CDF- Kanpetlet

တည်ထောင်သည့်ရက်စွဲ    –  ၂၀၂၁ ခုနှစ် မတ် ၅ ရက်။ 

ဌာနချုပ်                           –  ကန်ပက်လက်မြို့နယ်။  

လှုပ်ရှားဒေသ                 –  ချင်းပြည်နယ် ကန်ပက်လက်နှင့် မင်းတပ်မြို့နယ်၊ မကွေးတိုင်း ဆော၊ ကျောက်ထုနှင့် လောင်းရှည်မြို့နယ်။  

ခန့်မှန်းအင်အား             –   ၁,၀၀၀ နှင့် အထက်။

ခေါင်းဆောင်                 –   ဆလိုင်းထွန်းလိန်းထန်း (တပ်မဟာမှူး)။

၂၀၂၁ ခုနှစ် ဖေဖော်ဝါရီ ၁ ရက် စစ်တပ်အာဏာသိမ်းမှုကို ကန်ပက်လက်မြို့နယ်ပြည်သူလူထုက အာဏာသိမ်းမှုကိုလက်မခံဘဲ ငြိမ်းချမ်းစွာဆန္ဒပြခဲ့ကြသည်။ စစ်အာဏာသိမ်းမှုဖီဆန်ရေးတွင် တစုတစည်းတည်းဖြစ်စေရန် ကန်ပက်လက်မြို့နယ် သပိတ်ကော်မတီကို ဖွဲ့စည်းခဲ့ပြီး လှုပ်ရှားမှုများ ဆက်လက်ဆောင်ရွက်ခဲ့သည်။ ထို့နောက် စစ်အာဏာသိမ်းမှုဖီဆန်ရေးလှုပ်ရှားမှုများကို အရှိန်မြှင့်ဆောင်ရွက်ရန်နှင့် ပြည်သူများ၏ လုံခြုံရေးနှင့် တရားဥပဒေစိုးမိုးရေးတို့ကို ကာကွယ်ရန် ရည်ရွယ်ချက်ဖြင့် ကြားကာလပြည်သူ့အုပ်ချုပ်ရေး အစီအစဥ်တရပ်ဖြစ်သည့် ကန်ပက်လက်မြို့နယ်အုပ်ချုပ်ရေးအဖွဲ့ကို ၂၀၂၁ ခုနှစ် မတ် ၁ ရက်တွင် စတင်ဖွဲ့စည်းခဲ့သည်။ ထိုအုပ်ချုပ်ရေးအဖွဲ့တွင် ကန်ပက်လက်မြို့နယ် ရွေးကောက်ခံလွှတ်တော်ကိုယ်စားလှယ် သုံးဦး၊ မြို့မိမြို့ဖ ၁၁ ဦး၊ CDM ဝန်ထမ်းကိုယ်စားပြုသူ နှစ်ဦးနှင့် ကျောင်းသားလူငယ်ကိုယ်စားပြုသူ ခုနစ်ဦး စုစုပေါင်း ၂၃ ဦး ပါဝင်သည်။ ကန်ပက်လက်မြို့နယ်အုပ်ချုပ်ရေးအဖွဲ့ကို မြို့မနယ်မြေ ပြည်သူ့အုပ်ချုပ်ရေးအဖွဲ့၊ အမှတ်-၅ ဒေသ ပြည်သူ့အုပ်ချုပ်ရေးအဖွဲ့၊ ဒါးရင်ဒူးဒေသပြည်သူ့အုပ်ချုပ်ရေးအဖွဲ့၊ ဥူးပူးဒေသပြည်သူ့အုပ်ချုပ်ရေးအဖွဲ့နှင့် ဒိုင်ရ်ဒေသ အုပ်ချုပ်ရေးအဖွဲ့ဟူ၍ နယ်မြေငါးခုခွဲ၍ အုပ်ချုပ်ရေးယန္တရားကို လည်ပတ်သည်။ 

ဆန္ဒပြနေသည့်လူထုကို လုံခြုံရေးပေးရန် သပိတ်ခေါင်းဆောင်များ၊ CDM ဝန်ထမ်းများ၊ ကျောင်းသား လူငယ်များ၊ မြို့မိမြို့ဖများစုပေါင်း၍ ကန်ပက်လက်မြို့နယ်လုံခြုံရေးအဖွဲ့ကို ၂၀၂၁ ခုနှစ် မတ် ၅ ရက်တွင် ဖွဲ့စည်းခဲ့သည်။ ထိုလုံခြုံရေးအဖွဲ့မှ လူငယ်များသည် ချင်းအမျိုးသားတပ်မတော်(CNA)ထံတွင် စစ်ပညာသင်ယူကာ CDF – Kanpetlet အမည်ဖြင့် ပြောင်းလဲဖွဲ့စည်းခဲ့သည်။ ၂၀၂၁ ခုနှစ် ဧပြီ ၁၃ တွင် ချင်းပြည်နယ်တခုလုံးကို ကိုယ်စားပြုသည့် ကြားကာလချင်းအမျိုးသားကောင်စီ (ICNCC) ပေါ်ပေါက်လာခဲ့သည်။ ICNCC တွင် CDF-Kanpetlet သည်လည်း အဖွဲ့ဝင်အဖြစ် ပါဝင်ခဲ့သည်။ ၂၀၂၁ ခုနှစ် မေ ၁၃ ရက်တွင် ငြိမ်းချမ်းစွာ ဆန္ဒပြနေသည့် ကန်ပက်လက်ဒေသခံများကို စစ်ကောင်စီဘက်က အင်အားသုံးဖြိုခွင်းခဲ့ရာ CDF-Kanpetletသည် ကန်ပက်လက်မြို့ပေါ်တွင် စစ်ကောင်စီကို စတင်တိုက်ခိုက်ခဲ့သည်။ ထိုနေ့ကို CDF-Kanpetlet ၏ တော်လှန်ရေးနေ့အဖြစ် သတ်မှတ်ခဲ့ကြသည်။ 

၂၀၂၂ ခုနှစ်နောက်ပိုင်းတွင် နိုင်ငံရေးနှင့်ပတ်သက်သည့်ကိစ္စရပ်များ ဆွေးနွေးဆောင်ရွက်လာရခြင်းနှင့် ကန်ပက်လက်မြို့နယ်၏ အုပ်ချုပ်ရေးနှင့် ကာကွယ်ရေးဆိုင်ရာ လုပ်ဆောင်ချက်များကို ပြန်လည်ထိန်းကျောင်းရန် နိုင်ငံရေးစင်္ကြံတခု လိုအပ်လာသည့်အတွက် မြို့နယ်ညီလာခံခေါ်ယူကာ ကန်ပက်လက်မြို့နယ်ကောင်စီကို ၂၀၂၃ ခုနှစ် မတ် ၁ ရက်တွင် ဖွဲ့စည်းခဲ့သည်။ မြို့နယ်ညီလာခံတွင် CDF ကန်ပက်လက် တပ်မဟာ၊ မြို့နယ်ပြည်သူ့အုပ်ချုပ်ရေးအဖွဲ့၊ ဒေသန္တရပြည်သူ့အုပ်ချုပ်ရေးအဖွဲ့များ၊ ကန်ပက်လက်မြို့နယ်ရှိ မျိုးနွယ်စုငါးခုမှ ကိုယ်စားလှယ် နှစ်ဦးနှုန်းဖြင့် ၁၀ဦး၊ ဌာနဆိုင်ရာ တာဝန်ခံများနှင့် မြို့မိမြို့ဖများ ပါဝင်ခဲ့သည်။ မြို့နယ်ကောင်စီအောက်တွင် ကာကွယ်ရေးဌာန၊ တရားစီရင်ရေးဌာန၊ စီမံကိန်းနှင့်ဘဏ္ဍာရေးဌာန၊ ပညာရေးဌာန၊ ကျန်းမာရေးဌာန၊ CDM ရေးရာဌာန၊ လူသားချင်းစာနာထောက်ထားမှုဆိုင်ရာ အကူညီပေးရေးနှင့် ပြန်လည်နေရာချထားရေးဌာန၊ သတင်းအချက်အလက်နှင့်မှတ်တမ်းဌာန၊ သဘာဝပတ်ဝန်းကျင်ထိန်းသိမ်းစောင့်ရှောက်ရေးဌာန၊ စိုက်ပျိုးရေးနှင့် မွေးမြူရေးဌာနနှင့် ပြည်သူ့ရဲဌာန ဟူသည့် ဌာန ၁၁ ခုကို ဖွဲ့စည်းလည်ပတ်နေသည်။

၂၀၂၁ ခုနှစ် စက်တင်ဘာ ၃၀ ရက်တွင် ချင်းခုခံတော်လှန်ရေးတပ်များက စစ်ကောင်စီကို တိုက်ခိုက်ရန်အတွက် ချင်းလက်နက်ကိုင် ၁၈ ဖွဲ့ စုစည်းပြီး ချင်းဒေသပူးပေါင်းကာကွယ်ရေးကော်မတီ (CJDC) ကို ဖွဲ့စည်းရာ CDF-Kanpetlet ပါဝင်ခဲ့သည်။ ၂၀၂၃ ခုနှစ် ဒီဇင်ဘာ ၆ ရက်တွင် နိုင်ငံရေးဦးဆောင်မှု အဖွဲ့ဖြစ်သည့် ကြားကာလချင်းအမျိုးသားကောင်စီ (ICNCC) ထဲတွင် ချင်းအမျိုးသားတပ်ဦး (CNF)နှင့် လွှတ်တော်ကိုယ်စားလှယ်တချို့က ချင်းပြည်ဖွဲ့စည်းပုံအခြေခံဥပဒေတခုကိုရေးဆွဲပြီး ချင်းပြည်ကောင်စီ (CC)ကို ဖွဲ့စည်းခဲ့သည်။ ထို့နောက် စစ်ရေးလှုပ်ရှားမှုများဆောင်ရွက်ရန် ချင်းပြည်ကောင်စီ(CC)က ၎င်း၏အောက်တွင် ကာကွယ်ရေးဌာနတခုဖွဲ့စည်းကာ ယခင်စစ်ရေးမဟာမိတ်စည်းနှောင်မှုဖြစ်သည့် ချင်းဒေသပူးပေါင်းကာကွယ်ရေးကော်မတီ (CJDC) ကို ၂၀၂၃ ခုနှစ် ဒီဇင်ဘာ ၁၆ ရက်တွင် ဖျက်သိမ်းခဲ့သည်။ 

CDF-Kanpetlet သည် ICNCC နှင့်သာ နိုင်ငံရေးကိစ္စရပ်များ ဆက်လက်ဆောင်ရွက်မည်ဖြစ်ပြီး ချင်းပြည်ကောင်စီနှင့် အသစ်ရေးဆွဲသည့် ဖွဲ့စည်းပုံအခြေခံကို လက်မခံနိုင်ကြောင်း ကြေညာထားသည်။ သို့သော် CDF-Kanpetlet၏ တပ်ရင်းခုနစ်ခုအနက် အမှတ်-၄ တပ်ရင်း (Kkei Shing)နှင့် အမှတ်-၇ တပ်ရင်း (Wolf)တို့သည် အသစ်ပေါ်ပေါက်လာသည့် ချင်းပြည်ကောင်စီ(CC)နှင့် ပူးတွဲဆောင်ရွက်မည်ဟုဆိုကာ ခွဲထွက်ခဲ့သည်။ 

CDF-Kanpetlet ၏ တပ်ပိုင်းဆိုင်ရာခေါင်းဆောင်များမှာ အောက်ပါအတိုင်းဖြစ်သည်။ 

ဗဟိုညီလာခံကို တနှစ်လျှင်တကြိမ်ကျင်းပပြီး ဗဟိုကာကွယ်ရေးကော်မတီကို ရွေးကောက်တင်မြှောက်သည်။ ယခုလက်ရှိတွင် ဗဟိုကာကွယ်ရေးကော်မတီကို ၁၀ ဦးဖြင့် ဖွဲ့စည်းထားသည်။ တနှစ်မပြည့်မီအချိန်တွင်း အကြောင်းတစုံတရာကြောင့် လစ်လပ်သွားသည့်နေရာများကို အလျဥ်းသင့်သလို အစားထိုးခန့်အပ်လေ့ရှိသည်။

ချင်းညီနောင် အဖွဲ့ဝင်ဖြစ်သည်။ ချင်းညီနောင်တွင် ဇိုမီးဖက်ဒရယ်အစည်းအရုံး (ZFu/PDF-Zoland)၊ ချင်းအမျိုးသားအဖွဲ့ချုပ် (CNO/CNDF)၊ ချင်းကာကွယ်ရေးတပ်(မင်းတပ်)(CNC/CDF-Mindat)၊ မရာနယ်မြေအုပ်ချုပ်ရေးကောင်စီ (MTC/MDF)၊ ချင်းကာကွယ်ရေးတပ် (ကန်ပက်လက်) (CDF-Kanpetlet)နှင့် ချင်းပြည်ကာကွယ်ရေးတပ်ဖွဲ့(မတူပီ) တပ်မဟာ-၁ တို့က အဖွဲ့ဝင်အဖြစ်ပါဝင်ပြီး ၂၀၂၃ ခုနှစ် ဒီဇင်ဘာ ၃၀ ရက်တွင် စတင်ဖွဲ့စည်းသည်။

CDF-Kanpetlet သည် ချင်းဒေသပူးပေါင်းကာကွယ်ရေးကော်မတီ (CJDC)၏ အဖွဲ့ဝင်ဟောင်းဖြစ်သည်။ CJDC ကို ၂၀၂၁ ခုနှစ် စက်တင်ဘာ ၃၀ ရက်တွင် ဖွဲ့စည်းခဲ့ပြီး ၂၀၂၃ ခုနှစ် ဒီဇင်ဘာ ၁၆ ရက်တွင် ဖျက်သိမ်းခဲ့သည်။ 

ချင်းကာကွယ်ရေးတပ် (ကန်ပက်လက်) သည် အာဏာသိမ်းပြီးနောက်ပိုင်း ပေါ်ပေါက်လာသည့် ချင်းခုခံတော်လှန်ရေးတပ်ဖြစ်ပြီး  အာဏာသိမ်းကာလ နိုင်ငံရေးရပ်တည်ချက်မှာ စစ်အာဏာရှင်စနစ် အလုံးစုံပျက်သုဥ်းရေး၊ ကိုယ့်ကြမ္မာကိုယ်ဖန်တီးပိုင်ခွင့်ရရှိရေးနှင့် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးတို့ဖြစ်သည်။

အာဏာသိမ်းကာလ စစ်ရေးရပ်တည်ချက်မှာ တော်လှန်ရေးအင်အားစုများ၊ မဟာမိတ်တပ်ဖွဲ့များနှင့်အတူ  ပန်းတိုင်အောင်မြင်သည်အထိ တိုက်ပွဲဝင်ရေးဖြစ်သည်။ 

တပ်မဟာ တခုဖွဲ့ထားရှိပြီး ထိုတပ်မဟာအောက်တွင် အမှတ်-၁ နှင့် အမှတ်-၂ ဗျူဟာဟူ၍ ဗျူဟာနှစ်ခု ရှိသည်။ ထိုဗျူဟာနှစ်ခု၏အောက်တွင် တပ်ရင်းခုနစ်ခု ဖွဲ့စည်းထားသည်။ 

ထိုတပ်ရင်းများသည် အမှတ်-၁ တပ်ရင်း (Victoria)၊ အမှတ်-၂ တပ်ရင်း (Vakok)၊ အမှတ်-၃ တပ်ရင်း (Tumee)၊ အမှတ်-၄ တပ်ရင်း (Kkei Shing)၊  အမှတ်-၅ တပ်ရင်း (Khonu)၊ အမှတ်-၆ တပ်ရင်း (Mahuya) နှင့် အမှတ်-၇ တပ်ရင်း (Wolf)တို့ ဖြစ်သည်။

Facebook :  https://www.facebook.com/chinDefenceforce