ထုတ်ပြန်ကြေညာချက်များ (ဇန်နဝါရီ တတိယပတ်)

Post By Pan Su Wai, On January 19, 2021

၂၀၂၁ ခုနှစ် ဇန်နဝါရီ ၁၂ ရက်မှ ၁၈ ရက်အထိ (ဇန်နဝါရီ တတိယပတ်) ကာလအတွင်း ပြည်ထောင်စုအစိုးရ၊ တပ်မတော်၊ တိုင်းရင်းသားလက်နက်ကိုင်အဖွဲ့များ၊ ပါတီများ၊ နိုင်ငံတကာအဖွဲ့အစည်းများနှင့် အရပ်ဘက် အဖွဲ့အစည်းများမှ စုစုပေါင်း ၂၀ ခုထက် မနည်းသော ထုတ်ပြန်ကြေညာချက်များ ထွက်ရှိခဲ့ပါသည်။

အဆိုပါထုတ်ပြန်ချက်များတွင် တပ်မတော်မှ “မဲဝိုင်ကျေးရွာ ဘုန်းတော်ကြီး ကျောင်းတွင်‌ နေထိုင်လျက်ရှိသည့် အပြစ်မဲ့ကလေးငယ်တဦးအား KNLA တပ်မဟာ (၅)အဖွဲ့က လက်ဖြောင့်သေနတ်ဖြင့် ပစ်ခတ်ခဲ့ကြောင်း” ထုတ်ပြန်ချက် အပါအဝင် ထုတ်ပြန်ချက် ၁၀ ခုအထိ ထုတ်ပြန်ခဲ့ပါသည်။ ထို့အပြင် တိုင်းရင်းသားလက်နက်ကိုင်အဖွဲ့များမှ ငါးခု၊ ပါတီများမှ နှစ်ခုနှင့် ပြည်ထောင်စု လွှတ်တော်ရုံး၊ ယူနီဆက်မြန်မာနှင့် ကရင်ငြိမ်းချမ်းရေး အထောက်အကူပြု ကွန်ယက် (KPSN)တို့မှ တခုစီ အသီးသီး ထုတ်ပြန်ခဲ့ကြရာ သတိပြုအာရုံစိုက်ရမည့် ထုတ်ပြန်ချက်အချို့ကို ISP-Myanmar Peace Desk က အနှစ်ချုပ် ဖော်ပြထားပါသည်။

ပြည်ထောင်စုအစိုးရ၏ ထုတ်ပြန်ချက်

ယခုရက်သတ္တပတ်အတွင်း ပြည်ထောင်စုလွှတ်တော်ရုံးမှ “ဒုတိယအကြိမ် ပြည်ထောင်စုလွှတ်တော် အထူးအစည်းအဝေး ခေါ်ယူကျင်းပပေးရန် တင်ပြ တောင်းဆိုလွှာ တင်သွင်းထားခြင်းနှင့် စပ်လျဉ်း၍ သတင်းထုတ်ပြန်ချက်”ကို ဇန်နဝါရီ ၁၂ ရက်စွဲဖြင့် ထွက်ရှိခဲ့ပါသည်။

အဆိုပါသတင်းထုတ်ပြန်ချက်တွင် “ ပြည်ခိုင်ဖြိုးပါတီနှင့် တပ်မတော်တို့ ဦးဆောင်၍ ပြည်ထောင်စုလွှတ်တော် အထူးအစည်းအဝေး ခေါ်ယူကျင်းပပေးရန် တောင်းဆိုချက်မှာ မလိုအပ်သည့်ကိစ္စ ဖြစ်၍ ခေါ်ယူကျင်းပရန် မရှိကြောင်း” ဖော်ပြခဲ့ပါသည်။

ယင်းနောက် “တောင်းဆိုသည့်ကိစ္စရပ်များမှာ ပါတီစုံအထွေထွေရွေးကောက်ပွဲဆိုင်ရာ တိုင်ကြား၊ ကန့်ကွက်မှုများအတွက် ပြည်သူ့ကိုယ်စားလှယ်များနှင့် စုပေါင်းတိုင်ပင်အဖြေရှာဆုံးဖြတ်နိုင်ရန် ဖြစ်ကြောင်း တွေ့ရှိရပြီး ယင်းအချက်များသည် ပြည်ထောင်စုလွှတ်တော်၏ ဆုံးဖြတ်၊ သဘောတူညီချက်၊ အတည်ပြုချက်ရယူရမည့်ကိစ္စ မဟုတ်ဘဲ ပြည်ထောင်စုရွေးကောက်ပွဲကော်မရှင်က သက်ဆိုင်ရာဥပဒေ၊ နည်းပဒေများအရ ဆက်လက်ဆောင်ရွက် ရမည့် ကိစ္စရပ်များသာ ဖြစ်ကြောင်း” ပြည်ထောင်စုလွှတ်တော်ရုံး၏ ထုတ်ပြန်မှုတွင် ပါရှိပါသည်။

တပ်မတော်၏ ထုတ်ပြန်ချက်များ

ဇန်နဝါရီ တတိယပတ်ကာလအတွင်း တပ်မတော်မှ “မဲဝိုင်ကျေးရွာ ဘုန်းတော်ကြီးကျောင်းတွင်‌ နေထိုင်လျက်ရှိသည့် အပြစ်မဲ့ကလေးငယ်တဦးအား KNLA တပ်မဟာ (၅)အဖွဲ့က လက်ဖြောင့်သေနတ်ဖြင့် ပစ်ခတ်ခဲ့ကြောင်း” ထုတ်ပြန်ချက် အပါအဝင် ထုတ်ပြန်ချက် ၁၀ ခုအထိ ထုတ်ပြန်ခဲ့ပါသည်။

“မဲဝိုင်ကျေးရွာ ဘုန်းတော်ကြီးကျောင်းတွင်‌ နေထိုင်လျက်ရှိသည့် အပြစ်မဲ့ကလေးငယ်တဦးအား KNLA တပ်မဟာ (၅)အဖွဲ့က လက်ဖြောင့်သေနတ်ဖြင့် ပစ်ခတ်ခဲ့ကြောင်း” သတင်းထုတ်ပြန်ချက်ကို တပ်မတော်က ဇန်နဝါရီ ၁၆ ရက်စွဲ ဖြင့် ထုတ်ပြန်ခဲ့ခြင်း ဖြစ်ပါသည်။

အဆိုပါထုတ်ပြန်ချက်တွင် “ ကရင်ပြည်နယ်၊ မဲဝိုင်အနီးရှိ တပ်မတော်စခန်း၏ တောင်ဘက် မဲဝိုင်ဘုန်းတော်ကြီးကျောင်းအနီးတွင် ဇန်နဝါရီ ၁၅ ရက်က KNLA တပ်မဟာ(၅)မှ သုံးဦးခန့်က လက်ဖြောင့်သေနတ်ဖြင့် ပစ်ခတ်ခဲ့ရာ ၁၂ နှစ်အရွယ် ကလေးငယ်တဦး၏ ဦးခေါင်းတွင် ကျည်ရှပ်ထိဒဏ်ရာ (စိုးရိမ်ရ) ရရှိခဲ့ကြောင်း” ဖော်ပြခဲ့ပါသည်။

ယင်းနောက် “KNLA အဖွဲ့အနေဖြင့် ယခုကဲ့သို့ အပြစ်မဲ့ပြည်သူများအား လက်နက်ဖြင့် ပစ်ခတ်မှုသည် NCA စာချုပ်ပါ ပစ်ခတ်တိုက်ခိုက်မှုရပ်စဲရေးဆိုင်ရာ စည်းမျဉ်း၊ စည်းကမ်းများနှင့် စစ်ဘက်ဆိုင်ရာကျင့်ဝတ်များ၊ Code of Conduct အခန်း(၃)ပါ ပြဌာန်းချက်များကို ချိုးဖောက်ခဲ့ကြောင်း တွေ့ရှိရသဖြင့် ပစ်ခတ် တိုက်ခိုက်မှုရပ်စဲရေးဆိုင်ရာပူးတွဲစောင့်ကြည့်ရေးကော်မတီ (ပြည်နယ်အဆင့်) သို့ ကန့်ကွက်အကြောင်းကြားသွားမည် ဖြစ်ကြောင်း” တပ်မတော်၏ ထုတ်ပြန်မှုတွင် ပါရှိပါသည်။

ဆက်လက်ပြီး “ ပြည်ထောင်စုလွှတ်တော်ရုံး၏ သတင်းထုတ်ပြန်ချက်နှင့် စပ်လျဉ်း၍ သဘောထားထုတ်ပြန်ချက်”ကို ဇန်နဝါရီ ၁၄ ရက်စွဲဖြင့် ထုတ်ပြန် ခဲ့ပါသည်။

အဆိုပါထုတ်ပြန်ချက်တွင် “ ပုဒ်မ ၈၄ ပါ ပြဌာန်းချက်အတိုင်းဆိုလျှင် အထူးအစည်းအဝေး ခေါ်ယူကျင်းပပေးရေးတောင်းဆိုရာတွင် အကြောင်းပြချက် ပေးရမည်ဟု မဖော်ပြထားသည့်အပြင် အကြောင်းပြချက်ပေး၍ ငြင်းဆိုနိုင်သည့် ခြွင်းချက်ပေးထားခြင်း မရှိကြောင်း၊ ပြည်ထောင်စုလွှတ်တော်နာယက,က ခေါ်ယူကျင်းပပေးရန် မလိုအပ်ကြောင်း အကြောင်းပြချက်ပေး၍ ငြင်းဆိုခြင်းသည် ဖွဲ့စည်းပုံအခြေခံဥပဒေနှင့် ဆန့်ကျင်ခြင်း ရှိမရှိ ပြန်လည် ဆန်းစစ်ရန် လိုအပ်မည်ဖြစ်ကြောင်း” ဖော်ပြထားပါသည်။

ထို့အပြင် တပ်မတော်သတင်းမှန်ပြန်ကြားရေးအဖွဲ့က ၂၀၂၀ ရွေးကောက်ပွဲ မဲစာရင်းများ စိစစ်တွေ့ရှိချက်နှင့် ပတ်သက်၍ ၂၀၂၁ ခုနှစ် ဇန်နဝါရီ ၁၂ ရက်မှ ၁၈ ရက်အထိကာလအတွင်း သတင်းထုတ်ပြန်ချက် ခုနစ်ခုအထိ ထွက်ရှိခဲ့ပါသည်။

တိုင်းရင်းသားလက်နက်ကိုင်အဖွဲ့များ၏ ထုတ်ပြန်ချက်

ယခုရက်သတ္တပတ်အတွင်း တိုင်းရင်းသားလက်နက်ကိုင်အဖွဲ့များမှ ထုတ်ပြန် ကြေညာချက် ငါးခုအထိ ထွက်ရှိခဲ့ပါသည်။

“ပလောင်ပြည် လွတ်မြောက်ရေးတပ်ဦး၏ ဗဟိုကော်မတီ နှစ်ပတ်လည်အစည်းအဝေး သဘောထားထုတ်ပြန်ကြေညာချက်” ကို PSLF/ TNLA အဖွဲ့မှ ဇန်နဝါရီ ၁၈ ရက်စွဲဖြင့် ထွက်ရှိခဲ့ပါသည်။

အဆိုပါထုတ်ပြန်ချက်အရ “ ULA/ AA အဖွဲ့ နှင့် တပ်မတော်တို့ အပြန်အလှန် ဆွေးနွေးမှုများ စတင်နိုင်ခဲ့ပြီး ရခိုင်ပြည်တွင် တိုက်ပွဲများ လတ်တလော ရပ်တန့်နိုင်ခြင်းသည် အပစ်အခတ်ရပ်စဲရေးဆွေးနွေးမှု၏ အရေးကြီးသည့်လုပ်ငန်းအစ ဖြစ်ကြောင်းနှင့် “၂၀၂၀ အလွန် ငြိမ်းချမ်းရေးဖွဲ့စည်း တည်ဆောက်မှု အသစ်” ဖော်ဆောင်မည်ဟု ဒေါ်အောင်ဆန်းစုကြည်၏ နှစ်သစ်နှုတ်ခွန်းဆက်စကားသည် ရှေ့ဆက်ရန် ခက်ခဲနေသည့် ငြိမ်းချမ်းရေး လုပ်ငန်းစဉ်များ ပြန်လည်အစပြုရန် အခြေအနေကောင်းများ ဖြစ်သည်ဟု ရှုမြင်ကြောင်း” သိရပါသည်။

ထို့အပြင် PSLF/ TNLA အဖွဲ့မှ “(၅၈) နှစ်ပြည့် တအာင်းအမျိုးသားတော်လှန်ရေးနေ့ သဘောထားထုတ်ပြန်ချက်” ကို ဇန်နဝါရီ ၁၂ ရက်စွဲဖြင့် ထုတ်ပြန်ခဲ့ရာ “ဒေသခံပြည်သူများနှင့် တအာင်းလူထုအား နှိပ်စက်ညှင်းပမ်းခြင်းများ ဆက်တိုက်ကျုးလွန်နေသည့် RCSS ၏ လုပ်ရပ်သည် ရှမ်းပြည်သူလူထုများ လိုလားသည့် ရှမ်းပြည်ညီညွတ်ရေးလုပ်ငန်းများနှင့် ဆန့်ကျင်နေကြောင်း၊ RCSS ၏ ခွဲခြားဖိနှိပ်မှုကို ဆက်တိုက်ခံနေကြရသော ဒေသခံမိဘပြည်သူများအား မိမိတို့မှ အကာအကွယ်ပေးသွားရမည်ကြောင်း” ဖော်ပြခဲ့ပါသည်။

ယင်းနောက် ကရင်အမျိုးသားအစည်းအရုံး (KNU)မှ ဇန်နဝါရီ ၁၃ ရက်စွဲဖြင့် “ကရင်အမျိုးသား မိဘပြည်သူများနှင့် ကရင်လူငယ် မောင်မယ်အားလုံးထံသို့ အိတ်ဖွင့်ပေးစာ” ကို ထုတ်ပြန်ခဲ့ပါသည်။ အဆိုပါအိတ်ဖွင့်ပေးစာတွင် “ မိမိတို့အနေဖြင့် သဘောတူညီချက်များ ထိန်းသိမ်းရေး၊ စစ်ပွဲများ မဖြစ်ရေးတို့ကို ထောက်ရှု၍ နယ်မြေအသီးသီးတွင် အလျှော့ပေးခဲ့ရာ NCA လက်မှတ်ထိုးပြီး နောက် ဖာပွန်ခရိုင်၌ တပ်မတော်စခန်း ၈၀ ကျော်အထိ ရှိလာခဲ့ပြီး နည်းမျိုးစုံဖြင့် တပ်အင်အားကို တိုးချဲ့ခဲ့ကြောင်း” ဖော်ပြခဲ့ပါသည်။

ထို့ပြင် ကရင်အမျိုးသားအစည်းအရုံး (KNU) ညောင်လေးပင်ခရိုင်မှ “(၂၃)ကြိမ်မြောက် KNU ညောင်လေးပင်ခရိုင် ထုတ်ပြန်ကြေညာချက် ” ကို ဇန်နဝါရီ ၁၆ ရက်စွဲဖြင့် ထွက်ရှိခဲ့ပါသည်။

အဆိုပါထုတ်ပြန်ချက်တွင် “ပြည်သူလူထု၏ နေ့စဉ်လူမှုဘဝလုံခြုံရေးနှင့် စပ်လျဉ်း၍ စိုးရိမ်ကြောက်ရွံ့ခြင်းကင်းသည့် ပြည်သူ ပြည်သားများ၏ ဘဝ ရပ်တည်ရေး အာမခံရန်၊ ပစ်ခတ်တိုက်ခိုက်မှုရပ်စဲရေးဆိုင်ရာ ကိစ္စရပ်နှင့် ပစ်ခတ်တိုက်ခိုက်မှု ရပ်စဲရေးခိုင်မာအောင် လုပ်ဆောင်ခြင်းကိစ္စရပ်များကို အကောင်အထည်ဖော်ဆောင်နိုင်ရေးအတွက် စာချုပ်ပါ သဘောတူညီချက်များအတိုင်း မည်ကဲ့သို့ အကောင်အထည်ဖော်လုပ်ဆောင်နိုင်မည်ကို တိုင်ပင်ဆွေးနွေး၍ ဆုံးဖြတ်ချက်များ ချမှတ်ခဲ့ကြကြောင်း” ဖော်ပြခဲ့ပါသည်။

ရှမ်းပြည်အရှေ့ပိုင်း၊ အထူးဒေသ(၄)၊ မိုင်းလားအဖွဲ့(NDAA)ကလည်း ဇန်နဝါရီ ၁၄ ရက်စွဲဖြင့် “ကိုဗစ်-၁၉ ရောဂါ ကာကွယ်၊ ထိန်းချုပ်၊ ကုသရေးနှင့် ပတ်သက်၍ မိုင်းလားမြို့အတွင်းရှိ ပြည်သူများထံသို့ အသိပေးအကြောင်းကြားစာ” တခု ထွက်ရှိခဲ့ပါသည်။

ပါတီများ၏ ထုတ်ပြန်ချက်

ယခုရက်သတ္တပတ်အတွင်း ပြည်သူ့ရှေ့ဆောင်ပါတီ(PPP)နှင့် အမျိုးသားဒီမိုကရေစီအင်အားစုပါတီ (NDF)တို့မှ ကြေညာချက် နှစ်ခုထုတ်ပြန်ခဲ့ပါသည်။

ဇန်နဝါရီ ၁၄ရက်စွဲဖြင့် ထုတ်ပြန်ခဲ့သည့် ပြည်သူ့ရှေ့ဆောင်ပါတီ (PPP)၏ ထုတ်ပြန်ချက်တွင် “ လက်ရှိဖြစ်ပေါ်နေသော ရွေးကောက်ပွဲဆိုင်ရာ အငြင်းပွားမှုများနှင့် အခြေအနေအရပ်ရပ်များအတွက် တာဝန်ရှိကြသော နိုင်ငံတော်အစိုးရနှင့် ရွေးကောက်ပွဲကော်မရှင်၊ ပြည်ထောင်စုလွှတ်တော်နာယက၊ ပြည်ထောင်စု လွှတ်တော်တရားချုပ်တို့က ဒီမိုကရေစီရေးနှင့် တရားဥပဒေစိုးမိုးရေးတို့အတွက် ဥပဒေနှင့်အညီ ဖြေရှင်းဆောင်ရွက်ပေးနိုင်ပါရန် အလေးအနက်ထား တိုက်တွန်း တောင်းဆိုကြောင်း” ဖော်ပြထားပါသည်။

အမျိုးသားဒီမိုကရေစီအင်အားစုပါတီ(NDF)ကလည်း ဇန်နဝါရီ ၁၇ ရက်စွဲဖြင့် “ဒုတိယအကြိမ်လွှတ်တော် အပြီးသတ် ခေါ်ယူပေးရေး ကိစ္စနှင့်ပတ်သက်၍ သဘောထားထုတ်ပြန်ချက်”တွင် “လွှတ်တော်ကိုယ်စားလှယ်များ၏ နိုင်ငံနှင့် နိုင်ငံသားများ အကျိုးအတွက် ဆောင်ရွက်ချက်များကို ဆွေးနွေးဆုံးဖြတ် အတည်ပြုပြီးမှသာ ဒုတိယအကြိမ်လွှတ်တော်ကို ဂုဏ်သိက္ခာရှိစွာဖြင့် အပြီးသတ်ရမည် ဖြစ်၍ ကျန်ရှိနေသည့်သက်တမ်းအတွက် အရေးတကြီး လုပ်ဆောင်နိုင်ရန် အမြန်ဆုံးခေါ်ယူသင့်ကြောင်း” ဖော်ပြခဲ့ပါသည်။

နိုင်ငံတကာအဖွဲ့အစည်းများ၏ ထုတ်ပြန်ချက်

ယူနီဆက်မြန်မာက ဇန်နဝါရီ ၁၂ ရက်စွဲဖြင့် “ မင်းပြားမြို့တွင် ဖြစ်ပွားခဲ့သော စစ်လက်နက်ပစ္စည်းပေါက်ကွဲမှုနှင့် စပ်လျဉ်း၍ ထုတ်ပြန်ကြေညာချက်” တခု ထွက်ရှိခဲ့ပါသည်။

အဆိုပါထုတ်ပြန်ချက်တွင် “ ရခိုင်ပြည်နယ်၊ မင်းပြားမြို့ စပါးထားကျေးရွာတွင် မိုင်းသီးတလုံး ပြင်းထန်စွာ ပေါက်ကွဲခဲ့မှုကြောင့် အမျိုးသမီးတဦးသေဆုံးပြီး ကလေးငယ်ငါးဦး ထိခိုက်ခဲ့ခြင်းအတွက် လွန်စွာ စိတ်ထိခိုက်ဝမ်းနည်းကြောင်း၊ မြန်မာအစိုးရအ‌နေဖြင့် ကျောင်းများနှင့် ရပ်ရွာအသိုက်အဝန်းများတွင် မိုင်းအန္တရာယ်နှင့် ပတ်သက်သော အသိပညာများ ပေးနိုင်ရန်နှင့် အရေးပေါ် မိုင်းအန္တရာယ်ပညာပေးလှုပ်ရှားမှုများ ဆောင်ရွက်နိုင်ရေး ပံ့ပိုးပေးပါရန် တိုက်တွန်းကြောင်း” ပါရှိပါသည်။

အရပ်ဘက်အဖွဲ့အစည်းများ၏ ထုတ်ပြန်ချက်

ကရင်ငြိမ်းချမ်းရေးအထောက်အကူပြုကွန်ယက် (KPSN)မှ ဇန်နဝါရီ ၁၈ ရက်စွဲဖြင့် ထုတ်ပြန်ကြေညာချက် တခု ထွက်ရှိခဲ့ပါသည်။

အဆိုပါထုတ်ပြန်ချက်တွင် “ကရင်ပြည်နယ် ခလယ်လွီထူ (ညောင်လေးပင်) ခရိုင်နှင့် မူတြော်(ဖာပွန်)ခရိုင်တို့တွင် တပ်မတော်၏ လက်နက်ကြီးများဖြင့် ပစ်ခတ်နေမှုများကြောင့် ရွာသူကြီးတဦး သေဆုံးမှုနှင့် ဒေသခံ ပေါင်း ၃၇၀၀ ကျော် နေရပ်စွန့်ခွာ ထွက်ပြေးတိမ်းရှောင်နေရမှုအပေါ် ရှုတ်ချကြောင်း” ဦးစွာဖော်ပြခဲ့ပါသည်။

ယင်းနောက် “တပ်မတော်၏ ထိုးစစ်ဆင်နေမှုများအား ချက်ချင်းရပ်တန့်ရန်နှင့် ကရင်နယ်နမိတ်များမှ ၎င်းတို့ တပ်များအား ရုတ်သိမ်းရန် တောင်းဆိုကြောင်း၊ တပ်မတော်မှ နိုင်ငံအဝှမ်းတွင် ထိုးစစ်ဆင်နေမှုများ ရပ်တန့် သည့်အချိန်နှင့် ၎င်းတို့ အခြေစိုက်နေသော တိုင်းရင်သားနယ်မြေများရှိ တပ်စခန်းများ စတင် ဆုတ်ခွာသည့် အချိန်အထိ နိုင်ငံတကာအလှူရှင်များမှ ငြိမ်းချမ်းရေး ဖြစ်စဉ်အား ပံ့ပိုးပေးနေမှုများအပေါ် ဆိုင်ငံ့ထားရန် တိုက်တွန်းကြောင်း” KPSN ၏ ထုတ်ပြန်မှုတွင် ပါရှိပါသည်။

၂၀၂၁ ခုနှစ် ဇန်နဝါရီတတိယပတ်အတွင်း ထွက်ရှိခဲ့သော ထုတ်ပြန်ချက်များ၏ အပြည့်အစုံကို ယခု link တွင် ကြည့်နိုင်ပါသည်။

ထုတ်ပြန်ကြေညာချက်များ (ဇန်နဝါရီ တတိယပတ်)

ဆက်စပ် ဆောင်းပါးများ