိုးစုများမှ ၎င်းတို့၏ သမိုင်းအမွေအနှစ်များကို ထိန်းသိမ်းစောင့်ရှောက်ခွင့်ပေးရန် တောင်းဆိုကြောင်း” ဖော်ပြခဲ့ပါသည်။

ထို့အပြင် မြန်မာတနိုင်လုံးရှိ အရပ်ဘက်အဖွဲ့အစည်းများကလည်း ဇန်နဝါရီ ၁၀ ရက်စွဲဖြင့် “လူ့အခွင့်အရေးတက်ကြွလှုပ်ရှားသူများအပေါ် လူ့အခွင့်အရေး ချိုးဖောက်ခံရမှုများနှင့် ပတ်သက်၍ ပူးတွဲသဘောထားထုတ်ပြန်ချက်” ထွက်ရှိခဲ့ပါသည်။

အဆိုပါထုတ်ပြန်ချက်တွင် “နိုင်ငံတော်အနေဖြင့် ကျန်ရှိနေသေးသော နိုင်ငံရေးအကျဉ်းသားများအား လွှတ်ပေးရန်နှင့် ငြိမ်းချမ်းစွာ တက်ကြွလှုပ်ရှားမှု ကြောင့် တရားစွဲဆိုခံထားရသည့်သူများ၏ စွဲချက်များကို ရုပ်သိမ်းပေးရန် လိုအပ်ကြောင်း၊ ၎င်းအပြင် ယခုကဲ့သို့ တရားစွဲဆိုနိုင်ရန် ခွင့်ပြုထားသော ဖိနှိပ်ချုပ်ချယ်သည့် ဥပဒေများကိုလည်း နောင်လာမည့် လွှတ်တော် အစည်းအဝေးများတွင် ပြင်ဆင်ပြဌာန်းရန် တိုက်တွန်းကြောင်း” ဖော်ပြခဲ့ပါသည်။

၂၀၂၁ ခုနှစ် ဇန်နဝါရီဒုတိယပတ်အတွင်း ထွက်ရှိခဲ့သော ထုတ်ပြန်ချက်များ၏ အပြည့်အစုံကို ယခု link တွင် ကြည့်နိုင်ပါသည်။

The post ထုတ်ပြန်ကြေညာချက်များ (ဇန်နဝါရီ ဒုတိယပတ်) appeared first on ISP Myanmar Peace Desk.

ထို့အပြင် တပ်မတော်နှင့် မြောက်ပိုင်းမဟာမိတ်သုံးဖွဲ့တို့က အပစ်ရပ်ကြေညာမှုများ သက်တမ်းတိုးခဲ့ခြင်း၊ အစိုးရနှင့် ငြိမ်းချမ်းရေးဆွေးနွေးမှု ခရီးရောက်စေရန် NCA လက်မှတ်ထိုး တိုင်းရင်းသားလက်နက်ကိုင် ၁၀ ဖွဲ့၏ PPST စုဖွဲ့မှုကို ပြုပြင်ပြောင်းလဲမည်ဟု သိရခြင်း စသည့်သတင်းများလည်း ရှိခဲ့ပါသည်။

NCA လက်မှတ် မထိုးရသေးသောအဖွဲ့များ၏ ဆောင်ရွက်မှု

ယခုလအတွင်း ကျိုင်းတုံ (သို့မဟုတ်) မြစ်ကြီးနား၌ တွေ့ဆုံ၍ အပစ်ရပ်စဲရေး ဆွေးနွေးရန် မြောက်ပိုင်းလက်နက်ကိုင်လေးဖွဲ့အား အစိုးရက အဆိုပြုထားသည့်သတင်းများကို သတင်းဌာနများက ဖော်ပြခဲ့ကြပါသည်။

အစိုးရနှင့် မြောက်ပိုင်းလက်နက်ကိုင်လေးဖွဲ့ဖြစ်သော KIO/KIA ၊ PSLF/TNLA ၊ MNTJP/MNDAA၊ ULA/AA တို့၏ အပစ်ရပ်စဲရေး ဆွေးနွေးပွဲကို ကျိုင်းတုံမြို့ (သို့မဟုတ်) မြစ်ကြီးနားမြို့၌ တွေ့ဆုံ၍ အပစ်အခတ် ရပ်စဲရေး ဆွေးနွေးရန် အစိုးရဘက်က အဆိုပြုထားကြောင်း ငြိမ်းချမ်းရေးဆွေးနွေးရေးအကျိုးဆောင်အဖွဲ့ (PCG)မှ ဦးလမိုင်ဂွန်ဂျာက ပြောကြားခဲ့သည်။ [1]

အစိုးရ၏ အဆိုပြုမှုကို မြောက်ပိုင်းလေးဖွဲ့ဘက်မှ တရားဝင်အကြောင်းပြန်ကြားခြင်းမရှိသေးသော်လည်း ယခုလအတွင်း ဖြစ်အောင်လုပ်မည်ဟု ပြောထားကြောင်း ဦးလမိုင်ဂွန်ဂျာက ပြောကြားခဲ့သည်။ အစိုးရနှင့် မြောက်ပိုင်းလက်နက်ကိုင်လေးဖွဲ့တို့၏ အပစ်ရပ်စဲရေး တရားဝင်ဆွေးနွေးမှုကို ၂၀၁၉ ခုနှစ်ဧပြီက မူဆယ်မြို့၌ စတင်ပြုလုပ်ခဲ့ပြီးနောက် မိုင်းလား၊ ကျိုင်းတုံနှင့် တရုတ်နိုင်ငံ ကူမင်းမြို့တို့၌ တွေ့ဆုံမှုများ ဆက်လက်လုပ်ဆောင်ခဲ့သော်လည်း ပြေလည်မှုမရခဲ့ဘဲ ဆွေးနွေးပွဲများ ရပ်ဆိုင်းသွားသည်မှာ တနှစ်ကျော်ပြီ ဖြစ်သည်။

ထို့အပြင် PSLF/TNLA အဖွဲ့၊ MNTJP/MNDAA အဖွဲ့၊ ULA/AA အဖွဲ့တို့က တဖက်သတ်အပစ်အခတ်ရပ်စဲခြင်း အား နှစ်လတာ ထပ်မံသက်တမ်းတိုးမြှင့်ကြောင်း ဇန်နဝါရီ ၁ ရက်တွင် ပူးတွဲထုတ်ပြန်ခဲ့ကြောင်း သိရပါသည်။ [2]မြောက်ပိုင်းမဟာမိတ်သုံးဖွဲ့သည် ၂၀၁၉ ခုနှစ် စက်တင်ဘာ ၉ ရက်ကစ၍ အပစ်ရပ်ကြေညာမှု စတင်ခဲ့ပြီး သက်တမ်းကုန်ဆုံးချိန်ရောက်တိုင်း ထပ်မံသက်တမ်းတိုးမြှင့်ခဲ့ရာ ယခုနှစ် ဇန်နဝါရီ ၁ ရက်မှ ဖေဖော်ဝါရီ ၂၈ ရက်အထိ တိုးမြှင့်ခဲ့ခြင်း ဖြစ်သည်။

နောက်ထပ်သတင်းတပုဒ်မှာ ULA/AA အဖွဲ့မှ ၎င်းတို့ ဖမ်းဆီးထားသည့်  ရခိုင်ပြည်လွတ်မြောက်ရေးပါတီ (ALP/ALA) အဖွဲ့ဝင် လေးဦးကို ပြန်လွှတ်ပေးခဲ့ခြင်း ဖြစ်ပါသည်။ [3] ၂၀၂၀ ပြည့်နှစ် မေ ၂၃ ရက် ညပိုင်းတွင် ALP/ALA အဖွဲ့ဝင်လေးဦးကို ရခိုင်ပြည်နယ် ပေါက်တောမြို့နယ် ၊ ရဗက်ချိုင်ရွာရှိ ၎င်းတို့နေအိမ်၌ AA အဖွဲ့ဝင်များက လာရောက်ဖမ်းဆီးခေါ်ဆောင်သွားခဲ့ခြင်းဖြစ်သည်။

NCA လက်မှတ်ထိုးထားသည့်အဖွဲ့များ၏ ဆောင်ရွက်မှု

အစိုးရ ဆွေးနွေးရေးကိုယ်စားလှယ်အဖွဲ့နှင့် ကရင်အမျိုးသားအစည်းအရုံး (KNU) တို့ တွေ့ဆုံဆွေးနွေးပွဲကို ယခုလအတွင်းပြုလုပ်ရန် အစိုးရက အဆိုပြုထားကြောင်း သိရပါသည်။[4] Bilateral ဆွေးနွေးပွဲပြုလုပ်ရန် အမျိုးသားပြန်လည်သင့်မြတ်ရေးနှင့် ငြိမ်းချမ်းရေး ဗဟိုဌာန (NRPC) က KNU ထံ  ဒီဇင်ဘာ စတုတ္ထပတ်တွင် ဖိတ်ကြားခဲ့ခြင်းဖြစ်သည်ဟု ငြိမ်းချမ်းရေးကော်မရှင်အကြံပေးဦးလှမောင်ရွှေက ပြောကြားခဲ့သည်။ ယခုတွေ့ဆုံမှုတွင် တပ်မတော်နှင့် KNU တပ်မဟာအချို့အကြား ထိတွေ့ပစ်ခတ်မှုများ ပဋိပက္ခများ ဖြစ်ပွားနေခြင်းကိစ္စ၊ NCA အရ ဆောင်ရွက်သည့် ငြိမ်းချမ်းရေးလုပ်ငန်းစဉ် ရှေ့ဆက်အကောင်အထည်ဖော်နိုင်ရေးကိစ္စတို့ ထည့်သွင်းဆွေးနွေးရန် စီစဉ်ထားပါသည်။

နောက်ထပ်သတင်းတပုဒ်မှာ အစိုးရနှင့် ငြိမ်းချမ်းရေးဆွေးနွေးမှုများ ထိရောက်မြန်ဆန်စွာ ဆောင်ရွက်နိုင်ရေးအတွက် NCA လက်မှတ်ထိုး တိုင်းရင်းသားလက်နက်ကိုင် ၁၀ ဖွဲ့ ခေါင်းဆောင်များဖြင့် ဖွဲ့စည်းထားသော ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) စုဖွဲ့မှုကို ပြုပြင်ပြောင်းလဲမည်ဟု သိရပါသည်။ [5]

PPST အဖွဲ့ဝင်တဦးဖြစ်သူ NLO/PNLA အဖွဲ့နာယက ဗိုလ်မှူးကြီးခွန်ဥက္ကာက PPST စုဖွဲ့မှု ပြုပြင်ပြောင်းလဲရေးအတွက် မူကြမ်းရေးထားပြီးဖြစ်သော်လည်း အတည်ပြုနိုင်ရန် NCA လက်မှတ်ထိုး ၁၀ ဖွဲ့ ထိပ်သီးခေါင်းဆောင်များ ညီလာခံကျင်းပနိုင်ရန် လိုအပ်ကြောင်း ပြောကြားခဲ့သည်။ PPST သည် အစိုးရနှင့် ငြိမ်းချမ်းရေး ဆွေးနွေးနိုင်ရန် မူဝါဒဆိုင်ရာ ဆုံးဖြတ်ချက် ချမှတ်သည့် အစုအဖွဲ့ဖြစ်သော်လည်း အမြဲတမ်း စုစည်းနိုင်သည့်ယန္တရား မရှိဘဲ အစည်းအဝေးကျင်းပမှသာ ဆုံးဖြတ်ချက်များ ချမှတ်ဆောင်ရွက်နိုင်သော အားနည်းချက်ရှိသည်ဟု သုံးသပ်မှုများ ရှိနေပါသည်။

ထို့ပြင် တပ်မတော်က တိုင်းရင်းသားလက်နက်ကိုင်အဖွဲ့များနှင့် ငြိမ်းချမ်းရေးလုပ်ငန်းစဉ်များ ချောမွေ့ အောင်မြင်စွာ ဆောင်ရွက်နိုင်ရေးနှင့် ကိုဗစ်-၁၉ ရောဂါကာကွယ်ထိန်းချုပ်ကုသရေးလုပ်ငန်းများကို လွယ်ကူစွာ ဆောင်ရွက်နိုင်ရေးအတွက် စစ်ရေးဆိုင်ရာလှုပ်ရှားမှုများကို ဇန်နဝါရီ ၁ ရက်မှ ၃၁ ရက်အထိ ထပ်မံတိုးမြှင့်ရပ်ဆိုင်းပေးသွားမည်ဖြစ်ကြောင်း ၂၀၂၀ ပြည့်နှစ် ဒီဇင်ဘာ ၃၁ ရက်တွင် ထုတ်ပြန်ခဲ့ပါသည်။[6]

၂၀၂၁ ခုနှစ်  ဇန်နဝါရီ ပထမပတ်ကာလအတွင်း သက်ဆိုင်ရာ အင်အားစုအသီးသီးက ဆောင်ရွက်ခဲ့ကြသည့် ငြိမ်းချမ်းရေးကြိုးပမ်းမှုဖြစ်စဉ်များ၏ အပြည့်အစုံကို ယခု link တွင် ကြည့်နိုင်ပါသည်။

[1] 7 Day Daily (ဇန်နဝါရီ ၆ ၊ ၂၀၂၁)  “ကျိုင်းတုံ (သို့မဟုတ်) မြစ်ကြီးနား၌ တွေ့ဆုံ၍ အပစ်ရပ်စဲရေး ဆွေးနွေးရန် မြောက်ပိုင်းလေးဖွဲ့အား အစိုးရအဆိုပြု”

[2] 7 Day Daily (ဇန်နဝါရီ ၂ ၊ ၂၀၂၁) “မြောက်ပိုင်းလက်နက်ကိုင်သုံးဖွဲ့က အပစ်ရပ် နှစ်လထပ်မံသက်တမ်း တိုးကြောင်း ထုတ်ပြန်”

[3] ဧရာ၀တီ (ဇန်နဝါရီ ၂ ၊ ၂၀၂၁)  “ဖမ်းဆီးထားသည့် ALP တပ်ဖွဲ့ဝင် ၄ ဦးကို AA ပြန်လွှတ်” https://burma.irrawaddy.com/news/2021/01/02/235882.html

[4] 7 Day Daily ( ဇန်နဝါရီ ၇ ၊ ၂၀၂၁)  “ဇန်နဝါရီလအတွင်း KNU နှင့် တွေ့ဆုံဆွေးနွေးရန် အစိုးရ အဆိုပြုထား”

[5] 7 Day Daily (ဇန်နဝါရီ ၅ ၊ ၂၀၂၁) “အစိုးရနှင့် ငြိမ်းချမ်းရေးဆွေးနွေးမှု ခရီးရောက်စေရန် အပစ်ရပ် ၁၀ ဖွဲ့၏ PPST စုဖွဲ့မှုကို ပြုပြင်ပြောင်းလဲမည်”

[6] တပ်မတော်သတင်းမှန်ပြန်ကြားရေးအဖွဲ့ (ဒီဇင်ဘာ ၃၁ ၊ ၂၀၂၀) “ပစ်ခတ်တိုက်ခိုက်မှုရပ်စဲရေးနှင့် ထာ၀ရငြိမ်းချမ်းရေးအတွက် ထုတ်ပြန်ချက်” http://dsinfo.org/node/625

The post ငြိမ်းချမ်းရေးကြိုးပမ်းမှုဖြစ်စဉ်များ (ဇန်နဝါရီ ပထမပတ်) appeared first on ISP Myanmar Peace Desk.