About Us

ISP Peace Desk သည် မြန်မာ့ မဟာဗျူဟာနှင့် မူဝါဒလေ့လာရေး အင်စတီကျု (ISP Myanmar) ၏ လုပ်ငန်း စီမံချက် တခု ဖြစ်ပါသည်။ ISP Peace Desk တွင် မြန်မာ့ငြိမ်းချမ်းရေး အတွက် လူပုဂ္ဂိုလ်၊ အဖွဲ့အစည်း အသီးသီး၏ အားထုတ်မှု မှန်သမျှကို စုစည်း ဖော်ပြပေးမည် ဖြစ်ကာ ရည်ရွယ်ချက် သုံးရပ် ထားရှိပါသည်။

ထိုရည်ရွယ်ချက် သုံးရပ်မှာ –

(၁) ငြိမ်းချမ်းရေး ဖြစ်စဉ်နှင့် ပတ်သက်၍ ပြန့်ကျဲစွာ ရှိထားပြီး ဖြစ်သည့် အချက်အလက်များကို တနေရာတည်း၌ စုစည်းပေးပြီး အများပြည်သူ အလွယ်တကူ သိရှိနိုင်ရန်၊
(၂) မတူညီသော ရှုထောင့်အမြင်များကို ပေါင်းစပ် ချိန်ထိုးဖော်ပြသော အထူးဆောင်းပါးများ၊ အချက်အလက်များမှ တဆင့် အဖြေရှာသော အချေအတင် ဆွေးနွေးမှုများ ပေါ်ပေါက်စေရန်နှင့်
(၃) ငြိမ်းချမ်းရေး ဖြစ်စဉ်တွင် ပါဝင်ပတ်သက်နေသူများသာမက အများပြည်သူများအတွက်ပါ သတင်းအချက်အလက် သိပိုင်ခွင့် (Right to information) မြှင့်တင်နိုင်ရန် ရည်ရွယ်ခြင်း တို့ ဖြစ်ပါသည်။

ISP Peace Desk တွင် ငြိမ်းချမ်းရေး ကြိုးပမ်းမှု လက်ရှိ ဖြစ်စဉ်များ သာမက ၁၉၄၈ ခုနှစ် နောက်ပိုင်း နှစ်ပေါင်း ၇၀ ကျော် ကာလအတွင်း ငြိမ်းချမ်းရေး အတွက် ကြိုးပမ်း အားထုတ်မှု မှန်သမျှအား အတတ်နိုင်ဆုံး စုစည်းဖော်ပြနိုင်ရန်လည်း ရည်မှန်းထားပါသည်

ထိုသို့ ဖော်ပြရာတွင် ငြိမ်းချမ်းရေး ကြိုးပမ်းမှုများနှင့်အတူ ဖြစ်ပေါ်နေသည့်
ဆက်စပ် အခြေအနေများ (Contexts)၊ ကြိုးပမ်းမှု ပုံသဏ္ဍာန်များ (Design)၊ ကြိုးပမ်းလုပ်ဆောင်ခဲ့သူ၊ အဖွဲ့အစည်းများ (Actors)၊ ဖြစ်စဉ်များ (Procress) နှင့် ပိုင်းခြားစိစစ် လေ့လာသုံးသပ်ချက်များ (Analysis) များအား ကဏ္ဍတခုချင်းစီအလိုက် ချိတ်ဆက် ဖော်ပြသွားမည် ဖြစ်ပါသည်။

တင်ပြပုံ အားဖြင့် ငြိမ်းချမ်းရေး ကြိုးပမ်းအားထုတ်မှုနှင့် ပတ်သက် ဆက်နွှယ်နေသော အဖွဲ့အစည်း အသီးသီးက ဖော်ပြနေကြသည့် မူရင်း သတင်း အချက်အလက်များ၊ အစီရင်ခံစာများ၊ ကြေညာချက်များ၊ သုတေသန တွေ့ရှိချက်များနှင့် ပြည်တွင်း ပြည်ပ သတင်းဌာန အသီးသီးက ဖော်ပြနေသော ငြိမ်းချမ်းရေး ဆိုင်ရာ သတင်းများကို စုစည်းပေးခြင်း၊ အထူးဆောင်းပါးများ၊ သဘောထား အမြင်များ၊ လေ့လာ ဆန်းစစ်ချက်များနှင့် အချက်အလက် အခြေပြု ပုံကားချပ်များ ဖော်ပြခြင်းတို့ ပါဝင် မည်ဖြစ်သည်။

ထို့အတူ ပြည်ထောင်စု ငြိမ်းချမ်းရေး ညီလာခံ၌ ဆွေးနွေးနေသော ကဏ္ဍကြီး ငါးခုဖြစ်သည့် နိုင်ငံရေး ကဏ္ဍ၊ စီးပွားရေး ကဏ္ဍ၊ လူမှုရေး ကဏ္ဍ၊ လုံခြုံရေး ကဏ္ဍ၊ မြေယာနှင့် သဘာဝပတ်ဝန်းကျင် ကဏ္ဍတို့နှင့် သက်ဆိုင်သော အချက်အလက်များ ကိုလည်း ဖော်ပြပေးမည် ဖြစ်ပါသည်။

 

■ ISP Myanmar အကြောင်း

မြန်မာ့ မဟာဗျူဟာနှင့် မူဝါဒလေ့လာရေး အင်စတီကျု (ISP Myanmar) သည် လွတ်လပ်ပြီး ပါတီစွဲ ကင်းသည့် အစိုးရ မဟုတ်သော သုတေသန အဖွဲ့ ဖြစ်ပါသည်။ ISP Myanmar ၏ မြော်မြင်ချက်မှာ မြန်မာနိုင်ငံကို ရုန်းထ ကြံ့ခိုင်မှု အားကောင်းပြီး သည်းခံစိတ် ကြီးမားသော လူ့ အဖွဲ့အစည်းတရပ် အဖြစ် ပေါ်ထွန်းလာစေရေး ဖြစ်သည်။ ထို့အတူ အစိုးရသည်လည်း တာဝန်ယူမှု၊ တာဝန်ခံမှု ရှိသည့် အပြင် ပြည်သူအားလုံး ပါဝင်မှုကို လမ်းဖွင့်ပေးသော အစိုးရတရပ် ဖြစ်ပေါ်ရေးကို ဦးတည်ပါသည်။

ISP Myanmar ၏ ဦးတည်ချက်မှာ ဒီမိုကရေစီ ကျသော ခေါင်းဆောင်မှုကို မြှင့်တင် အားပေးရန်နှင့် နိုင်ငံ့အရေးတွင် နိုင်ငံသားများ ပါဝင်ဆောင်ရွက်မှု အားကောင်းစေရန် ဖြစ်သည်။

ISP Myanmar အနေဖြင့် အစီအစဉ် သုံးရပ်ကို ဆောင်ရွက်နေပြီး ယင်းတို့မှာ –
(၁) မူဝါဒ ဦးတည်သည့် သုတေသနလုပ်ငန်းများ၊ (၂) သုတေသန အရည်အသွေး မြှင့်တင်ရေး သင်တန်းများနှင့် ခေါင်းဆောင်အဆင့် ဆွေးနွေး ထိစပ်ခြင်း၊ (၃) မီဒီယာကြားခံပေါင်းစုံဖြင့် ဆက်ဆံဆက်သွယ် ရေးနှင့် ပြင်ပဆက်ဆံရေး လုပ်ငန်းများ ဖြစ်ကြသည်။

ISP Myanmar သည် မြန်မာ့ မဟာဗျူဟာ နှင့် မူဝါဒလေ့လာရေးဂျာနယ် (The Myanmar Quarterly) ကိုလည်း ထုတ်ဝေနေပြီး ရေးသူ ဖတ်သူ ဆွေးနွေးပွဲ ပုံစံဖြစ်သော Myanmar Quarterly Symposium ကို သုံးလတကြိမ် ပြုလုပ်လျက်ရှိကာ ယောမင်းကြီးဇရပ် စကားဝိုင်း ဆွေးနွေးပွဲ (Talk Show) ကိုလည်း ပြုလုပ်နေပါသည်။