KTLA

တည်ထောင်သည့် ရက်စွဲ​          –  ၂၀၂၂ ခုနှစ် ဇူလိုင် ၁၇ ရက်။ 

ဌာနချုပ်                          – ကရင်ပြည်နယ်၊ မြဝတီမြို့နယ်။

လှုပ်ရှားဒေသ                     – ကရင်ပြည်နယ်၊ မြဝတီမြို့နယ်၊ ကော့ကရိတ်မြို့နယ်။ 

ခန့်မှန်းအင်အား                   – ၁,၅၀၀ နှင့်အထက်။

ခေါင်းဆောင်     – ဗိုလ်ချုပ်ကြီး နယ်ဒါးမြ(စောနယ်ဒါးဘိုမြ)(စစ်ဦးစီးချုပ်)၊ ဒုတိယ ဗိုလ်ချုပ်ကြီး ဆာဂေးပို(ဒုတိယ စစ်ဦးစီးချုပ်) ၊ ဒုတိယ ဗိုလ်ချုပ်ကြီး စောဘာဝါး(ဒုတိယ စစ်ဦးစီးချုပ်)။ 

ကရင့်ပြည်သူ့တပ်မတော်ကို ဗိုလ်မှူးချုပ် နယ်ဒါးမြ၏ ဦးဆောင်မှုဖြင့် ၂၀၂၂ ခုနှစ် ဇူလိုင် ၁၇ ရက်တွင် ဖွဲ့စည်းခဲ့သည်။ ကရင့်ပြည်သူ့တပ်မတော်ထဲတွင် ကရင်အမျိုးသားအစည်းအရုံး(KNU) ၏ စစ်ရေးလက်တံ ကရင်အမျိုးသားကာကွယ်ရေးတပ်ဖွဲ့(KNDO)လက်အောက်ခံအဖွဲ့များဖြစ်သည့် ဗိုလ်စလုံး ဦးဆောင်သော အထူးကွန်မန်ဒိုတပ်ဖွဲ့၊ ဗိုလ်အယ်စေးဝါး ဦးဆောင်သော ခြင်္သေ့အထူးကွန်မန်ဒိုတပ်ဖွဲ့၊ ဗိုလ်စောကော်လားဖိုး ဦးဆောင်သော အထူးတပ်ရင်းတို့က မိခင်တပ်မှ  ခွဲထွက်၍ ပါဝင်လာကြသည်။ 

ထို့ပြင် ဗိုလ်မှူးချုပ် စောကျော်သက် ဦးဆောင်သည့် တိုးတက်သောဗုဒ္ဓဘာသာကရင်အမျိုးသားတပ်မတော် (DKBA)၊ ကရင်အမျိုးသားလွတ်မြောက်ရေးတပ်မတော်-ကရင်ငြိမ်းချမ်းရေးကောင်စီ (KNU/KNLA-PC)မှ ခွဲထွက်လာသည့် တပ်ဖွဲ့ဝင်များသည်လည်း ကရင့်ပြည်သူ့တပ်မတော်တွင် ပါဝင် သည်။  

ကရင့်ပြည်သူ့တပ်မတော်တွင် ပါဝင်သည့် တပ်မှူးများ၊ တပ်ရင်း၊ တပ်ဖွဲ့များသည်လည်း KNDO မှ ခွဲမထွက်ခင်ကတည်းက ဗိုလ်မှူးချုပ် နယ်ဒါးမြ၏ ဦးဆောင်မှုဖြင့် စစ်ကောင်စီတပ်များကို တိုက်ခိုက်နေသည့် တပ်များ ဖြစ်သည်။  ၎င်း၏ ဦးဆောင်မှုအောက်တွင် ပါဝင်သည့် တပ်များသည် ၂၀၂၂ ခုနှစ် မတ် ၂၁ ရက်က မြဝတီမြို့နယ်အတွင်းရှိ စစ်ကောင်စီ၏ မော်ခီး မဆုတ်တမ်း ခံစစ်စခန်းကို သိမ်းပိုက်ရာ၌ ပါဝင်ခဲ့ပြီး ဇွန် ၁၃ ရက်ကလည်း ဝေါလေရဲစခန်းကို တိုက်ခိုက်သိမ်းယူကာ ဖမ်းဆီးခံထားရသည့် PDF ကိုးဦးကို ကယ်ထုတ်ခဲ့သည်။ 

၂၀၂၂ ခုနှစ် ဇွန်လအတွင်း စစ်ကောင်စီ၏ ဥကရစ်ထစခန်းကို သိမ်းနိုင်ရန် ပြင်းပြင်းထန်ထန် ထိုး စစ်ဆင်ခဲ့ရာတွင်လည်း KNU ၏ စစ်ရေးလက်တံ  KNLA နှင့်အတူ ဗိုလ်မှူးချုပ် နယ်ဒါးမြ ဦးဆောင်မှုအောက်တွင် ရှိနေသည့် တပ်ဖွဲ့များ ပါဝင်ခဲ့သည်။ 

ကရင့်ပြည်သူ့တပ်မတော်ကို မဖွဲ့စည်းမီက ဗိုလ်မှူးချုပ် နယ်ဒါးမြသည် KNDO ၏ စစ်ဦးစီးချုပ် ဖြစ်သည်။ ၎င်းသည် KNU ၏ ဥက္ကဋ္ဌဟောင်း ဗိုလ်ချုပ်ကြီး စောဘိုမြ၏ သားဖြစ်သည်။ 

ဗိုလ်မှူးချုပ် နယ်ဒါးမြသည် စစ်အာဏာသိမ်းပြီးနောက် ဖြစ်ပွားသည့် တိုက်ပွဲတွင်းမှ ဖမ်းမိသည့် အရပ်သား ၂၅ ဦးကို သတ်သည့် ဖြစ်ရပ်တွင် တာဝန်ရှိခြင်းကြောင့် KNDO မှ တာဝန် ရပ်ဆိုင်း ခံခဲ့ရသူလည်း ဖြစ်သည်။ 

၂၀၂၁ ခုနှစ် မေ ၃၁ ရက်တွင် မြဝတီမြို့နယ်၊ အူးဟူချောင်းတံတား တိုက်ပွဲ၌ ဗိုလ်မှူးချုပ် နယ်ဒါးမြ ၏ KNDO စစ်ကြောင်းက သုံ့ပန်း ၄၇ ဦးကို ဖမ်းဆီးမိရာ ထိုအထဲမှ ၂၅ ဦးကို စစ်ကောင်စီ၏ ထောက်လှမ်းရေးများဟု စွပ်စွဲ၍ သတ်ပစ်ခဲ့သည်။  ထို ၂၅ ဦး၏ နောက်ကြောင်း ရာဇဝင်များကို ပြန်စိစစ်ရာ တံတားဆောက်လုပ်ရေး လုပ်ငန်းခွင်မှ အရပ်သားများ ဖြစ်နေသည်။  

KNU ဗဟိုကော်မတီက စစ်ဆေးရေးပြုလုပ်ကာ စစ်သုံ့ပန်းဆိုင်ရာ ကျင့်ဝတ်များကို မလိုက်နာခြင်းဟူသည့် အချက်ဖြင့် ဗိုလ်မှူးချုပ် နယ်ဒါးမြကို ၂၀၂၁ ခုနှစ် ဇူလိုင် ၈ ရက်မှစ၍ တာဝန်မှ ယာယီရပ်ဆိုင်းကြောင်း ဆုံးဖြတ်ခဲ့သည်။ KNDO  စစ်ဦးစီးချုပ်ကိုလည်း ယာယီတာဝန်ဖြင့် အသစ် ခန့်အပ်ခဲ့သည်။ 

KNU ၏ ဆုံးဖြတ်ချက်ကို ဗိုလ်မှူးချုပ် နယ်ဒါးမြက လက်မခံနိုင်ကြောင်း ၂၀၂၁ ခုနှစ် ဇူလိုင် ၁၀ ရက်တွင် တုံ့ပြန်ခဲ့ပြီး ၎င်း၏ စစ်ကြောင်းများသည်လည် ၎င်းနောက်တွင်သာ ဆက်လက်လိုက်ပါခဲ့၍ စစ်ကောင်စီနှင့် တိုက်ပွဲများ ဆက်ဖြစ်ပွားခဲ့သည်။ 

တာဝန်ယာယီရပ်ဆိုင်းခံထားရချိန်၌ တိုက်ခိုက်ခဲ့သည့် ဥကရစ်ထစခန်း တိုက်ပွဲတွင်လည်း ဗိုလ်မှူးချုပ် နယ်ဒါးမြ၏ တပ်များသည် ဖမ်းမိသည့် စစ်ကောင်စီတပ်ဖွဲ့ဝင်များကို  သတ်ဖြတ်ခဲ့ပြီး ရုပ်သံမှတ်တမ်း များကိုလည်း လူမှုကွန်ရက်ပေါ်တွင် ဖြန်ံ့ဝေခဲ့သည်။

အမျိုးသားညီညွတ်ရေးအစိုးရ(NUG) က စစ်ဘက်ဆိုင်ရာ အသုံးပြုရန်ဟုဆိုကာ ဗိုလ်မှူးချုပ် နယ်ဒါးဘိုမြကို ထိုင်းဘတ်ငွေ တသန်း(အမေရိကန်ဒေါ်လာ နှစ်သောင်းကျော်) ကို ၂၀၂၂ ခုနှစ် ဇွန်လအတွင်းက ပေးအပ်ခဲ့သည်။ 

ထိုသို့ဖြင့် တိုက်ခိုက်မှု အားကောင်းပြီး ထောက်ခံမှုလည်း ရရှိလာသည့်  ဗိုလ်မှူးချုပ် နယ်ဒါးမြသည် ၎င်း၏နောက်လိုက် တပ်မှူးများဖြင့် ကရင့်ပြည်သူ့တပ်မတော်ကို ထူထောင်လိုက်ခြင်း ဖြစ်သည်။ 

ကရင့်ပြည်သူ့တပ်မတော်ကို ထူထောင်ပြီးနောက် KNU ဗဟိုသည် ဗိုလ်မှူးချုပ် နယ်ဒါးမြအနေနှင့်  အဖွဲ့အစည်းတွင် တာဝန်ထမ်းဆောင်စဥ် သုံ့ပန်းများကို သတ်ဖြတ်ခြင်း၊ အဖွဲ့၏ စုံစမ်းစစ်ဆေးခြင်း လုပ်ငန်းစဥ်များတွင် ပါဝင်ခြင်း မရှိဟုဆိုကာ အဖွဲ့ဝင်အဖြစ်မှ ထုတ်ပယ်ကြောင်း ၂၀၂၂ ခုနှစ် ဇူလိုင် ၂၀ ရက်တွင် ထုတ်ပြန်ခဲ့သည်။ 

ဗိုလ်မှူးချုပ် နယ်ဒါးမြ ထူထောင်လိုက်သည့် တပ်မတော်သည် ကရင်တော်လှန်ရေးတပ်များအားလုံး စုစည်း၍ ၁၉၅၆ ခုနှစ်တွင် ဖွဲ့စည်းခဲ့သည့် အမည်ကို ယူထားခြင်းဖြစ်ပြီး ယင်းအား လက်မခံနိုင်ကြောင်း၊ ၎င်းတို့နှင့်လည်း သက်ဆိုင်ခြင်း မရှိကြောင်း ၂၀၂၂ ခုနှစ် ဇူလိုင် ၂၀ ရက်တွင်  KNLA ကလည်း သဘောထားထုတ်ပြန်ခဲ့သည်။

ထိုသို့ ထုတ်ပြန်ချက်များ ထွက်ရှိခဲ့သော်လည်း ကော့ကရိတ်မြို့နယ်တွင်း စစ်ရေးလှုပ်ရှားမှုများ၊ မြို့တွင်း စစ်ဆင် ရေးများတွင် KNU တပ်မဟာ(၆)၏ KNLA တပ်ရင်း(၂၇) သည် ကရင့်ပြည်သူ့တပ်မတော် လက်အောက်ရှိ တပ်ရင်းများနှင့် ပူးတွဲ စစ်ရေးဆောင်ရွက်မှုများ ရှိခဲ့သည်။  

ဗိုလ်မှူးချုပ် နယ်ဒါးမြသည် ကရင့်ပြည်သူ့တပ်မတော်၏ စစ်ဦးစီးချုပ် ဖြစ်သည်။ ဗိုလ်မှူးချုပ် စောကျော်သက်၊ ဗိုလ်စလုံး၊ ဗိုလ်စောဝင်းမြင့်၊ ဗိုလ်အယ်စေးဝါး၊ ဗိုလ်စောကော်လားဖိုးတို့သည် ကရင့်ပြည်သူ့တပ်မတော်၏ တပ်မှူးများ ဖြစ်သည်။ 

မသိရသေးပါ။

အာဏာသိမ်းပြီးနောက်မှ​ ဖွဲ့စည်းလာသည့် တပ်ဖွဲ့ ဖြစ်ပြီး စစ်ကောင်စီနှင့် နိုင်ငံရေးဆွေးနွေးမည် မဟုတ်ဘဲ စစ်ရေးအရ တိုက်ခိုက်၍ စစ်အာဏာရှင်စနစ်ကို ဖျက်ဆီးရန် စစ်ရေးရည်မှန်းချက် ထားရှိသည့် အဖွဲ့ ဖြစ်သည်။ 

ကရင့်ပြည်သူ့တပ်မတော်၏ ခေါင်းဆောင်နှင့် တပ်မှူးများသည် စစ်တပ်က အာဏာသိမ်းပြီးသည့် နောက်တွင် စစ်ကောင်စီ၏ တပ်စခန်းများ၊ ရဲစခန်းများနှင့် စစ်ကြောင်းများကို တိုက်ခိုက်လျက် ရှိသည်။ 

တပ်မဟာများ ဖွဲ့စည်းထားခြင်း မရှိသေးပါ။

Facebook:  https://www.facebook.com/KawThooLeiArmy1949